ބޭންކް އޮފް މޯލްޑިވްސް (ބީއެމްއެލް)އިން ބޯހިޔާވަހިކަމަށް އަލަށް ތައާރަފުކުރި އާ ލޯނާއި ފައިނޭންސިންގެ ދަށުން ރަހުނަކާނުލައި އެއް މިލިއަން ރުފިޔާގެ ލޯން ސްކީމެއް ތައާރަފުކޮށްފިއެވެ.
އެ ކުންފުނިން ބުނީ މިއީ ގެދޮރު އިމާރާތްކުރުމާއި މަރާމާތުކުރުމަށް ކަސްޓަމަރުންގެ އޮތް ޑިމާންޑަށް ބަލައި ތައާރަފުކުރި ލޯނު ސްކީމްތަކެއް ކަމަށެވެ.
އެ ގޮތުން ދެ ޕްރޮޑަކްޓެއް ތައާރަފުކޮށްފައިވާކަން ބީއެމްއެލުން ވަނީ ފާހަގަކޮށްފައެވެ. އެއީ:
ހޯމް ބިލްޑް ލޯނު
ބީއެމްއެލުން ބުނީ އަލަށް ތައާރަފުކުރި މި ލޯނު ފަރުމާކޮށްފައިވަނީ އެއްވެސް ރަހުނަކާނުލައި އެއް މިލިއަން ރުފިޔާއާ ހަމައަށް އަމިއްލަ ފަރުދުންނަށް ލޯނު ނެގޭ ގޮތަށް ކަމަށެވެ. އަދި، ލޯނު އަނބުރާ ދެއްކުމަށް 15 އަހަރުގެ މުއަދަތެއް ލިބޭނެކަން ވެސް އެ ބޭންކުން ވަނީ ފާހަގަކޮށްފައެވެ.
މިއީ ގެދޮރު މަރާމާތު ކުރުމަށާއި، ރާއްޖޭގެ ކޮންމެ ސަރަހައްދެއްގައި ވެސް ގެދޮރު އެޅުމަށް އެކަށީގެންވާ ލޯނެއް ކަމަށް ވެސް އެ ބޭންކުން ބުނެއެވެ.
ހޯމް އިކުއިޓީ ލޯނު
ކުރިން ހޯމް ލޯނާއި ފައިނޭންސިން ނަގާފައިވާ ކަސްޓަމަރުންނަށް އަމާޒުކޮށް ބޭންކުން ހޯމް އިކުއިޓީ ލޯނު ތައާރަފުކޮށްފައިވާ ކަމަށް ވެސް ބީއެމްއެލުން ބުނެފައިވެއެވެ. އަދި، މި ލޯނު މެދުވެރިކޮށް ކަސްޓަމަރުން ކުރިން ނަގާފައިވާ ލޯނަށް ފައިސާ ދައްކާފައިވާ މިންވަރާ ހަމައަށް ލޯނު ދޫކުރެވޭނެ ކަމަށް ބީއެމްއެލުން ބުނެއެވެ.
އެ ބޭންކުން ބުނީ މި ލޯނަކީ 50،000 ރުފިޔާއަށް ވުރެ މަތީ އަދަދަކުން ލޯނު ނަގާ މީހުންނަށް ދޫކުރާ ލޯނެއް ކަމަށެވެ. މި ލޯނު އަނބުރާ ދައްކަން 20 އަހަރުގެ މުއްދަތެއް ލިބޭނެ ކަމަށް އެ ބޭންކުން ވަނީ ބުނެފައެވެ.
މި ކަމާ ގުޅޭ ގޮތުން ބީއެމްއެލްގެ ޑައިރެކްޓާ އޮފް ރީޓެއިލް އެންޑް އެސްއެމްއީ ބޭންކިން މޫސާ ނިމާލް ވިދާޅުވީ މިއީ ބީއެމްއެލްގެ ކަސްޓަމަރުންނަށް ފައިނޭންސިން ލިބޭނެ ގޮތް ފަހިކޮށްދިނުމަށް ހުޅުވާލި ފުރުސަތެއް ކަމަށެވެ.
“މިއީ މުޅި ރާއްޖޭގައި ތިބި އަޅުގަނޑުމެންގެ ކަސްޓަމަރުންނަށް ފަސޭހަކަމާ އެކު ފައިނޭންސިން ލިބޭނެގޮތް މަގުފަހިކޮށްދިނުމަށް ތައާރަފުކުރި ޕްރޮޑަކްޓްތަކެއް،” އޭނާ ވިދާޅުވިއެވެ.
“އަލަށް ތައާރަފުކުރި ހޯމް ބިލްޑް ލޯނު ނަގަން އިތުރު ރަހުނެއް ބޭނުންނުވާއިރު، ކަސްޓަމަރުންނަށް މިހާރުގެ މާކެޓްގައި އެންމެ ރަނގަޅު އަގުގައި ގެދޮރު ހެދުމާއި މަރާމަތުގެ މަސައްކަތް ކުރެވޭނެ. މި ދޫކުރާ ހޯމް އިކުއިޓީ ލޯނުން މިހާރު ހޯމް ފައިނޭންސިން ނަގާފައިވާ ކަސްޓަމަރުންނަށް 10 އިންސައްތަ ރޭޓުގައި ލޯނު ލިބޭނެ،”
އެ ބޭންކުގެ އިސްލާމިކް ކަސްޓަމަރުންނަށް ހޯމް ބިލްޑް ފައިނޭންސިން އަދި ހޯމް އިކުއިޓީ ފައިނޭންސިން ލިބޭނެކަން ވެސް އެ ބޭންކުން ފާހަގަކޮށްފައިވެއެވެ.
ބީއެމްއެލްއިންރައްޔިތުންގެބެންކަކަށްވާތީ ރައްޔިތުންނަށްއެހައިއޯގާތެރީ %3ވުރެބޮޑުނަމައެރައްޔިތުންފެލާލެވެނީއެވެ އޯގާތެރިކަމެއްނެތީއެވެ