ރިޔާސީ ބަހުސް ރީޝެޑިއުލް ކުރެވޭތޯ އެމްއެންޔޫއާ ވާހަކަ ދައްކައިގެން މަސައްކަތް ކުރަމުން އަންނަ ކަމަށް ރައީސް ސޯލިހުގެ ކެމްޕެއިނު ތަރުޖަމާނު،ޑިފެންސް މިނިސްޓަރު މާރިޔާ އަހުމަދު ދީދީ މިއަދު ބޭއްވި ނޫސް ކޮންފަރެންސްގައި ވިދާޅުވެއްޖެ އެވެ.
މީގެ ސަބަބަކަށް މާރިޔާ ވިދާޅުވީ ރިޔާސީ ބަހުސް ބާއްވަން ހަމަޖެހިފައިވާ ދުވަހަކީ އެމްޑީޕީގެ ބޮޑު ޖަލްސާއެއް މާލޭގައި ބޭއްވުމަށް ހަމަޖެހިފައިވާ ދުވަހަކަށްވާތީ އެ ދުވަހު ބަހުސް ބާއްވާނަމަ ރައީސަށް ބައިވެރިވަޑައިނުގަނެވޭނެތީއެވެ.
ރިޔާސީ ބަހުސްގައި ރައީސް ބައިވެރިވެވަޑައިގަންނަވާނެ ކަން އިއުލާނުކުރައްވާފައިވަނިކޮށް ޖަލްސާގެ ވާހަކަ މާރިޔާ ދެންނެވުމުން ނޫސްވެރިން ސުވާލުއުފެއްދުމުން، މާރިޔާ ވިދާޅުވީ އެ ޖަލްސާއަކީ މާ ކުރިންވެސް ރޭވިފައިވާ ޖަލްސާއެއްކަމަށެވެ.
“އަޅުގަނޑުމެން ކުރާނެ ކަމެއް ނެތް އޭގައި އެހެންވެ އަޅުގަނޑުމެން އަބަދުވެސް އެދެނީ ކުރިއާލާ ތާރީހުތައް ދެއްވުމަށް.” މާރިޔާ ވިދާޅުވި އެވެ.
މާރިޔާ ވަނީ ބަހުސަށް ވުރެ ރައީސް އަބަދުވެސް އިސްކަން ދެއްވަނީ ރައްޔިތުންނާ ގާތަށް ވަޑައިގެން ވާހަކަ ދެއްކެވުމަށް ކަމަށް މީގެ ކުރިން ވިދާޅުވި ވާހަކަތަކުރާރުކުރައްވައިފައެވެ.
