ހޮންކޮންގެ އެތައް އުސް އިމާރާތެއްގައި ރޯވެ އަނދަމުންދާ އަލިފާނުގެ ސަބަބުން މަރުވި މީހުންގެ އަދަދު 36 އަރައިފިއެވެ.
އަލިފާނުގެ ސަބަބުން އަނިޔާވި މީހުންގެ އަދަދު 279 އަށް އަރާފައެވެ.
އަލިފާން ރޯވެ އަނދަމުންދަނީ ހޮންކޮންގެ ޓައި ޕޯ އަވަށުގައި ހުރި އާންމުން ދިރިއުޅޭ އެޕާޓްމަންޓްތައް ހުންނަ އުސް ޓަވަރުތަކުގައެވެ.
މި ޓަވަރުތަކުގައި ގާތްގަނޑަކަށް 2،000 ވަރަކަށް އެޕާޓްމަންޓް ހުންނަ ކަމަށް ވެއެވެ.
އަލިފާން ރޯވިތާ ދިހަ ގަޑިއިރު ވެގެން ދިޔައިރުވެސް، އަލިފާން ކޮންޓްރޯލް ނުވާ ކަމަށް، ރިޕޯޓްތައް ބުނެއެވެ.
އިމާރާތްތަކުން އަލިފާނާއި ބޯ ދުން އަދިވެސް އަރަމުންދާއިރު، މީހުން ސަލާމަތްކުރާ ޓީމުތަކުން ގެންދަނީ މީހުން ސަލާމަތް ކުރުމުގެ މަސައްކަތް ކުރަމުންނެވެ.
މިއީ، ވޭތުވެދިޔަ 30 އަހަރުގެ ތެރޭގައި ހޮންކޮންގައި ހިނގި އެންމެ ގެއްލުން ބޮޑު އަދި އެންމެ ވަރުގަދަ އަލިފާނުގެ ހާދިސާއަށް ވަނީ ވެފައެވެ.
ޓަވަރުތަކުގައި އަލިފާން ރޯވާން ދިމާވީ ކީއްވެގެން ކަމެއް އަދި ސާފު ނުވާކަމަށް ޚަބަރުތައް ބުނެއެވެ. އެކަމަކު، މިއީ ޓަވަރުތަކުގެ ބޭރުގައި ޖަހާފައިވާ އޮނު ފްރޭމްތަކުގެ ސަބަބުން ދިމާވި ކަމެއް ކަމުގެ ޝައްކުތައްވަނީ އުފެދިފައެވެ.
ހޮންކޮންގެ ލީޑަރ ޖޯން ލީ ވިދާޅުވީ، މިވަގުތަށް އެންމެ އިސްކަން ދެނީ އަލިފާން ކޮންޓްރޯލްކޮށް، މަތީ ފްލޯތަކުގައި ތާށިވެފައިވާ މީހުން ސަލާމަތް ކުރުން ކަމަށެވެ. ތަހްގީގު ފަށާނީ އޭގެ ފަހުން ކަމަށް ވިދާޅުވިއެވެ.
ޗައިނާގެ ރައީސް ޝީ ޖިންޕިންވަނީ، އެންމެ ނުކުމެ އަލިފާން ނިއްވަން މަސައްކަތްކޮށް އަދި ގެއްލުން ލިބޭ މީހުންގެ ނިސްބަތް މަދުކުރަން ކަމާބެހޭ ހުރިހާ ފަރާތްތަކަށް ގޮވާލައްވާފައެވެ.
