ދަރީންނޭ އެންމެހާ ލޮބުވެތި

        ދަރީންނޭ އެންމެހާ ލޮބުވެތި
          ****************
    ޢަބްދުއްލަޠީފް އިބްރާހީމް ވައިޖެހޭގެ ހއ.އުތީމު

ޢުލޫމީ ޤުލްޝަނުން ތާޒާ، މަލެއް ވަސްމީރު ބިނދެލައްޗޭ
ޤުލޫބަށް ފިނިކަމެއް ދިނުމަށް، ކަމަރު ހިންމަތުގެ ބަނދެލައްޗޭ

ދުރާލާ ކަންކަމަށް ވިސްނާ، ދިރާސާ ކޮށްލަމުން ދުނިޔޭނު
ކިރާލާ އަގު ވަޒަން ކުރަމުން، ނަތީޖާ ރަނގަޅު ހޯދައްޗޭ

ކުރާކަމުގައި މުރާލިވެގެން، ކަށިން ގަދަ ހިތްވަރެއް ނެރެގެން
ބަރާބަރު ކުއްޖަކަށްމެ ވެގެން، ޝަރަފު މަތިވެރިވި ހޯދައްޗޭ

މުދައްރިސުނަށް ވެގެން ކިޔަމަން، ފިލާވަޅުތައް މުރާޖަޢުކޮށް
ނުދަންނަ އިތުރު ވިހާ ކަންތައް، އަބަދުވެސް ހޯދަމުން ދައްޗޭ

ވެގެން ޒީނަތް ރިވެތި ޚުލްޤުން، ޤަދަރު މީހުން ކުރާނޭހެން
މަގުން ސީދާ ދަތުރު ކުރަމުން، އަމާޒެއް ފަހިވި ހޯދައްޗޭ

ނަމާދަށް ފަސްވަގުތު ނާޅާ، ދަމުން ޙުރުމަތް އަދާކުރަމުން
ރިމާދަށް ފުރޮޅިގެން ނުމެގޮސް، އަޖުރު ގިނަ ގުނަވި ހޯދައްޗޭ

ކަލާމްފުޅު އެންމެ މަތިވެރިވީ، ޙިފުޡުކޮށް އަދި ތިލާވާކޮށް
ސަލާމާ މާތްވި ޞަލަވާތުން، ރަސޫލަށް ހާރު އަމުނައްޗޭ

03/01/2021