ނޫރީ އަލް މާލިކީ ބޮޑުވަޒީރަކަށް އިންތިޚާބު ކޮށްފިނަމަ އެމެރިކާއިން އިރާގަށް އެއްވެސް އެހީއެއް ނުވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
އޭނާގެ އަމިއްލަ ޓުރުތު ޝޯޝަލްގައި އަންގާރަ ދުވަހު ކުރި ޕޯސްޓެއްގައި ޓްރަމްޕް ބުނީ، ނޫރީ އަލް މާލިކީ އަލުން ބޮޑުވަޒީރަކަށް ގެނައުމަށް އިރާގުން މަސައްކަތް ކުރަމުންދާ ކަމުގެ ޚަބަރުތައް އޭނާއަށް ލިބިފައިވާ ކަމަށެވެ.
ނޫރީ އަލް މާލިކީ ބޮޑުވަޒީރަކަށް ގެނައުމަކީ އިރާގުން ނިންމާ ވަރަށް ނުބައި ނިންމުމަކަށް ވާނޭ ކަމަށް ޓްރަމްޕް ބުނެފައި ވެއެވެ.
ނޫރީ އަލް މާލިކީއާ ގުޅޭގޮތުން އެމެރިކާގެ ރައީސް މިފަދަ ވާހަކަތަކެއް މިދެއްކީ، ނޫރީ އަލް މާލިކީއަކީ އީރާނަށް ވަރަށް ބޮޑަށް ތާއީދު ކުރައްވާ ބޭފުޅަކަށް ވުމުންނެވެ. އޭނާ ވެރިކަމަށް ވަޑައިގެންނެފިނަމަ އީރާނާ ގާތް ގުޅުންތަކެއް ބާއްވަފާނެ ކަމަށް ބެލެވިގެންނެވެ.
ޓްރަމްޕް ބުނެފައިވަނީ، ނޫރީ އަލް މާލިކީ އެންމެފަހުން ބޮޑުވަޒީރަކަށް ހުންނެވިއިރު، އިރާގު ދިޔައީ ފަގީރު ހާލަތަށް ވެއްޓިގެން ކަމަށާއި، މުޅި އިރާގުގައި އޮތީ ހަމަނުޖެހުން ކަމަށެވެ. އެކަން ތަކުރާރުވާން ފުރުސަތު ދީގެން ނުވާނޭ ކަމަށް ޓްރަމްޕް ބުނެފައި ވެއެވެ.
ނޫރީ އަލް މާލިކީގެ ސިޔާސަތުތަކާއި ވިސްނުންނަށް ހުރިގޮތުން، އިރާގުގެ ބޮޑުވަޒީރު ކަމަށް އޭނާ އަލުން ގެނެސްފިނަމަ އެމެރިކާއިން އިރާގަށް އެއްވެސް އެހީއެއް ނުވާނޭ ކަމަށާއި، އެމެރިކާއިން އެހީ ނުވެއްޖެނަމަ ފާގަތިކަމާއި، މިނިވަންކަމާއި އަދި ކާމިޔާބީގައި އިރާގު ވެއްޓިގެންދާނީ ސުމަލަށް ކަމަށް ޓްރަމްޕް ބުނެފައި ވެއެވެ.
އިރާގުގެ ޕާލަމެންޓްގެ އަޣުލަބިއްޔަތު އޮންނަ ޝީއީ ޕާޓީތައް ހިމެނޭ އިއްތިހާދުން ވަނީ، އެ އިއްތިހާދުގެ ފަރާތުން ބޮޑުވަޒީރުގެ މަގާމަށް ގެނައުމަށް ނޫރީ އަލް މާލިކީގެ ނަން ހުށަހަޅާފައެވެ.
އެމެރިކާގެ ޚާރިޖީ ވަޒީރު މާކޯ ރޫބިއޯ އާދީއްތަ ދުވަހުވަނީ، އިރާގުގައި އީރާނު ކޮޅަށް ޖެހިފައިވާ ސަރުކާރެއް ގާއިމްކުރުމާ ދެކޮޅަށް އިންޒާރު ކޮށްފައެވެ.
އެފަދަ ސަރުކާރެއް އިރާގުގައި ގާއިމްކުރި ނަމަވެސް، އެމެރިކާއިން އިރާގާ މުއާމަލާތް ކުރުމުގައި ކަންކަން ނިންމާނީ އެމެރިކާގެ މަސްލަހަތަށް އިސްކަންދޭ އުސޫލުން ކަމަށް، އެމެރިކާގެ މަސްއޫލުވެރިން ބުނަމުން ގެންދެއެވެ.
އެމެރިކާ ސިފައިން 2003 ވަނަ އަހަރު އިރާގަށް އަރައިގަނެ، އިރާގު ހިފައި، ސައްދާމް ހުސައިންގެ ވެރިކަން ވައްޓާލުމަށްފަހު އިރާގުގެ ތެޔޮ ކޮންޓްރޯލް ކުރަނީ އެމެރިކާއިންނެވެ.
އިރާގުގެ ތެޔޮ ވިއްކައިގެން ލިބޭ ފައިސާ ޖަމާކުރަމުން ގެންދަނީ، ނިއު ޔޯކްގައި ހުންނަ ފެޑެރަލް ރިޒާވް ބޭންކަށެވެ.
އެމެރިކާގެ އޭރުގެ ސަރުކާރުގެ ތާއީދާއެކު ނޫރީ އަލް މާލިކީ އިރާގުގެ ބޮޑުވަޒީރުކަމަށް ވަޑައިގެންފައިވަނީ 2006 ވަނަ އަހަރުއެވެ. އޭނާ ބޮޑުވަޒީރުކަމުން ވަކިވެވަޑައި ގެންނެވީ 2014 ވަނަ އަހަރުއެވެ.
ނޫރީ އަލް މާލިކީއާމެދު އެމެރިކާ ހިތްހަމަ ނުޖެހުނީ އައިސިސްފަދަ ޖަމާއަތްތައް އިރާރުގައި އޮޕަރޭޓްކުރުމުގެ ފުރުސަތު މާލިކީ ދެއްވި ކަމަށް ތުހުމަތު ކޮށެވެ.
