މިއަދު ބޭއްވި އަތޮޅު ކައުންސިލްގެ ބައްދަލުވުމުގައި، ރައީސްކަމުން މުހައްމަދު ސިރާޖު ވަކިކުރުމަށް ހުށަހެޅީ ހިރިމަރަދޫ ކައުންސިލްގެ ރައީސް މުޙައްމަދު ވަހީދެވެ. މި ޖަލްސާގައި ވާހަކަ ދައްކަމުން ވަހީދު އިތުރަށް ވިދާޅުވީ މަގުބޫލް އުޒުރެއް ނެތި ވިދިވިދިގެން 7 ޖަލްސާއަށް ހާޒިރުނުވެއްޖެނަމަ އެ މެންބަރެއްގެ މެންބަރުކަމުން ވަކިވާނެ ކަމަށާއި، އަތޮޅު ކައުންސިލްގެ ރައީސް މުޙައްމަދު ސިރާޖް، ވިދިވިދިގެން އެ ކައުންސިލްގެ ޖަލްސާތަކުގައި ބައިވެރިނުވާތާ 7 މަހަށްވުރެ ގިނަ ދުވަސް ވަނީ ވެފައެވެ. އެކަމުގެ ސަބަބުން އަތޮޅު ކައުންސިލް ހިންގުމުގައި ބޮޑެތި ދަތިތަކެއް ވަނީ ކުރިމަތިވެފައެވެ. އެހެން ކަމުން ސިރާޖްގެ ގޮނޑި ގެއްލިއްޖެކަމަށް ކަނޑައަޅައި، ވީހާވެސް އަވަހަކަށް އަތޮޅު ރައީސެއް އިންތިހާބުކުރުމުގެ ކަންކަން ކުރިއަށްގެންދެވޭނެ ގޮތެއް ހޯދުމަށް އެލްޖީއޭއަށް ހުށަހެޅުމަށް އޭނާ ވަނީ އެދިފައެވެ.
މި ޖަލްސާގައި ބައިވެރިވި 10 މެމްބަރުންގެތެރެއިން 8 މެމްބަރުން ވަނީ ސިރާޖު މަޤާމުން ވަކިކުރުމަށް ވޯޓް ދީފައެވެ.
ނައިބް ރައީސްގެ މަޤާމްގެ މަސްއޫލިއްޔަތު އަދާކުރުމުގައި ބޮޑުތަނުން އިހުމާލުވެ، އަތޮޅު ކައުންސިލަށާއި، އަތޮޅުގެ ރައްޔިތުންގެ ޙައްޤުތަކަށް އިހުމާލުވަމުންދާ ކަމަށްބުނެ، އަތޮޅު ކައުންސިލްގެ ނައިބް ރައީސްގެ މަޤާމްގައި ހުރި އަބްދުއްސައްތާރު ޙަސަން ވެސް ވަނީ މި މަހުގެ 15 ވަނަ ދުވަހު އެ މަޤާމުން ވަކޮކޮށްފައެވެ. ސައްތާރަކީ ހަނިމާދޫ ކައުންސިލްގެ ރައީސްއެވެ.
