34 ގެސްޓްހައުސްއެއް ހިންގަމުންދާ އއ އުކުޅަހު ހެލްތު ސެންޓަރަށް ނިވާކަން ހެދުމުގައި ދާ ފަތުރުވެރިންނަށް ހިދުމަތް ނުދޭން ނިންމައިފިއެވެ.
އުކުޅަހު ސިއްހީ މަރުކަޒުން މިދިޔަ އާދީއްތަ ދުވަހު ނެރުނު އެންގުމެއްގައި ބުނެފައިވަނީ، އެ މަރުކަޒަށް އެކިއެކި ހިދުމަތްތައް ހޯދަންދާ ފަތުރުވެރިން ވަރަށް ނިވާކަން ކުޑަ ހެދުން އަޅައިގެންދާ ކަމަށެވެ. އަދި އެއީ މީހުން ދިރިއުޅޭ ރަށްރަށުގައި ފަތުރުވެރިން ހެދުން އެޅުމަށް ޓޫރިޒަމް މިނިސްޓްރީން އާއްމުކޮށްފައިވާ މިންގަނޑާ ހިލާފު ކަމެއް ކަމަށްވެސް ބުންނެފައިވެއެވެ.
އަދި އެ މަރުކަޒުން ދެން ހިދުމަތް ފޯރުކޮށްދެވޭނީ ޓޫރިޒަމް މިނިސްޓްރީން އާއްމުކޮށްފައިވާ ހެދުން އެޅުމުގެ މިންގަނޑާ އެއްގޮތަށް ހެދުން އަޅައިގެންދާ ފަރުތުވެރިންނަށް ކަމަށް އެންގުމުގައިވެ އެވެ. އެ އެންގުމަކީ އެ މަރުކަޒުން ހިދުމަތް ހޯދަން އަންނަ ދިވެހިންނަށްވެސް އަންގާފައިވާ އެންގުމެކެވެ.
އުކުޅަހު މަރުކަޒުން ބުނީ، ހަށިގަނޑު ފެންނަ އަދި މާކުރު ހެދުމުގައި ހިދުމަތް ހޯދަންދާ މީހުން، ހެދުން ބަދަލުކުރަން ދާން އެދޭނެ ކަމަށާއި އަދި އެމީހުންނަށް ހިދުމަތް ދޭނީ އެކަށީގެންވާ ހެދުމެއް ލައިގެން ދިއުމުން ކަމަށެވެ. މިހެން ބުންޔަސް ފުރާނައަށް ނުރައްކާވާފަދަ އެމަޖެންސީ ޙާލަތްތައް މެދުވެރިވެގެން ގެނެވޭ ފަރާތްތައް ނުހިމެނޭނެކަމަވެސް އުކުޅަހު ސިއްހީ މަރުކަޒުން ބުނެއެވެ.
