ބޭންކް އޮފް މޯލްޑިވްސް (ބީއެމްއެލް) އިން ދޫކޮށްފައިވާ ކްރެޑިޓް ކާޑުތަކުން ރާއްޖޭން ބޭރުގެ މުއާމަލާތްތައް ކުރެވޭ އިންސައްތަ ދެގުނައަށް އިތުރުކުރުމަށް އެ ބޭންކުން ކަނޑައަޅައިފިއެވެ.
ބީއެމްއެލްގެ ކްރެޑިޓް ކާޑުތަކުން ރާއްޖެއިން ބޭރުގެ މުއާމަލާތްތައް ކުރެވޭ ލިމިޓް ބޮޑުކުރަން ނިންމާފައިވަނީ އަންނަ ފެބްރުއަރީ މަހުގެ 1 ވަނަ ދުވަހުން ފެށިގެންނެވެ.
ބޭންކުން ހާމަކޮށްފައިވާ ގޮތުގައި، މި ބަދަލާއެކު ކްލެސިކް ކްރެޑިޓް ކާޑުތަކުން މަހެއްގެ މައްޗަށް ބޭރުގެ މުއާމަލާތްތައް ކުރެވޭ މިންވަރު 750 ޑޮލަރުން 1،400 ޑޮލަރަށް ވަނީ ބޮޑުކޮށްފައެވެ.
ބީއެމްއެލް ގޯލްޑް ކާޑުތަކުގެ ލިމިޓް 1،500 ޑޮލަރަށް ބޮޑުކޮށްފައިވާއިރު، ޕްލެޓިނަމް ކާޑުތަކުގެ ލިމިޓް ވަނީ 3،000 ޑޮލަރަށް އިތުރުކުރެވިފައެވެ.
ބީއެމްއެލް އިން ބުނި ގޮތުގައި މި ބަދަލު ގެނައުމުގެ މައިގަނޑު މަގުސަދަކީ ރާއްޖޭން ބޭރަށް ދަތުރުކުރާ ފަރާތްތަކާއި، އޮންލައިންކޮށް ވިޔަފާރިކުރާ ފަރާތްތަކުގެ އިތުރުން، ތައުލީމީ އަދި ސިއްހީ ބޭނުންތަކަށް ބޭރު ފައިސާއިން މުއާމަލާތްކުރާ ދިވެހިންނަށް މިހާރަށްވުރެ ބޮޑަށް ލުއިފަސޭހަކޮށްދިނުމެވެ.
މި ބަދަލާއެކު، ބޭންކުން ދޫކުރާ ތިން ބާވަތެއްގެ ކްރެޑިޓް ކާޑަކުން ރާއްޖޭން ބޭރުން ގަންނަ މުދަލާއި ޚިދުމަތްތަކަށް ކޮންމެ މަހަކު ކުރެވޭނެ ޚަރަދުގެ މިންވަރު އިތުރުވެގެންދާނެއެވެ.
ކްރެޑިޓް ލިމިޓަށް ބަދަލު ގެނެސްފައިވާ ކާޑުތަކުގެ ތެރޭގައި ބީއެމްއެލް އިން ދޫކުރާ ކްލެސިކް، ގޯލްޑް އަދި ޕްލެޓިނަމް ކްރެޑިޓް ކާޑު ހިމެނެއެވެ.
މިއީ ކޮންމެ މީލާދީ މަހަކަށް ކަނޑައެޅިފައިވާ ލިމިޓްތަކަށް ގެނެވުނު ކުރިއެރުމެއް ކަމަށް ބީއެމްއެލް އިން ވަނީ ބުނެފައެވެ.
