ކޮންމެ ތަނެއްގައިވެސް އުސޫލާ ގަވައިދުތައް ހަދާފައި ހުރެއެވެ. އެއީ އެތަނެއް ހިންގުމުގައި މުހިންމު އެއް އަސާސެވެ. އެގޮތުން ދާދި ފަހުން މިވަނީ އެޑިއުކޭޝަން މިނިސްޓްރީން ވެސް މުހިންމު ގަވާއިދެން ނެރެފައެވެ. އެއީ ” ސްކޫލް ދަރިވަރުންގެ އާންމު ގަވާއިދު “އެވެ.
މި ގަވާއިދުގެ ބޭނުމަކީ ސްކޫލްތަކުގައި ދަރިވަރުން އުޅޭއިރު ދަރިވަރުން އަމަލުކުރާނެ ގަވާއިދެއް އޮތުމާއި، ސްކޫލުން ބޭރުގައި ދަރިވަރުންގެ އުޅުން ބައްޓަން ކުރާނެ މިންގަނޑުތަކެއް ކަނޑައަޅާފައި އޮތުމެވެ.
އެގޮތުން މި ގަވާއިދުގައި ވަނީ ސްކޫލް ދަރިވަރުންގެ އަޚުލާގީ މިންގަނޑު ހުންނަންޖެހޭގެ ގޮތްތަކާއި، ސްކޫލަށް ހާޒިރުވުމާއި ދަރިވަރުންގެ ޔުނިފޯމް ކޯޑުގައި ހުންނަންޖެހޭ މިންގަނޑު ކަނޑައަޅާފައެވެ.
މުހިންމު ބައެއްނުކުތާ
- އަންހެން ކުދިނަން ގަހަނާގެ ގޮތުގައި ބޭނުން ކުރެވެނީ ފަށަކާއި ކަންފަތުގައި ލާ އެލިފައި ނުހުންނަ (ސްޓަޑް ފަދަ) އެއްޗެއް އެކަނި
- ކީސްޓޭޖް 2 ން ފެށިގެން މަތީ ފިރިހެން ކުދިނަން ގަހަނާގެ ގޮތުގައި ބޭނުން ކުރެވޭނީ އަތުކުރި ގަޑިއެއް އެކަންޏެވެ. ނަމަވެސް ސްމާރޓް ވޮޗް ބޭނުން ނުކުރެވޭ
އަދި ސްކޫލާއި، ސްކޫލުން ބޭރު ހަރަކާތްތަކުގައި ބައިވެރިވުމުގައި ޢަމަލު ކުރާނެ ގޮތް ވަނީ ކަނޑައަޅާފައެވެ. އެގޮތުން ސްކޫލުން ބޭރުގައި ހިންގާ ފިލްމު، ތަމްސީލް، އިޝްތިހާރު ނުވަތަ މީޑިއާގައި ހިންގާ ޕްރޮގްރާމެއްގައި ބައިވެރިވެވޭނީ އެޑިއުކޭޝަން މިނިސްޓްރީގެ ހުއްދައާއެކު ކަމަށް ވަނީ ބުނެފައެވެ. އަދި ކުލަބު ޖަމިއްޔާތަކުން މެންބަރަކަށްވުމާއި އެފަރާތަތްކުން ހިންގާ ހަރަކާތްތަކުގައި ބައިވެރިވެވެނީ އެދަރިވަރަކު ކިޔަވާ ސްކޫލް ނުވަތަ މިނިސްޓްރީ ކަނޑައަޅާފައިވާ ” ދިވެހިރާއްޖޭގެ ސްކޫލްތަކުގައި ކޯކަރިއުލާ ޙަރްކާތްތައް ހިންގުމުގެ އުސޫލު” އާ އެއްގޮތަށެވެ.
ތަޢުލީމުގެ ބޭނުމަށް ހިންގޭ ތަމްރީންތައް ފިޔަވާ، 16 އަހަރުން ދަށުގެ ކުދިން އެއްވެސް ވަޒީފާއެއް އަދާކުރުމަކީ ހުއްދަ ކަމެއް ނޫނެވެ.
މީގެއިތުރުން ސްކޫލް ދަރިވަރުން ކުރުން މަނާ ކަންތައްތައް ގަވާއިދުގައި ވަނީ ހިމަނާފައެވެ. އެގޮތުން ބެލެނިވެރިއެއްގެ ހުއްދައާއި ނުލާ ރޭގަނޑު 10:00ގެ ފަހުން ބޭރުގައި އުޅުންވެސް މަނާވާނެއެވެ. އަދި މަރާމަރީ ހިންގުން އެފަދަ ކަމަކަށް ހިތްވަރު ދިނުމާއި މަސްތުވާތަކެތި ގެންގުޅުމާއި ވިއްކުން އަދި ބޭނުން ކުރުމަކީ މަނާކަމެކެވެ.
ޒުވާނުންގެތެރޭ މަސްހޫރު ވޭޕް ބޭނުން ކުރުމާ ދުންފަތުގެ އިސްތިއުމާލު ކުރުން އަދި ގެންގުޅުން މަނާ ކޮށްފައިވާއިރު އެއްވެސް ކަހަކަ ޓެޓޫއެއް ޖެހުންވެސް މަނާ ކޮށްފައިވެއެވެ.
މީހަކާ އިނުމާއި މުޒާހަރަކުމާއި ހަޅުތާލުކުރުން، ހަނގާކުރުން، ބަދު އަހްލާގީ އަމަލެއް ކުރުން ނުވަތަ މަގުފަހި ވާނެފަދަ ކަމެއްކުރުން މަނާކޮށްފައިއެވެ. އަދި އެއްވެސް ސިޔާސީ ހަރަކާތެއްގައި ބައިވެރިވުން ވެސް ވަނީ މަނާކޮށްފައެވެ. ނަމަވެސް ސަރުކާރުގެ ސިޔާސަތުތައް ތަންފީޒު ކުރުމުގައި ހިންގާ ހަރަކާތްތައް ނުވަތަ ގައުމީ ހަރްކާތްތަކުގައި ބައިވެރި ވުމަކަށް ހުރަހެން ނެތެވެ.
ޚާއްސަ ހުއްދައެއްގެ ދަށުން ގްރޭޑް 11 އަދި 12 ގައި ތައުލީމު ހާސިލު ކުރާ ދަރިވަރުންނަށް ސްކޫލު ގަޑީގައި މޯބައިލް ފޯނު ބޭނުން ކުރެވުނު ނަމަވެސް އެހެން ދަރިވަރުންނަށް ފޯނު ބޭނުން ކުރުމަކީ މަނާކަމެކެވެ.
މިނިސްޓްރީން ވިދާޅުވީ މިޤަވާއިދާ ޚިލާފުވާ ދަރިވަރުންނާ މެދު “ބިހޭވިއަރ މެނޭޖްމަންޓް ޕޮލިސީ”އާއި އެއްގޮތަށް ޢަމަލު ކުރަމުންދާނެ ކަމަށެވެ. މިގަވާއިދު މިނިސްޓްރީން މިހާރު ވަނީ އާއްމުކޮށް، ޢަމަލުކުރަން ފަށާފައެވެ.
