ކޮންޓެއިނަރ ޕާރކްގެ ކޯ ވޮރކިންގ ސްޕޭސް މިއަދު ރަސްމީކޮށް ހުޅުވައިފިއެވެ.
ކޮންޓެއިނަރ ޕާރކް އަކީ މިނިސްޓްރީ އޮފް އިކޮނޮމިކް ދިވަލޮޕްމެންޓް، ބިޒްނަސް ސެންޓަރ ކޯޕަރޭޝަން އަދި އަރބަންކޯ ގުޅިގެން ކުރިއަށް ގެންދާމަޝްރޫއެކެވެ. މިއީ ހުޅުމާލެ ޒަމާނީ “އަރބަން” ސިޓީއެއްގެ ގޮތުގައި ތަރައްގީކުރުމަށް އަރބަންކޯއިން ކުރިއަށްގެންދާ މަޝްރޫއުތަކުގެ ތެރެއިން އެއްމަޝްރޫއެވެ.
އަރބަންކޯ އިން ބުނާ ގޮތުގައި މި ކޮންޓެއިނަރ ޕާކަކީ ޒަމާނީ އަދި “އާޓިސްޓިކް” ޕްލޭނެއްގެ ދަށުން، ހުޅުމާލެއަށް އިތުރު ފުރިހަމަކަމެއް ގެނެސްދޭނެގޮތަކަށް ތައްޔާރުކޮށްފައިވާ ތަނެކެވެ. މިއަދު ކޯ ވޮރކިންގް ސްޕޭސް ހުޅުވިގެންދާއިރު، ވަރަށް އަވަސް މުސްތަގްބަލެއްގައި މިތަނުގައި ޓޭކްއަވޭ ކެފޭ އަކާއި،ފާސްޓް ފުޑް އައުޓްލެޓް އަދި މީޓިން ރޫމެއް ހެދި، މި ސަރަހައްދުގެ އޯޕަން އޭރިއާ އާންމުންނަށް އެއްވެ އުޅެވޭ ޕާކެއްގެ ގޮތުގައި ތަރައްގީކުރެވިގެންދާނެއެވެ.
މީގެ އިތުރުން މި ކޯ ވޮރކިންގ ސްޕޭސް މެދުވެރިކޮށް ހުޅުމާލޭގައި އަލަށް ވިޔަފާރިތައް ފަށާ ފަރާތްތަކަށާއި، އެފަދަ ފުރުސަތުތައް ބޭނުންވާ މީހުންނާއި،ގްރޫޕްތަކަށް އެ ފުރުސަތު ފަހިކޮށްދެވިގެންދާނެއެވެ. އަދި މި ކޯ ވޮރކިންގ ސްޕޭސް ދެވިގެންދާނީ ފުރަތަމަ މަހު ހިލޭ ކަމަށްވެސް އަރބަންކޯ
އިން މަޢުލޫމާތުދެއެވެ. އަދި މި ސްޕޭސް އަށް އޮންލައިން ޕޯރޓަލްއެއް މެދުވެރިކޮށް ބުކްކޮށްލެވޭނެ ގޮތްވެސް ހަމަޖެހިގެނަދާނެ ކަމަށާއި، ކޯ ވޮރކިންގސްޕޭސް ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9 ން އިރުއޮއްސި 6 އަށް ހުޅުވިފައިވާނެއެވެ.
އަރބަންކޯއިން ބުނާ ގޮތުގައު މި ކޮންޓެއިނަރ ޕާކުގެ މައިގަނޑު މަގްސަދަކީ ލައިވްލީ އަދި ކޮމިއުނިޓީ އެންގޭޖިންގ މާހައުލެއް ބިނާކުރުމެވެ. އަދި މީގެއިތުރުން އާޓިސްޓުންނަށް ވެސް ފުރުސަތު ލިބިގެންދާނެ ފަދަ ހަބެއް ތައްޔާރުކުރުމެވެ. މި ޕާކް މެދުވެރިކޮށް ހުޅުމާލޭގެ ގިނަ ޒުވާނުންތަކަކަށް ބޮޑުކުރިއެރުމެއް ލިބިގެންދާނެ ކަމަށްވެސްއަރބަންކޯއިން ބުނެއެވެ.
