ދައުލަތަށް ފައިސާ ލިބޭނެ ކަމާއި، ފައިސާ ހޯދާނެ ގޮތް އެނގޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަފު ސޯލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ތ. ކިނބިދޫ ގައި މިއަދު ބޭއްވި ކެންޕޭނު ޖަލްސާގައި ވާހަކަފުޅު ދައްކަވަމުންނެވެ.
ރައީސް ސޯލިހު ވިދާޅުވީ ކޮންމެ ކެނޑިޑޭޓަކުވެސް ރަށްރަށަށް އަރާ ގިނަ ވައުދުތަކެއް ވަމުންދާއިރު، އެއީވެސް ސަރުކާރުން ކުރާނެ ހަރަދު ކަމަށެވެ. އެބޭފުޅުން އެހެން އެ ވިދާޅުވަނީ ފައިސާ ލިބޭނެކަން އެނގޭތީ ކަމަށް ރައީސް ފާހަގަކުރެއްވިއެވެ. އަދި ދައުލަތަށް ފައިސާ ހޯދާނެ ގޮތް އެނގިލައްވާ ކަމަށާއި،ވައުދުތައް ވަނީ އެކަންކަން އެނގޭތީ ކަމަށް އެމަނިކުފާނު ވިދާޅުވިއެވެ.
ހަމައެއާއެކު، މިއީ ބަނގުރޫޓުވެފައިވާ ސަރުކާރެއް ނޫން ކަމަށާއި މިއީ ފުދުންތެރި ސަރުކާރެއް ކަމަށް ރައީސް ސޯލިހު ވިދާޅުވިއެވެ. އަދި އިގްތިސާދީ ބޮޑު ބަދަލެއްގެ ވާހަކަ މެނިފެސްޓޯގައި ހިމަނާފައި އެވަނީ އެކަން ކުރެވޭނެ ގޮތްތައް ރާވާ އިންތިޒާމުކޮށްފައި ހުރުމުން ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން މި ސަރުކާރުން ބެންކުތަކުން ނަގާފައިވާ ފައިސާ އަނބުރާ ދެއްކޭނެކަމުގެ ޔަގީންކަން އެބަ އޮތް ކަމަށްވެސް އެމްޑީޕީގެ ރިޔާސީ ކެނޑިޑޭޓް، އަދިރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވިއެވެ.
