ކީރިތި ގުރުއާނުގެ އިލްމަށް ދަރިވަރުންގެ ހިތްތަކުގައި ލޯބިޖައްސުވައި، ގުރުއާނުގެ ޢިލްމަށް ދަރިވަރުން ޝައުޤުވެރިކުރުވުމަށް އެސްއެސްސީ އިމްތިހާނުގެ މާއްދާއެއްގެ ގޮތުގައި ގުރުއާން މާއްދާ ހިމެނުމަށް ނިންމައިފި އެވެ.
މިގޮތަށް ނިންމާފައިވާކަން ހާމަކުރެއްވީ ދިރާސީ އައު އަހަރުގެ ކިޔެވުން ފެށުމާ ގުޅިގެން ތަޢުލީމީ ވަޒީރު ޑރ. އިސްމާޢީލް ޝަފީޢު ދެއްވި ޚިޠާބުގައެވެ.
ތަޢުލީމީ ވަޒީރު ޑރ. އިސްމާޢީލް ޝަފީއު ވިދާޅުވީ ކީރިތި ޤުރުއާނުގެ ޢިލްމަށް ދަރިވަރުންގެ ހިތްތަކުގައި ލޯބިޖައްސުވައި، ޤުރުއާނުގެ ޢިލްމަށް ދަރިވަރުން ޝައުޤުވެރިކުރުވުމުގެ މަޤްޞަދުގައި، ޤައުމީ ފެންވަރުގައި ބާއްވާ، އެސް،އެސް،ސީ އިމްތިހާނުގެ މާއްދާއެއްގެ ގޮތުގައި ޤުރުއާން މާއްދާ ހިމެނުމުގެ މަސައްކަތް މިއަހަރު ޕައިލެޓުކުރެވޭނެކަމަށެވެ. އަދި 2027 ވަނަ އަހަރުގެ ސާނަވީ އިމްތިހާނުގައި ޤުރުއާން މާއްދާ ރަސްމީކޮށް ހިމަނާ ރާއްޖޭގެ ދަރިވަރުންނަށް އެ އިމްތިހާނު ދިނުމަށް ހަމަޖެހިފައިވާކަމަށް ތަޢުލީމީ ވަޒީރު ވިދާޅުވިއެވެ.
ވަޒީރުގެ ވާހަކަފުޅުގައި ވަނީ މިފެށޭ ދިރާސީ އަހަރު، އެންމެ ބޮޑު އިސްކަމެއް ދޭނީ ދަރިވަރުންގެ ކިބައިގައި ރިވެތި އަޚުލާޤު އަށަގެންނެވުމަށް ކަން ވިދާޅުވެފައެވެ. ރާއްޖޭގެ ސްކޫލު މަދަރުސާތަކުގައި ތަޢުލީމު ހާސިލުކުރަމުންދާ ކޮންމެ ދަރިވަރަކީވެސް، ރިވެތި އާދަތަކާއި ސިފަތަކުން ޖަރީވެފައިވާ، އެކަކު އަނެކަކަށް އިހުތިރާމް ކުރާ ދަރިވަރުން ތަކަކަށް ހެދުމަށް، ތަރުބަވީ ހާއްސަ ޕްރޮގްރާމެއް، މިދިރާސީއަހަރުގެ ތެރޭގައި ފަށައިގެން ކުރިއަށް ގެންދާނެކަމަށްވެސް ވަޒީރު ވިދާޅުވިއެވެ.
ވަޒީރު ވިދާޅުވީ އާޓިފިޝިއަލް އިންޓަލިޖެންސް ގެ ބޭނުންތެރިކަން މަސައްކަތުގެ މާހައުލުގައި ބޮޑުވެފައިވާއިރު، މިފެށޭ ދިރާސީ އަހަރުވެގެންދާނީ، އޭއައިއަށް ސްކޫލުތަކުގެ މުދައްރިސުން އަހުލުވެރި ކުރުވުމުގެ ހާއްސަ ޕްރޮގްރާމްތަކެއް ކުރިއަށް ގެންދާނޭ އަހަރަކަށްކަމަށެވެ.
“ދަރިވަރުންނަށް ފޯރުކޮށްދެވޭ ތަޢުލީމާއި ތަރުބިއްޔަތުގެ ފެންވަރު ވަރަށްބޮޑަށް ބިނާވެގެންވަނީ ތިޔަ ލޮބުވެތި މުދައްރިސުންގެ ޢިލްމީ ޤާބިލިއްޔަތާއި ހުނަރާއި، ތިޔަ ލޮބުވެތި މުދައްރިސުންގެ ފަރާތުން ދަރިވަރުންނަށް ފެންނަ ނަމޫނާގެ މައްޗަށް. އެހެންކަމުން، ޓެކްނޮލޮޖީއާއި އޭއައިގެ މިޒަމާނުގައި، ޝާމިލުވެއްޓެއްގައި އުނގަންނައިދިނުން ކުރިއަށް ގެންދިޔުމަށް ގެންނަންޖެހޭ ފަހި ބަދަލުތަކަށް ހޭނުމަށް ތިޔަ ލޮބުވެތި މުދައްރިސުންނަށް އިޚްލާޞްތެރިކަމާއެކު އިލްތިމާސްކުރަން.” ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވިއެވެ.
ވަޒީރުގެ ޚިޠާބުގައި ވަނީ ކޮންމެ ދަރިވަރަކީ އަމިއްލަ އުނގެނުމަށް ޒިންމާވާ ދަރިވަރަކަށް ވުމަށް ނަސޭހަތްތެރިވެ އިސްލާމް ދީނަށް ލޯބިކުރާ، މައިން ބަފައިންނަށް ކިޔަމަންތެރިވާ، އެކަކު އަނެކަކަށް އިހްތިރާމްކުރާ، އުނގެނުމަށް ލިބިފައިވާ ރަނުގެ ފުރުސަތުގެ ބޭނުން އެންމެ ހެޔޮގޮތުގައި ހިފުމަށް ނަސޭޙަތްތެރިވެފައެވެ. އަދި މުދައްރިސުންދެކެ ލޯބިވާ އަދި މުދައްރިސުންނަށް އިހުތިރާމްކުރުމަށް ކެނޑިނޭޅި ދަރިވަރުންނަށް ވިސްނައިދީ އެކަން އެކުދިންގެ ކިބައިގައި އަށަގެންނެވުމަށް ބެލެނިވެރިންގެ ކިބައިން އެދިވަޑައިގަތެވެ.
“ޢިލްމީ، ފަންނުވެރި، މަސައްކަތްތެރި އަޚްލާޤީ ޖީލެއް ބިނާކުރުމަށް މިކުރާ މަސައްކަތް ކާމިޔާބުވާނީ އަޅުގަނޑުމެން އެންމެން، ވިސްނުންތެރިކަމާއި ހިކުމަތްތެރިކަމާއެކު، ގުޅިގެން ކުރާ މަސައްކަތުން. ސްކޫލާއި ގޭތެރޭގެ މާހައުލަކީ ދަރިވަރުންގެ އުނގެނުމާއި، ހެދިބޮޑުވުމަށް އެންމެ ފަހި މާހައުލެއްގެ ގޮތުގައި ހެދުމަށް އަޅުގަނޑުމެން އެންމެން ގުޅިގެން މަސައްކަތް ކޮށްގެން.” ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވިއެވެ.
ވަޒީރުގެ ޚިޠާބުގައި މިއަހަރުގެ ކިޔެވުން ފަށާއިރު ދިވެހިރާއްޖޭގެ ރަސްމީ ތަޢުލީމީ ނިޒާމަށް އިންގިލާބީ ހެޔޮ ބަދަލުތަކެއް ގެނައުމުގެ ބޮޑެތި މަސައްކަތްތަކެއް ފެށިގެން ކުރިއަށް ދާކަން ފާހަގަކުރައްވާފައެވެ. އަދި ހަމައެހެންމެ މިއަހަރުގެ ތެރޭގައިވެސް، މުހިއްމު ބޮޑެތި މަސައްކަތްތަކެއް ފަށައިގެން ކުރިއަށް ގެންދިޔުމަށް ރާވާފައިވާކަމަށް ވިދާޅުވިއެވެ. އޭގެ ތެރެއިން އެއްކަމެއްގެ ގޮތުގައި ވަޒީރު ފާހަގަކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅާއި އެއްގޮތަށް، ދިވެހިރާއްޖޭގެ ފިސްކަލް އަހަރާ ދިރާސީ އަހަރު ދިމާކުރެވި، ޖެނުއަރީ މަހު ފަށާގޮތަށް ދިރާސީ އަހަރަށް ގެނެވުނު ބަދަލާއެކު މިއަދު ކިޔެވުން ފެށުމެވެ.
