ހދ ހަނިމާދޫ ސްކޫލުގެ 2024-2025 ވަނަ އަހަރުގެ ޕްރިފެކްޓް ބޯޑާއި ސްޓޫޑެންޓް ކައުންސިލް އިފްތިތާޙް ކުރެއްވީ އެކަމަށް ޚާއްޞަ ރަސްމިއްޔާތެއްގައެވެ.
3 ސެޕްޓެންބަރ 2024 ވަނަ ދުވަހުގެ ރޭ ހަނިމާދޫ ސްކޫލްގެ އެދުރުބޭ މާލަމުގައި ބޭއްވުނު މި ރަސްމިއްޔާތު ޝަރަފުވެރި ކޮށްދެއްވީ ހަނިމާދޫ ކަސްޓަމްސްގެ ސީނިއަރ ކަސްޓަމް އޮފިސަރ އަލްފާޟިލް އަޙްމަދު ޙުސައިންފުޅެވެ.
މި ރަސްމިއްޔާތުގައި 64 ޕްރިފެކްޓް ދަރިވަރަކަށް ވަނީ ހުވާ ލައިދީފައެވެ. ހުވާ ލައިދެއްވީ ހަނިމާދޫ ސްކޫލުގެ އިސްލާމް މުދައްރިސް އިބްރާހީމް އަލީއެވެ.
ހަނިމާދު ސްކޫލްގައި 8 ކުލަބަކާއި 4 ހައުސްއެއް އޮވެއެވެ. ދީނީ ރޫހު، އަދަބީ ދިރުން، ކޯޑިންގް އެންޑް މީޑިއާ، ލިޓްރަރީ، ބިޒުނަސް، އިކޯ، ވޮކޭޝަނަލް،އަދި ސްޕޯޓްސް ކުލަބާއި ފާށަނާ، ހުރަވީ، ދޮށިމޭނާ އަދި ޣާޒީ ހައުސްއެވެ. މިއިން ކޮންމެ ކުލަބެއްގައި ރައީސް، ނައިބުރައީސް އަދި ސެކްރެޓަރީއަކު ހިމެނެއެވެ. ކޮންމެ ހައުސްއެއްގައި ކެޕްޓަން ، ވައިސް ކެޕްޓަން އަދި ސެކްރެޓަރީއަކު ހުރެއެވެ. މީގެ އިތުރުން ސްކައުޓް އަދި ކެޑޭޓް ތަމްސީލު ކުރުމަށްޓަކައި 2 ސްކައުޓަކާއި 2 ކެޑޭޓަކު ވަނީ އައްޔަން ކޮށްފައެވެ. ސްކޫލުގެ ކެޕްޓަން އެކްޓިވިޓީ ކެޕްޓަން އަދި 2 ވައިސް ކެޕްޓަނުންނާއި އެކު މުޅި ޖުމްލަ 43 ދަރިވަރުން ސްޓޫޑެންޓް ކައުންސިލްގައި ހިމެނެއެވެ.
ސްޓޫޑެންޓް ކައުންސިލަށް ކުދިން ހޮވިފައިވަނީ ވާދަވެރި އިންތިޚާބަކުންނެވެ. މި އިންތިހާބުގައި ވޯޓު ދިނުމުގެ ހައްޤު ގުރޭޑް 4 ކުން މަތީގެ ކޮންމެ ދަރިވަރަކަށް ލިބިފައިވެއެވެ.
2024-2025 ވަނަ އަހަރަށް ސްކޫލްގެ ކެޕްޓަން ކަމުގެ ފަޚުރުވެރި މަގާމަށް ހޮވިފައިވަނީ ގުރޭޑް 11 އޭ ގެ ދަރިވަރު މަރްޔަމް ޢިބާއެވެ. އެކްޓިވިޓީ ކެޕްޓަނަކަށް ހޮވިފައިވަނީ ޔޫޝައު ޝާމިން މުޙައްމަދުއެވެ. 2 ވައިސް ކެޕްޓަނުންގެ ގޮތުގައި އިންތިހާބުވެފައި ވަނީ ޝާޔާ އަޙްމަދު ރައޫފް އަދި އާޔަން އިބްރާހީމް ސަވާދުއެވެ.
މި ރަސްމިއްޔާތުގައި ޝަރަފްވެރި މެހެމާންވަނީ ދަރިވަރުންނާ މުޚާތަބު ކުރައްވައި ހަވާލު ކުރެވިގެންދިޔަ މަގާމުތަކުގެ މަސްއޫލިއްޔަތު އޭގެ ފުރިހަމަ މާނައިގައި އުފުއްލެވުމަށް ނަސޭހަތްތެރިވެފައެވެ. ސުކޫލުގެ މާހައުލާއި ސުކޫލުން ބޭރުގައިވެސް ލީޑާރޝިޕް ދެއްކެވުމަށް ވަނީ ނަސޭހަތްތެރިވެފައެވެ.
މި ރަސްމިއްޔާތުގައި ސުކޫލްގެ ޕުރިންސިޕަލް ވަނީ ލީޑަރޝިޕަކީ ކޮބައިކަމާ ބެހޭގޮތުން ކުދިންނާ މުޚާޠަބް ކުރައްވާފައެވެ. އަދި މި ރަސްމިއްޔާތުގައި ހަނިމާދޫ ސްކޫލުގެ މަލްޓިޕާޕަސް ހޯލުގެނަން “އެދުރުބޭ މާލަން”ނަމުން ނަން ދެވިފައިވާކަން ޕުރިންސިޕަލް ވަނީ އިޢުލާން ކޮއްދެއްވާފައެވެ.
