ފެށުނުހިނދު އާއަހަރުގައި
ޢަބްދުއްލަޠީފް އިބްރާހީމް ވައިޖެހޭގެ ހއ.އުތީމު
އާކުރޭ އުއްމީދު މަތިވެރި، ފެށުުނު ހިނދު އާއަހަރުގައި
ދޫކުރޭ ނަފުސުގެ ބޮޑައިކަން، ހެޔޮހިތުން އީމާނުގައި
ވޭތުވީ އަހަރުން ލިބުނު، ޢިބްރަތް ތަކަށް ވިސްނާލަމުން
ގާތުގައިވާ މަޙްޝަރަށް، ކުރަމާ ދަތުރު މާތް ޢަޒުމުގައި
ދުނިޔެވީހާ ދަޅަތަކުން، ދުރުހެލި ވެގެން ހުރިހާ ކަތުން
އުނި ކަމެއްނެތް ޖަންނަތުން ، ހޯދާހިޔާ ހެޔޮ ޢަމަލުގައި
އެއްލަމުން ޞަފްޙާ އަލުން، ކަންކަން ދިރާސާ ކޮށްލަމުން
ގެއްލިގެން ނުމެދާނެ ހެންވީ، މަގު ހިނގާށޭ އަބަދުގަައި
ދޫނުކޮށް ގަދަ ހިތްވަރާއެކު، ކަންކަމަށް ކެރި ޖާނުދީ
ހޫނުލޭ ދައުރާނަ ވާހިނދު، ވާށެ ޤުރުބާން ޖޯޝުގައިި
ރޫޙު ޤައުމީ ދިރުވަމާހޭ؟ ނެރެކަށިން ހިތްވަރު އަލުން
ފޫހިކަންނެތި ކަމަރު ބަނދެލާ، ތެދުވެ ޤައުމުގެ ޙައްޤުގައި
އަތުގުޅާލާ އެއްސަފެއްގައި، ރިވެތި ޚުލްޤެއް ދައްކަމުން
ހިތުގެ ޚާލިޞް ލޯބިދީ، ޚިދުމަތް ކުރާށޭ އުފަލުގައިި
01/01/2021