ކޮންމެފަދަ ހާލަތަކާވެސް ކުރިމަތިލުމަށް އީރާނު އޮތީ ތައްޔާރަށް ކަމަށް އީރާނު އަސްކަރިއްޔާގެ ތަރުޖަމާނު ބްރިގޭޑިއަރ ޖެނެރަލް މުހައްމަދު އަކްރަމީނިއާ ވިދާޅުވެއްޖެއެވެ.
އިރްނާ ނޫސް އޭޖެންސީން ހާމަކުރި ރިޕޯޓެއްގައި ބްރިގޭޑިއަރ ޖެނެރަލް މުހައްމަދު އަކްރަމީނިއާ ވިދާޅުވީ، އީރާނުގެ ލަޝްކަރުތަކުން ހާލަތު ވަރަށް ގާތުން ބަލަމުންދާ ކަމަށާއި ކޮންމެފަދަ ހާލަތާ ކުރިމަތިލާންވެސް ތިބީ ފުރިހަމަ ތައްޔާރީގައި ކަމަށެވެ.
ހަމަ އެއާއެކު، އީރާނު އަސްކަރިއްޔާއިން މެދުނުކެނޑި ގާބިލުކަން އިތުރުކުރަމުން ގެންދާކަންވެސް އޭނާ ފާހަގަ ކުރެއްވިއެވެ.
އީރާނުން މިއަދުވެސް ވަނީ، ކުރިއަރާފައިވާ އެއަރ ޑިފެންސް ސިސްޓަމްއާއި، ދުރުރާސްތާ މިސައިލެއް ބޭނުންކޮށްގެން އެމެރިކާގެ ޑްރޯންއެއް ވައްޓާލާފައެވެ. އެމެރިކާ ޑްރޯން ވައްޓާލުމުގެ ކުރިން އީރާނުގެ ވައިގެ ސަރަހައްދަށް ވަން އެމެރިކާގެ އަސްކަރީ ޖެޓުތަކެއްވެސް އީރާނުން ފައްސާލާފައި ވެއެވެ.
އީރާނު އަސްކަރިއްޔާގެ ވެރިން ތަކުރާރުކޮށް ވިދާޅުވަމުން ގެންދަނީ، ދުޝްމަނުން އީރާނާ ދެކޮޅަށް އަލުން ހަނގުރާމަ ފަށައިފިނަމަ މުޅިން އައު ބާވަތްތަކުގެ ހަތިޔާރާއި، ހަނގުރާމައިގެ އައު ޓެކްނޯލޮޖީވެސް ބޭނުން ކުރާނޭ ކަމަށެވެ. އީރާނުން ބޭނުންކުރަން ފަށާ އަސްކަރީ ޓެކްނޯލޮޖީ ވެގެންދާނީ ދުޝްމަނުންނަށް ސަޕްރައިޒް އެއްޗަކަށް ކަމަށްވެސް، އަސްކަރިއްޔާގެ ވެރިން ވިދާޅުވެފައި ވެއެވެ.
އެމެރިކާގެ ރައީސް ޑޮނަލްޑް ޓްރަމްޕްގެ އަމުރަށް އެމެރިކާ އަސްކަރިއްޔާއިން މިހާރު ދަނީ އީރާނު ވަށައިގެންވާ ސަރަހައްދުތަކަށް ލަޝްކަރުތަކާއި ހަމަލާދޭ މަނަވަރުތައް ޖަމާކުރަމުންނެވެ.
އަސްކަރިއްޔާގެ ތަރުޖަމާނު ބްރިގޭޑިއަރ ޖެނެރަލް މުހައްމަދު އަކްރަމީނިއާ ވިދާޅުވީ، އީރާނުގެ ލަޝްކަރުންތަކުން މިހާތަނަށް ދެއްކި ސާބިތުކަމުގެ ސަބަބުންވެސް، އީރާނާ ގުޅޭގޮތުން ދުޝްމަނުން ހެދި ހުރިހާ ހިސާބެއް ފުނޑުފުނޑުވެގެން ގޮސްފައިވާ ކަމަށެވެ.
އީރާނާ ދެކޮޅަށް އަސްކަރީ އުދުވާނު ފަށައި، އީރާނުގެ ދިފާއީ ގާބިލުކަން ނައްތާލައި، މަދު ދުވަސްކޮޅެއްގެ ތެރޭގައި އީރާނު ބަލިކޮށް ނިކަމެތި ކޮށްލެވޭނެ ކަމަށް ދުޝްމުން ހީކުރި ކަމަށްވެސް، އަސްކަރިއްޔާގެ ތަރުޖަމާނު ވިދާޅުވިއެވެ.
އަސްކަރިއްޔާގެ ތަރުޖަމާނު ވިދާޅުވީ، ދުޝްމަނުންގެ މަގްސަދަކީ އީރާނުގެ ނިއުކްލިއަރ ޕްރޮގްރާމާއި، މިސައިލް ޕްރޮގްރާމް ނޫން ކަމަށާއި، އެމީހުންގެ ރޭވުން މާފުޅާ ކަމަށާއި، އެމީހުންގެ ރޭވުމަކީ އީރާނުގެ އިސްލާމީ ވެރިކަން ވައްޓާލައި، އީރާނު ރޫޅާލުން ކަމަށެވެ.
