އެޕްރީލް 4 ގައި ބާއްބާ ލޯކަލް ކައުންސިލް އިންތިޚާބާއި އަންހެނުންގެ ތަރައް ޤީއަށް މަސައްކަތްކުރާ ކޮމިޓީގެ އިންތިޚާބުގައި ވޯޓުދިނުމުގެ ޙައްޤު ލިބިފައިވާ މީހުންގެ ރަޖިސްޓަރީއަށް ގެނައި ބަދަލުތައް އިލެކްޝަންސް ކޮމިޝަން (އީސީ) އިން މިއަދު އާންމުކޮށްފިއެވެ.
ކޮމިޝަނުން ބުނީ، މި މަހުގެ 7 ގައި އާންމުކުރިލިސްޓަށް ހުށަހެޅުނު ޝަކުވާތަކާ ގުޅިގެން ގެނެވުނު ބަދަލުތައް މިހާރު ގެޒެޓުކޮށްފައިވާ ކަމަށެވެ.
އެ ލިސްޓް ކޮމިޝަނުގެ ވެބްސައިޓުންނާއި، މާލެ ފިޔަވައި މީހުން ދިރިއުޅޭ ކޮންމެ ރަށެއްގެ ނުވަތަ ސިޓީއެއްގެ ކައުންސިލް އިދާރާތަކުން މިހާރު ފެންނަން ހުންނާނެއެވެ.
މީގެ އިތުރުން، ވޯޓު ދިނުމުގެ ޙައްޤު ލިބިފައިވާ މީހުންގެ ލިސްޓުގައި އެ މީހެއްގެ ނަން އޮތްތޯ ބެލުމަށްޓަކައި (VR space ID-Number) 1414 އަށް އެސްއެމްއެސްކޮށްގެން ވެސް ޗެކްކުރެވޭނެ އެވެ.
އިލެކްޝަންސް ކޮމިޝަނުން ހާމަކޮށްފައިވާ އާ ލިސްޓަށް ޝަކުވާ ހުށަހެޅުމުގެ ފުރުޞަތު މިއަދުން ފެށިގެން އަންނަ މަހުގެ 8 ވަނަ ދުވަހުގެ މެންދުރު ފަހު 3:00 އާ ހަމައަށް އޮންނާނެ އެވެ.
ޝަކުވާ ހުށަހަޅަންޖެހޭނީ އޮންލައިންކޮށް އިލެކްޝަންސް ކޮމިޝަނުގެ “މައިޕޯޓަލް” މެދުވެރިކޮށެވެ. އަދި ރަޖިސްޓަރީގައިވާ މައުލޫމާތަކަށް ބަދަލު ގެނައުމަށް އެދި ހުށަހަޅާ އިރު، އެ ޝަކުވާއެއްގެ ޞައްޙަކަން ސާބިތުކޮށް ދޭނެ ރަސްމީ ލިޔުމެއްގެ ކޮޕީ ހުށަހަޅަން ޖެހޭނެ އެވެ.
އިންތިހާބުގައި ވޯޓު ދިނުމުގެ ހައްގު ޖުމްލަ 294،937 މީހުންނަށް ލިބެ އެވެ. އޭގެ ތެރޭގައި ހިމެނެނީ 144،527 އަންހެނުންނާއި 150،410 ފިރިހެނުންނެވެ.
