ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި ވާދަކުރުމަށް ފޯމު ހުށަހަޅާ ވަގުތު ދެގަޑިއިރަށް އިތުރުކުރުމަށް އިލެކްޝަންސް ކޮމިޝަނުން ނިންމައިފި އެވެ.
މި އިންތިހާބުތަކަށް ކުރިމަތިލުމުގެ ފުރުސަތު މި މަހުގެ 17 ވަނަ ދުވަހު ހުޅުވާލާފައިވާއިރު، ފޯމު ހުށަހެޅުން ކުރިއަށްދަނީ އިލެކްޝަންސް ކޮމިޝަންގެ މައި ޕޯޓަލް މެދުވެރިކޮށެވެ. ކުރިން ހަމަޖެހިފައި އޮތް ގޮތުން ފޯމު ބަލައިގަންނަނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން މެންދުރު 15:30 އަށެވެ. އަދި ހުކުރު ދުވަހު މެންދުރު 15:30 އިން 18:00 އަށެވެ.
ނަމަވެސް، އިލެކްޝަންސް ކޮމިޝަނުން މިހާރު ވަނީ އަންނަ ހަފުތާގެ އާދީއްތަ ދުވަހުގެ ނިޔަލަށް ފޯމު ބަލައިގަންނަ ވަގުތު އިތުރުކޮށްފަ އެވެ. އެގޮތުން، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ހަވީރު 17:30 އަށް އަދި ހުކުރު ދުވަހު މެންދުރުފަހު 15:30 އިން ރޭގަނޑު 20:00 އަށް ޕޯޓަލް މެދުވެރިކޮށް ފޯމު ބަލައިގަންނާނެ ކަމަށް އެ ކޮމިޝަނުން ބުންޏެވެ.
އިލެކްޝަންސް ކޮމިޝަނުން މި ބަދަލު ގެނައީ، ފޯމު ހުށަހެޅުމަށް މިހާރު ކަނޑައަޅާފައިވާ ވަގުތަކީ އެކަށީގެންވާ ވަގުތެއް ނޫން ކަމަށް ބައެއް ސިޔާސީ ޕާޓީތަކުންނާއި ސިޔާސީ ފަރާތްތަކުން ޝަކުވާ ހުށަހަޅާފައިވާ ދަނޑިވަޅެއްގަ އެވެ.
އިންތިހާބަށް ފޯމު ހުށަހެޅުމަށް ހުޅުވާލި ފުރަތަމަ 10 ދުވަހުގެ ތެރޭގައި ޖުމްލަ 2،254 ފޯމު ވަނީ ހުށަހަޅާފަ އެވެ. މީގެ ތެރޭގައި ހިމެނެނީ ކައުންސިލްތަކަށް ވާދަކުރުމަށް ހުށަހެޅި 1،276 ފޯމާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވާދަކުރުމަށް ހުށަހެޅި 978 ފޯމެވެ. ނަމަވެސް، މީގެ ތެރެއިން މިހާތަނަށް ކެންޑިޑެސީ ގަބޫލުކޮށްފައި ވަނީ 1،857 މީހުންނެވެ.
ކެންޑިޑެސީ ގަބޫލުނުކުރާ މައިގަނޑު ސަބަބުތަކުގެ ތެރޭގައި ކުށާއި ދަރަނީގެ ރެކޯޑުތައް ފުރިހަމައަށް ހުށަހަޅާފައި ނެތުމާއި، ކުށެއް ނުވަތަ ދަރަންޏެއް އޮތްނަމަ އެކަމުގެ ތަފްސީލު ހިމަނާފައި ނެތުން ހިމެނެ އެވެ. މީގެ އިތުރުން، މޯލްޑިވްސް ކަރެކްޝަނަލް ސަރވިސްއިން ފުރިހަމަކުރަންޖެހޭ ރެކޯޑުތައް ހުށަނާޅާ ހުރުމަކީވެސް ފޯމުތައް ބާތިލުވާ އެއް ސަބަބު ކަމަށް އިލެކްޝަންސް ކޮމިޝަނުން ފާހަގަކުރި އެވެ.
އެހެންކަމުން، ކުރިއަށް އޮތް ތަނުގައި ފޯމު ހުށަހަޅާ ފަރާތްތަކުން މިކަންކަމަށް ހާއްސަ ސަމާލުކަމެއް ދިނުމަށް އެ ކޮމިޝަނުން ވަނީ އިލްތިމާސްކޮށްފަ އެވެ.
