އެމްޑީޕީގެ ފުރަތަމަ ވެރިކަން ވެއްޓުނު ގޮތާ ބެހޭ ގޮތުން އެކުލަވައިލި “ކޯނީ” ރިޕޯޓު މިހާރު ފެންނާކަށް ނެތް ކަމަށާއި އެ ރިޕޯޓު ވީތަނެއް ހޯދަން އެ މައްސަލަ ފުލުހަށް ހުށަހަޅާފައިވާނެ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެއެވެ.
ރިޔާސީ ކެމްޕޭނަށް މިއަދު ހދ. ނޭކުރެންދުއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސް ސޯލިހު ވަނީ،ބަހުސްގައި އެހެން ކެންޑިޑޭޓުން “ކޯނީ” ރިޕޯޓުގެ ވާހަކަ ދެއްކެވި ނަމަވެސް، އެ ރިޕޯޓު މިހާރު ކޮބައިތޯ ސުވާލު ކުރައްވައިފައެވެ.
އެ މަނިކުފާނު ވިދާޅުވީ، “ކޯނީ” ރިޕޯޓެއް މިހާރަކު ނެތް ކަމަށެވެ. އަދި އެ ރިޕޯޓު ވީތަނެއް ހޯދަން އެ މައްސަލަ ފުލުހަށް ހުށަޅާފައިވާނެ ކަމަށްވެސް އެމަނިކުފާނު ވިދާޅުވިއެވެ.
“ޑިބޭޓުގެ ކޮންމެ ވެސް ބޭފުޅަކު ވިދާޅުވި، ކޯނީ ރިޕޯޓެއްގެ ވާހަކަ. މިހާރު އެ އޮތްތޯ ބައްލަވާ. އެ ވީތަނެއް ނޭނގޭ މިހާރަކު. އެ މައްސަލަ ބަލަންއަޅުގަނޑުމެން މިހާރު ވާނީ ފުލުހަށް ހުށަހަޅާފައި. މިއީ ދައުލަތުގެ ކޮންކަހަލަ ބޮޑު ސިއްރެއްތޯ؟ މިއަދަކު އެޔެއް ނެތް،” އެ މަނިކުފާނު ވިދާޅުވިއެވެ.
އިތުރަށް ރައީސް ވިދާޅުވީ، ދައުލަތުގެ އެ ފަދަ ސިއްރުތައް ވީތަނެއް ނޭނގޭއިރު، މިއަދު އިންތިޚާބަށް ނުކުންނަވައިގެން ތިއްބެވި ކެންޑިޑޭޓުންނާ މެދު ރައްޔިތުން ވަރަށް ބޮޑަށް ވިސްނާ ފިކުރުކުރަން ޖެހޭ ކަމަށެވެ.
