އިންޑިއާއާއެކު އޮތް ގުޅުން އިތުރަށް ވަރުގަދަކުރަން ރާއްޖެއިން ބޭނުންވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އިންޑިއާގެ ޖުމްހޫރީ ދުވަހާއި ގުޅިގެން އިންޑިއާގެ ރައީސް ޝްރީ ޑްރައުޕަދީ މުރްމު އަށާއި، ބޮޑުވަޒީރު ނަރެންދުރަ މޯދީ ގެ އިތުރުން، އިންޑިއާގެ ރައްޔިތުންނަށް އެކްސްގައި މެދުވެރިކޮށް ފޮނުއްވި މެސެޖެއްގައި ރައީސް ވިދާޅުވީ މިއީ މިނިވަންކަމާއި، ޑިމޮކްރަސީ އަދި ހެޔޮވެރިކަމުގެ އަސާސްތައް ނެގެހެއްޓުމަށް އިންޑިއާގެ ރައްޔިތުން ކުރަމުންދާ މަސައްކަތާއި، އެކަންކަމަށް ދޭ އަހައްމިއްޔަތުކަން ރަމްޒުކޮށްދޭ މުހިންމު ދުވަހެއް ކަމަށެވެ.
ދެ ޤައުމުގެ ރައްޔިތުންގެ ލާބައާއި މަންފާއަށްޓަކައި، ރާއްޖެއާއި އިންޑިއާއާ ދެމެދު އޮތް ޒަމާންވީ ބަދަހި ގުޅުން އިތުރަށް ހަރުދަނާކުރުމަށްޓަކައި ގުޅިގެން މަސައްކަތްކުރުމުގައި ރާއްޖެ ދެމި އޮންނާނެ ކަމަށްވެސް ރައީސް ވިދާޅުވި އެވެ.
އިންޑިއާގެ ޖުމްހޫރީ ދުވަސް ފާހަގަކުރަނީ 26 ޖަނަވަރީ 1950 ވަނަ އަހަރު އިންޑިޔާއިން އަލަށް އެކުލަވާލި އެޤައުމުގެ ޤާނޫނުއަސާސީ ވުޖޫދުވެ އިނގިރޭސީންގެ އިސްތިޢުމާރުގެ ދަށުން މިނިވަންވެ މުސްތަޤިއްލު ދަޢުލަތެއްގެ ގޮތުގައި ޖުމްހޫރީ ވެރިކަމެއް ޤާއިމުވެގެން ދިޔަ ތާރީޚީ މުނާސަބަތާ ގުޅުވައިގެންނެވެ.
