މިރޭ ލ.ފޮނަދޫގެ ރައްޔިތުންނާ ބައްދަލުކޮށް ވާހަކަ ދައްކަވަމުން ޑރ.މުޢިއްޒު އެ އަތޮޅުގައި ޓޫރިޒަމް ފުޅާކުރުމަށް ގިނަ ކަންތައްތަކެއް ހުށައަޅުއްވާފައިވެއެވެ.
އެގޮތުން ކައްދޫ އެއާޕޯޓު އިންޓަނޭޝަނަލް ކޮށްދޭނެ ކަމަށް ޑރ.މުޢިއްޒު ވިދާޅުވިއެވެ. މީގެ ސަބަބުން ފަތުރުވެރިން ސީދާ ލާމު އަތޮޅަށް އައުމަށް މަގުފަހިވެގެންދާނެ ކަމަށް އެމަނިކުފާނު ފާހަގަކުރެއްވިއެވެ. އަދި ލާމު އަތޮޅަށް އިތުރު އެއާޕޯޓެއް ބޭނުންވާ ކަމަށާއި، އެ އެއާޕޯޓު އަޅާނެ ރަށަކާމެދު ވިސްނަމުންދާ ކަމަށްވެސް ހާމަކުރެއްވިއެވެ.
މީގެ އިތުރުން ލާމު އަތޮޅުގައި ލޭންގުއޭޖް ސްކޫލެއް ގާއިމްކުރުމަށް ނިންމާފައިވާ ކަމަށް ޑރ.މުޢިއްޒު ވިދާޅުވިއެވެ. މިއީ ފަތުރުވެރިކަމަށް ނުހަނު ބޭނުންހުރިކަމެއް ކަމަށް ފާހަގަކުރެއްވިއެވެ. ލޭންގުއޭޖް ސްކޫލެއް ގާއިމްވުމުން ރިސޯޓުތަކުގައި ތަރުޖަމާކުރުމަށް ބޭރު މީހުން ގެންނަން ނުޖެހޭނެ ކަމަށާއި، ދިވެހިންނަށް އެ ފުރުޞަތު ހުޅުވިގެންދާނެކަމަށް އެމަނިކުފާނު ވިދާޅުވިއެވެ.
ހަމައެއާއެކު ބިން ހިއްކުމުގެ މަޝްރޫޢުތައް ހިންގާ، ސޯޝަލް ހައުސިންގ ޔުނިޓުތައް ގާއިމްކުރާނެ ކަމަށް ޑރ.މުޢިއްޒު ވަނީ ވަޢުދުވެވަޑައިގެންފައެވެ. އޭގެތެރެއިން ޓޫރިޒަމް ދާއިރާގައި އުޅުއްވާ ބޭފުޅުން ހާއްސަ ކެޓަގަރީއެއްގެ ގޮތުގައި ހިމަނުއްވާނެ ކަމަށްވެސް އެމަނިކުފާނު ވިދާޅުވުއިއެވެ. އެގޮތުން ރިސޯޓާ ކައިރިން ހައުސިން ޔުނިޓް ހަދާ، ރިސޯޓު މުވައްޒަފުންނަށް އެތަންތަން ހާއްސަކުރާނެ ކަމަށް ވިދާޅުވިއެވެ.
އިތުރަށް ޑރ.މުޢިއްޒު ވިދާޅުވީ، ތަރައްޤީ ވާންޖެހޭނީ ދެމެހެއްޓެނިވި ތަރައްޤީއަކަށް ކަމަށާއި، އެމަނިކުފާނުގެ ވެރިކަމެއްގައި ޚިދުމަތްދޭއިރު ޕާޓީއަކަށް ބެލުމެއްނެތި ހަމަހަމަކޮށް ރަށްތައް ތަރައްޤީކުރާނެ ކަމަށެވެ.
