ހަނިމާދޫ އިންޓަރނޭޝަނަލް އެއަޕޯޓްގެ ފަސިންޖަރ ޓާމިނަލްގެ މަސައްކަތް ބާރު ދުވެލީގައި ކުރިއަށްދާކަމަށާއި، މުޅި މަޝްރޫޢުގެ މަސައްކަތް ނިންމާ އަންނަ އަހަރު އެ އެއާޕޯޓުން ޚިދުމަތް ދޭން ފަށަނެކަމަށް ރީޖަނަލް އެއަޕޯޓްސް ކޮމްޕެނީ (އާރްއޭސީއެލް)އިން ބުނެފިއެވެ.
ޕީއެސްއެމްގެ ޕްރޮގްރާމެއްގައި ހަނިމާދޫ އެއާޕޯޓާއި ގުޅޭ މައުލޫމާތު ދެއްވަމުން ރީޖަނަލް އެއަރޕޯޓްސް ކުންފުނީގެ މެނޭޖިން ޑިރެކްޓަރ އަހުމަދު މުބީން ވިދާޅުވީ އެއަޕޯޓް މަޝްރޫއުގެ 77 އިންސައްތަ މަސައްކަތް މިހާރު ނިމިފައިވާކަމަށާއި މިވަގުތު ކުރިއަށްދަނީ ފަސިންޖަރ ޓާމިނަލްގެ މަސައްކަތްކަމަށެވެ.
އޭނާ ވިދާޅުވީ މި މަޝްރޫޢުގެ ދަށުން ތަރައްގީކުރާ އެއާޕޯޓުގެ ކާގޯ ޓާމިނަލުގެ މަސައްކަތުގެ ވެސް 90 އިންސައްތަ މަސައްކަތް ނިންމާފައިވާކަމަށާއި، އެއަރޕޯޓް ޓަވަރުގެ 88 އިންސައްތަ މަސައްކަތް ނިންމިފައިވާކަމަށެވެ. އަދި ބައެއް ސަބަބުތަކާ ހުރެ މަސައްކަތްތަކަށް ލަސްތަކެއް އައިނަމަވެސް، މުޅި މަޝްރޫޢުގެ މަސައްކަތް އަންނަ އަހަރުގެ މެދުތެރޭގައި ނިންމައި، ހުޅުވޭވަރު ވާނެކަމަށް އޭނާ ވިދާޅުވިއެވެ.
ހަނިމާދޫ އިންޓަރނޭޝަނަލް އެއަރޕޯޓު މަޝްރޫޢަކީ މުޅި އުތުރުގެ ފަތުރުވެރިކަމާއި ގުޅިފައިވާ ބޮޑުތިލަދުންމަތީގެ އިޤްތިޞާދާއި ސީދާ ގުޅިފައިވާ މަޝްރޫޢެކެވެ. މިމަޝްރޫޢުގެ މަސައްކަތް ފެށީ މިދިޔަ އަހަރުގެ ޖެނުއަރީ މަހުގެ ތެރޭގައެވެ. މި މަޝްރޫއުގެ ދަށުން ތަރައްޤީކުރި 2465 މީޓަރުގެ ދިގު ރަންވޭ މަސައްކަތް މިހާރު ވަނީ ނިންމާފައެވެ.
މި އެއަރޕޯޓް ތަރައްޤީކުރަނީ އަހަރަކު 1.3 މިލިއަން ފަތުރުވެރިންނަށް ޚިދުމަތް ދެވޭ ފެންވަރަށެވެ.
