ދިވެހި ރައްޔިތުންގެ ޑިމޮކްރެޓިކް ޕާރޓީ (އެމްޑީޕީ) މެޖޯރިޓީ އޮތް ހަނިމާދޫ ކައުންސިލުން އެ ޕާޓިއަށް ނޫނެކޭ ބުނެފިއެވެ.
ހަނިމާދޫ ކައުންސިލުން އެމްޑީޕީއަށް ނޫނެކޭ މިފަހަރު ބުނީ އެ ޕާޓީ އޮފީސް ނުވަތަ ހަރުގެ ހިންގަން ހަނިމާދޫން އެކަށީގެންވާ ބިމެއް ދިނުމަށް އެދި ފޮނުވާފައިވާ ސިޓީއަށެވެ.
ސިޓީއަށް ޖަވާބު ދިނުމަށް ހަނިމާދޫ ކައުންސިލްގެ 4 ވަނަ ދައުރުގެ 69 ވަނަ ބައްދަލުވުމުގައި ވަނީ އެޖެންޑާ ކޮށްފައެވެ.
ޖަލުސާގައި ބަހުސަށް ހުޅުވާލުމުން ކައުންސިލަރު ނާޒިޔާވަނީ ހުށައެޅުމެއް ހުށައަޅާފައެވެ. އޭގައިވަނީ ހަނިމާދޫ ރައްޔިތުންނަށް ބޯހިޔާވަހިކަމަށް ގޯތި ދޫކުރުމަށްފަހު ރައްޔިތުންގެ މަޝްވަރާއަށްފަހު ޕާޓީތަކަށް ބިން ދޫކުރަން ފެންނަކަމަށެވެ. މިހުށައެޅުން ވަނީ ޖަލުސާގެ އިއްތިފާގުން ފާސްވެފައެވެ.
އެ ޖަލުސާގައި ބައިވެރިވީ 3 މެންބަރުންނެވެ. އެއީ ނައިބުރައީސް ފިރާގް، އަދި އަންހެން ދެ މެންބަރުން ހާރިޝާ އަދި ނާޒިޔާއެވެ. ކައުންސިލަރު އަލީ އިބުރާހިމް އަދި ރައީސް ސައްތާރު ހުރީ ޗުއްޓީގައެވެ.
