ފުވައްމުލައް ސިޓީ ތަޢުލީމީ ހަބަކަށް ބަދަލުކޮށްލާނަން ކަމަށް އިދިކޮޅު ރިޔާސީ ކެނޑިޑޭޓް ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ ކުރިއަށް އޮތް ރިޔާސީ ކެންޕޭނުގައި ފުވައްމުލައް ސިޓީއަށް ވަޑައިގެން އެ ސިޓީގައި ބޭއްވި ޖަލްސާގައި ވާހަކަ ދައްކަވަމުންނެވެ.
އެ މަނިކުފާނު ވިދާޅުވީ، ފުވައްމުލައް ސިޓީ އަކީ ގިނަ ކުދިންތަކެއް ތަޢުލީމު ޙާޞިލްކުރުމަށް އަންނަ ތަނެއް ކަމަށާއި، އެހެންކަމުން އެ ކުދިންނަށް އައިސްތިބެވޭނެ އެކޮމޮޑޭޝަން ފެސިލިޓީއެއް ގާއިމް ކުރާނެކަމަށެވެ.
ހަމައެއާއެކު، ރާއްޖޭގައި ޢިލްމީ ޖީލެއް ބިނާ ކުރުމަކީ އެ މަނިކުފާނުގެ މެނިފެސްޓޯގައި ހިމެނިފައިވާ ލަނޑުދަނޑިއެއްކަމަށާއި، އެކަން ޙާޞިލްކުރުމުގެ ގޮތުންކޮންމެ ސިޓީއެއްގައިވެސް ފެންވަރު ރަނގަޅު ލައިބްރަރީއެއް ޤާއިމް ކުރާނެ ކަމަށްވެސް ވިދާޅުވިއެވެ. އެގޮތުގެ މަތިން ފުވައްމުލައް ސިޓީގައިވެސް އެފަދަލައިބްރަރީއެއް ޤާއިމްވެގެންދާނެ ކަމަށް އެ މަނިކުފާނު ފާހަގަކުރެއްވިއެވެ.
މީގެ އިތުރުންވެސް، ފުވައްމުލައް ބަނދަރު ބޮޑުކޮށް ޒަމާނީ ފެންވަރަށް ތަރައްގީ ކޮށްދޭނެކަމަށާއި، އެއާޕޯޓުގެ ތަރައްގީި ކޮށްދޭނެކަމަށާއި، މާލެ ދާން ނުޖެހޭވަރަށް ހޮސްޕިޓަލް ތަރައްގީކޮށް ޒަމާނީ ކުރުމާއި، އާޓިފިޝަލް ބީޗެއް ޤާއިމްކޮށްދޭނެ ކަމަށް ޑރ.މުޢިއްޒު ވިދާޅުވިއެވެ.
