ހަނިމާދޫ އިންޓަނޭޝަނަލް އެެއާޕޯޓް ތަރައްގީކޮށް، ރަސްމީކޮށް ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ މި އެއާޕޯޓަކީ ބޮޑު ތިލަދުންމަތީގެ ހުރިހާ ރައްޔިތުންގެ ތަރައްގީގެ ދޮރާށި ކަމަށާއި މިއީ އިންޓަގްރޭޓެޑް ޑިވެލޮޕްމަންޓް ޒޯނެއްގެ ގޮތުގައި އުތުރުގެ އަތޮޅުތައް ތަރައްގީކުރުމަށް އެންމެ މުހިންމު އެއް ވަސީލަތް ކަމަށެވެ.
މި އެއާޕޯޓާއެކު އުތުރުގެ ފަތުރުވެރިކަމާއި މަސްވެރިކަމާއި ދަނޑުވެރިކަމާއި އިގްތިސާދީ ހުރިހާ ދާއިރާއަކުންނާއި އިޖުތިމާޢީ ގޮތުންވެސް ތަރައްގީއާއި ކުރިއެރުން ހޯދުމަށް މަގުފަހިވެގެންދާނެ ކަމަށް ރައީސް ވިދާޅުވި އެވެ.
“މި ދޮރާއްޓަކީ ރާއްޖޭގެ ތަރައްގީ ދެމެހެއްޓެނިވި ގޮތެއްގައި އަދި ހަލުވި މިނުގައި ހާސިލްކުރުމުގެ ވަރަށް މުހިންމު ވަސީލަތެއް. މި ރަށާއި މި އަތޮޅާއި ބޮޑު ތިލަދުންމަތީގެ ހުރިހާ ރައްޔިތުންނަށް މި ލިބިގެންދާ ފުރުސަތު އަޅުގަނޑު އެދެނީ ވަރަށް ފުޅާމިނުގައި އަޅުގަނޑުމެން ބަލައިގަނެ، އޭގެ ބޭނުން ހިފަން ފަށަން،” ރައީސް ވިދާޅުވި އެވެ.
ބޮޑުތިލަދުންމަތީގައި ފަތުރުވެރިކަން އެކަށީގެންވާ މިންވަރެއްގައި ނެތްކަން ފާހަގަކުރައްވަމުން ރައީސް ވަނީ މި ސަރަހައްދުގައި ފަތުރުވެރިކަން ކުރިއަރުވަން ސަރުކާރުން ހާއްސަ އިސްކަމެއްދީގެން ކަންތައްތަކެއް ކުރަމުންދާ ކަމަށް ވިދާޅުވެފަ އެވެ. އަދި މި ސަރަހައްދުގެ އަތޮޅުތަކުގައި ފަތުރުވެރިކަން ކުރިއެރުވުމުގައި މި އެއާޕޯޓު މުހިއްމު ދައުރެއް އަދާކުރާނެ ކަމަށްވެސް ރައީސް ވިދާޅުވި އެވެ.
“އަޅުގަނޑު އެދެން އެންމެ ފުޅާ މިނުގައި ރާއްޖޭގެ ކުދި، ބޮޑު، މެދުފަންތީގެ ހުރިހާ ވިޔަފާރިވެރިން މި ސަރަހައްދަން ވަޑައިގަންނަވަން. މި ސަރަހައްދުގައި އިންވެސްޓް ކުރައްވަން. މި އޮޕޮޗުނިޓީގެ ބޭނުން ހިއްޕަވަން. މިއީ ވަރަށް ބޮޑު ރަނުގެ ފުރުސަތެއް،” ރައީސް ވިދާޅުވި އެވެ.
ރައީސް ވަނީ ބޮޑުތިލަދުންމަތީގައި ހުރިހާ ދާއިރާއަކުން ވެސް ފުރުސަތުތައް އެބައޮތް ކަމަށާއި ސަރުކާރުން އޮތީ ހުރިހާ ގޮތަކުން ކަންކަން ފަހިކޮށްދިނުމަށް ހުރިހާ ކަމެއް ކޮށްދިނުމަށް ތައްޔާރަށް ކަމަށްވެސް ވިދާޅުވެފަ އެވެ.
