ރައީސް އިބްރާހިމް މުހައްމަދު ސޯލިހު ކެމްޕެއިނު ތަރުޖަމާނު، ޑިފެންސް މިނިސްޓަރު މާރިޔާ އަހުމަދު ދީދީ މިއަދު ނޫސްވެރިންނާ ބައްދަލުކުރައްވަމުންވިދާޅުވީ، ފާހަގަކުރެވޭ ހަރުކަށި ފިކުރުގެ މީހުން ޑރ.މުޢިއްޒުއަށް ތާއީދުކޮށް ސޯޝަލް މީޑިއާގައި ކެންޕޭން ކުރަމުންދާކަމަށެވެ.
މާރިޔާ މިހެން ވިދާޅުވީ ޑރ.މުޢިއްޒުގެ އަނބިކަނބަލުންނަކީ ކޮން ބޭފުޅެއްތޯ ސުވާލު އުފައްދަވަމުންނެވެ. އެބޭފުޅާއާ ސަލަފް ޖަމިއްޔާއާ ގާތް ގުޅުމެއްއޮންނަކަމަށް މާރިޔާ ފާހަގަކުރެއްވިއެވެ. އެގޮތުން ސަލަފް ޖަމިއްޔާގެ ރައީސަކީ އެބޭފުޅާގެ އެއްބަނޑު އެއްބަފާ ބޭބެ ކަމަށާއި، އެބޭފުޅާގެ ބޮޑުބޭބެއަކީވެސް ސަލަފަށް ނިސްބަތްވާ ބޭފުޅެއްކަން މާރިޔާ ވިދާޅުވިއެވެ.
މިއާއެކު ޔާމީން ސަރުކާރުގައިވެސް ޔާމީންގެ އަނބިކަނބަލުންގެ ނުފޫޒު ސަރުކާރަށް އޮތް މިންވަރު ގެ ވާހަކައަކީ އަބަދުމެ ދެކެވެމުންދިޔަ ވާހަކައެއް ކަމަށްމާރިޔާ ހަނދާންއާކޮށްދެއްވިއެވެ.
އަދި ޑރ.މުޢިއްޒު ކޮނޑޭއަށް ވަޑައިގަތުމުން، ރައީސް ސޯލިހުއަށް މަރުޙަބާކިޔަން ނިކުމެ ތިބި މީހުންގެ ދެގުނައަށް އެރަށުން މީހުން ނުކުމެ ތިބި ކަމަށާއި،ކޮނޑޭއަކީ ތަފާސްހިސާބުތަކުން ދައްކާ ގޮތުގައި އެންމެ ގިނައިން ސީރިއާއަށް މީހުން ފޮނުވާ ރަށް ކަމަށް މާރިޔާ ފާހަގަކުރެއްވިއެވެ.
މީގެ އިތުރުނަ ސަލަފް ޖަމިއްޔާގެ މީހުން ޑރ.މުޢިއްޒު އެންޑޯޒްކުރަމުންދާކަމަށްވެސް މާރިޔާ ވިދާޅުވިއެވެ.
