ލ.މާބައިދޫ ސިއްޙީ މަރުކަޒު 24 ގަޑިއިރަށް ބަދަލުކޮށް އިތުރު ޚިދުމަތްތައް ގާއިމްކޮށްދެއްވާނެކަމަށް ރައީސް ސޯލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ ރިޔާސީ ކެމްޕޭނަށް ލ.މާބައިދޫއަށް ވަޑައިގެން ބޭއްވި ބައްދަލުވުމުގައި ވާހަކަފުޅުދައްކަވަމުންނެވެ. އެ ވާހަކަފުޅުގައި ރައީސް ވިދާޅުވީ މި އަހަރުގެ ރިޔާސީ އިންތިހާބުގައި ފުރަތަމަ ފަހަރަށް މާބައިދޫން މެޖޯރިޓީ ވޯޓު ކަށަވަރުވާނެކަމަށެވެ.
އިތުރަށް ރައީސް ވިދާޅުވީ ސިއްހީ މަރުކަޒުގެ ހިދުމަތުގެ ވަގުތު އިތުރުކޮށް ކުރިއަށް އޮތް ދައުރު 24 ގަޑިއިރަށް ބަދަލުކޮށް ހިދުމަތް ފުރިހަމަކޮށްދެއްވާނެކަމަށެވެ. އަދި 24 ގަޑިއިރަށް ބަދަލުކުރަނީ ނަންބޯޑެއް ނޫން ކަމަށާއި، އެއީ 2018 ވަނަ އަހަރު ފެނުނު މަންޒަރެއް ކަމަށެވެ. ރައީސް ވިދާޅުވީ 24 ގަޑިއިރަށް ބަދަލުވާއިރު އެތަނަށް ބޭނުންވާ ވަސީލަތްތައް ވެސް ގާއިމްކޮށްދެއްވާނެ ކަމަށެވެ.
މީގެ އިތުރުން ބޮޑެތި މަގުތަކުގައި ތާރުއަޅާ ޒަމާނީ ފެންވަރަށް ތަރައްގީކުރައްވާނެ ކަމަށާއި، ސްކޫލަށް އިތުރަށް ބޭނުންވާ މަލްޓިޕަރޕަސް ހޯލާއި ކްލާސްރޫމްގާއިމްކޮށްދެއްވާ ގިރާ ސަރަހައްދު ހިމާޔަތްކުރުމުގެ މަސައްކަތާއެކު މޫދަށް އެރޭނެ ސަރަހައްދެއް ހައްދަވާނެ ކަމަށްވެސް ރައީސް ސޯލިހު ވިދާޅުވިއެވެ. މީގެއިތުރުން ޒުވާނުން ބޭނުންވާ އިންޑޯ ޖިމާއެކު ޔޫތު ސެންޓަރު ގާއިމުކުރައްވާނެ ކަމަށްވެސް އެމަނިކުފާނު ވިދާޅުވިއެވެ.
