ހދ. ހަނިމާދޫ ކައުންސިލުން އެ ކައުންސިލްގެ ތަޖުރިބާ ދަތުރަށް ކަނޑައަޅާފައިވާ ބަޖެޓް އުނިކޮށް، އެ ފައިސާ ހަނިމާދޫ ސްކޫލްގެ ގްރޭޑް 12 ދަރިވަރުންގެ ތަޖުރިބާ ދަތުރަށް ދިނުމަށް ނިންމައިފިއެވެ.
ހަނިމާދޫ ކައުންސިލްގެ 4 ވަނަ ދައުރުގެ 158 ވަނަ އާންމު ބައްދަލުވުމުގައި މި ނިންމުން ނިންމާފައިވަނީ 4 މެންބަރުންގެ އަޣުލަބިއްޔަތުންނެވެ. މި ނިންމުމާ އެކު، ކައުންސިލްގެ ކައުންސިލަރުންނާއި މުވައްޒަފުންގެ ތަޖުރިބާ ދަތުރަށް ކަނޑައަޅާފައިވާ 176،805 ރުފިޔާ، ހަނިމާދޫ ސްކޫލްގެ ދަރިވަރުންގެ ތަޖުރިބާ ދަތުރަށާއި އިތުރު ހަރަކާތްތަކަށް ހަރަދުކުރުމަށް ހަވާލުކުރެވޭނެއެވެ.
ހަނިމާދޫ ސްކޫލުން މި ފައިސާއަށް އެދިފައިވަނީ ގްރޭޑް 12ގެ ދަރިވަރުންނަށް އިތުރު ތަޖުރިބާ ހޯދައިދިނުމަށް ކުރާ ދަތުރުގެ ހަރަދުތައް ހަމަޖެއްސުމަށެވެ. ކައުންސިލުން މި ނިންމުން ނިންމާފައިވަނީ ހަނިމާދޫގައި ތައުލީމީ ނިޒާމު ރަނގަޅުކޮށް ހަރުދަނާކުރުމުގެ އަމާޒުގައެވެ.
މި ނިންމުމަކީ ދަރިވަރުންގެ ތައުލީމީ ކުރިއެރުމަށް އިސްކަންދީ، ރަށުގެ ކުރިމަގު އުޖާލާކުރުމަށް ކައުންސިލުން އަޅާފައިވާ މުހިންމު ފިޔަވަޅެއް ކަމުގައި ބެލެވެއެވެ. މި ނިންމުމުގެ ސަބަބުން ހަނިމާދޫ ސްކޫލްގެ ދަރިވަރުންނަށް އިތުރު ފުރުސަތުތަކެއް ހުޅުވިގެންދާނެ ކަމަށް އުންމީދުކުރެވެއެވެ.
