ހަނިމާދޫ ކައުންސިލުން ހަނިމާދޫގައި “ރައްކާތެރި ގޮތުގައި ކުނި މެނޭޖްކުރުމާއި ނައްތާލުމާއިބެހޭ އުސޫލް” ގައި ވާ ގޮތަށް މިވަނީ ހަނިމާދޫ ކުނިކޮށި ބަދަލު ކޮށްލާފައެވެ؟
އެ އުސޫލް ދިވެހިރާއްޖޭ ސަރުކާރުގެ ގެޒެޓްގައި 27 މާރިޗު 2023 ވަނަ ދުވަހު 9:41 ގައި ވަނީ ޝާއިއުކޮށްފައެވެ. އެހިނދުން ފެށިގެން އެ އުސޫލު ބުނާގޮތުން އެ އުސޫލަށް އަމަލު ކުރަން ފެށުނީއެވެ. އުސޫލުގެ 3 ވަނަ ނަންބަރުގައި ބުނެފައިވަނީ “މިއުސޫލަށް އަމަލުކުރަން ފަށާނީ މިއުސޫލް ދިވެހި ސަރުކާރުގެ ގެޒެޓުގައި ޝާއިއު ކުރާދުވަހުން ފެށިގެންނެވެ.”
އެހެން ކަމުން އެއުސޫލުގައި ބުނާ ކަންތައް މިހާރު ހުންނަން ވާނީ ތަންފީޒު ކުރެވިފައި ނޫންހެއްޔެވެ؟ އުސޫލު ބުނާގޮތުން އެހެން ވާން ޖެހޭނެއެވެ. ނަމަވެސް މަންޒަރު އެއާ ހާސްބައި ތަފާތެވެ.
އުސޫލްގައި ކުނިއުކަން ގަޑި ކަނޑައަޅާފައިވެއެވެ. އަދި ކުނި އުކަން ވާނީ އަމިލައަށް އުކާނަމަ 20 ރުފިޔާގެ ގޭޓް ފީއެއް ދީގެން ކަމަށްވެސް ބުނެފައިވެއެވެ. މީގެ އިތުރުން ކުނި އަޅަން ވާނީ އެކުންޏަކަށް ހާއްސަކުރެވިފައިވާ ނަންބޯޑު ޖެހިފައިވާ ދިމާއަކަށް ކަމަށްވެސް ބުނެފައިވެއެވެ.
ނަމަވެސް މީން އެއްކަމަވެސް ވެފައި ވާތަނެއް ފެންނާކަށް ނެތެވެ. ތަނަށް ވަދެ ނުކުތުމަށް ވަކި ހާއްސަ ގޭޓެއް ނެތެވެ. ގޭޓް ފީ ބަލައިގަންނާނެ ކައުންޓަރެއް ނެތެވެ. ކުނި ވަކިކުރަން ބޯޑުތައް ނުވަތަ ފާހަގަތައް ޖެހިފައެއްނެތެވެ.
އެހެނެއް ކަމަކު ބޮޑު ކުނިފުންޏެއް ފެންނާން އެބަހުއްޓެވެ. ކުނިވާ ތަކެތި އަޅަން ފެނާޖައްސާފައި ވާ ބޮޑު ވަޅެއް ކޮނެފައި އެބަހުއްޓެވެ. އެ ވަޅުގަނޑުގައި ކުނިވާ ޒާތުގެ އެއްޗެހި އަޅާފައި ހުރީ ޕުލާސްޓިކް ކޮތަޅާއި ޕުލާސްޓިކް ފުޅިއާއެކުއެވެ. މުޅި ވަޅު އޮތީ މެހިން ތަތްތެޅިފައެވެ. ފަހަރުގައި މިއީ އެންމެ ރައްކާތެރި ގޮތުގައި ކުނި ނައްތާލުން ކަމަށް ވެދާނެއެވެ.
އެ އުސޫލުގައި ވާކަމަކަށް ރައްޔިތުން ހިލާފު ވެއްޖެނަމަ ޖޫރިމަނާ ކުރާނެކަމަށް ބުނެފައި އޮވެއެވެ. އެހެނަސް ގަވައިދު އާންމުކޮށް އަމަލު ކުރަން ފެށިއިރު ކައުންސިލުން ފުރިހަމަ ކުރަން ޖެހޭ ކަންތައް މިހުރީ ފުރިހަމަ ނުވެއެވެ.
ރައްޔިތުންނަށް ކަމެއް ކުރުމަށް އަމުރު ކުރާއިރު އެކަން ކުރެވޭނެ އިންތިޒާމް ހަމަޖެއްސުން އެއީ ނެތް ކަމެއް ކަމަކަށް ހަނިމާދޫ ކައުންސިލަށް ވީހެއްޔެވެ؟ ނޫނީ އުސޫލެއް އޮންނާނެއޭ ބުނަން އުސޫލެއް ހެދީ ހެއްޔެވެ؟
