މި މަހުގެ 30 ގައި ބާއްވާ ރިޔާސީ އިންތިހާބުގެ ދެވަނަ ބުރަށް ޖޭޕީގެ ލީޑަރު ގާސިމް އިބްރާހިމްގެ އެހީތެރިކަން ހޯދުމުގެ މަޝްވަރާތައް އެމްޑީޕީގެ ރިޔާސީކެންޑިޑޭޓް ރައީސް އިބްރާހިމް މުހައްމަދު ސޯލިހު ގެންދަވާ 12 ގަޑިއިރު ވެއްޖެއެވެ.
މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި 5،460 ވޯޓު ލިބިވަޑައިގެންނެވި ގާސިމްގެ އެހީތެރިކަން ދެ ވަނަ ބުރުގައި ހޯއްދެވުމުގެމަޝްވަރާ އަށް ރައީސް ސަން އައިލެންޑަށް ވަޑައިގަތީ އިއްޔެގެ ހަވީރު ފަހެއް ޖަހާކަންހާއިރެވެ.
އޭގެ ފަހުން މިހާތަނަށް މަޝްވަރާތަކުގައި 12 ވަރަކަށް ގަޑިއިރު ދެ ބޭފުޅުން ހޭދަކުރައްވާފައިވާ ކަމަށް ސަން އައިލެންޑްގައި ހުންނެވި ޖޭޕީގެ މެމްބަރަކު ވިދާޅުވިއެވެ.
އެނގިފައިވާ ގޮތުގައި ރައީސާއި ގާސިމްގެ މަޝްވަރާތަކުގައި ބައިވެރި ކުރައްވަނީ ގާސިމްގެ އަރިސް ބޭފުޅުންގެ ތެރެއިން ކުރީގެ ޓޫރިޒަމް މިނިސްޓަރު އަލީވަހީދާއި ވިޔަފާރިވެރިޔާ އަދި ގާތް އެކުވެރިޔާ އިސްމާއިލް ޝުޖާއު (އިންމަ)އެވެ.
ގާސިމް މިއަދު ހެނދުނު ވަނީ ޖޭޕީގެ ލީޑަޝިޕްގެ ބައެއް އިސްވެރިން ސަން އައިލެންޑަށް ގެންދަވައިފައެވެ. އޭގެ ތެރޭގައި ހިމެނިވަޑައިގަންނަވަނީ ޑެޕިއުޓީ ލީޑަރުއަމީން އިބްރާހިމާއި ކެންދޫ ދާއިރާގެ މެމްބަރު އަލީ ހުސައިނާއި އެޑްވައިޒަރު އިރުތިޝާމް އާދަމެވެ.
އެހެން ބައެއް ވެރިން އިއްޔެ އާއި މިއަދު ވެސް ސަން އައިލެންޑްގައި އެބައތިއްބެވިއެވެ. އޭގެ ތެރޭގައި އެޑްވައިޒަރުން ކަމަށްވާ އަހުމަދު ނިހާނާއި ރިޔާޒް ރަޝީދާއި ކުރީގެ މެމްބަރު އަލީ ޝާހާއި ކުރީގެ މެމްބަރު އަބްދުﷲ އަހުމަދު (އަބުޅޯ) ފަދަ ބޭފުޅުން ހިމެނެއެވެ.
ރައީސްގެ އަރިހުގައި ވަޑައިގަތް ބޭފުޅުންގެ ތެރޭގައި އެ މަނިކުފާނުގެ ރަނިންމޭޓް މުހައްމަދު އަސްލަމާއި ފޮރިން މިނިސްޓަރު އަބްދުﷲ ޝާހިދާއި ރައީސްއޮފީހުގެ ޗީފް އޮފް ސްޓާފް އަދި އަދާލަތު ޕާޓީގެ އިސް މެމްބަރު އަލީ ޒާހިރު ހިމެނިވަޑައިގަންނަވައެވެ.
އެންމެ ގިނަ ވޯޓާ އެކު ދެވަނަ ބުރަށް ދެން ދަތުރުކުރެއްވި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ހާއްސަ ޓީމެއްވެސް މީގެ ދެދުވަސް ކުރިން ސަން އައިލެންޑްގައި ގާސިމާ އެކު ކޯލިޝަން ހެދުމުގެ މަޝްވަރާތައް ކުރިއެވެ.
