ރިޔާސީ އިންތިހާބުގައި ވީހާވެސް އަވަހަށް ނިކުމެ ވޯޓު ލެއްވުމަށް ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު އިލްތިމާސްކުރައްވައިފިއެވެ.
މުއިއްޒު މިކަމަށް އެދިވަޑައިގަތީ މިއަދު އިންތިހާބުގައި ވޯޓުލެއްވުމަށްފަހު ނޫސްވެރިންނަށް މައުލޫމާތު ދެއްވަމުންނެވެ. މުއިއްޒު ވިދާޅުވީ ވޯޓުލުމަށް އަވަހަށް ނިކުމެ އެ ބޭފުޅެއްގެ ގާނޫނީ ޒިންމާ އަދާކުރެއްވުމަށް އެދިވަޑައިގަންނަވާ ކަމަށެވެ.
“އެ ބޭފުޅަކު އިހުތިޔާރު ކުރާ ކެންޑިޑޭޓަކަށް ވޯޓުލުމަކީ ގާނޫނީ ގޮތުން އެބޭފުޅެއްގެ ވާޖިބެއް،” މުއިއްޒު ވިދާޅުވިއެވެ.
މުއިއްޒު ވޯޓު ލެއްވީ ތާޖުއްދީން ސްކޫލުގައި ހުރި ވޯޓު ފޮށްޓަކަށް މިއަދު 9:15 ހާއިރުއެވެ. ޕީޕީއެމް ޕީއެންސީ ރިޔާސީ ކެންޑިޑޭޓްގެ ރަނިންމޭޓް ހުސައިންމުހައްމަދު ލަތީފް ވެސް މިހާރު ވަނީ ވޯޓުލައްވާފައެވެ.
ވޯޓުލުން ކުރިއަށްދާނީ މިއަދު ހެނދުނު 8:00 އިން ހަވީރު 4:00 އަށެވެ.
