ޒޯން 1ގެ ރަށްތަކަށް ޚާއްސަކޮށްފައިވާ ކޯވިޑް ފެސިލިޓީ ކަމުގައިވާ ށ ފުނަދޫ ކޮވިޑް ފެސިލިޓީގައި މިވަގުތު ފަރުވާދެމުން ގެންދާ ބަލިމީހުންގެ އަދަދު ހަޔަކަށް އަރައިފިއެވެ.
ށ. އަތޮޅު ހޮސްޕިޓަލުގެ މެނޭޖަރ އަހުމަދު ޒުމްރަތު ގޮށްކޮޅަށް މައުލޫމާތު ދެއްވަމުން ވިދާޅުވީ މިވަގުތު 6 މީހުންނަން ފަރުވާދެމުން ގެންދާއިރު މާބަނޑު މީހެއްގެ އިތުރުން ދޮށީ އުމުރުގެ މީހެއްވެސް ހިމެނޭކަމަށާ، އެ ހުރިހާ މީހުންވެސް ޕޮޒިޓިވްވެފައިވަނީ ބާރަށުން ކަމަށެވެ.
އެ ފެސިލިޓީގައި ފަރުވާދެމުން ގެންދާ ހުރިހާ މީހުންގެ ހާލުވެސް ރަނގަޅު ކަމަށާ އެމީހުން ފެސިލިޓީއަށް ގެނައީ ހައި ރިސްކް މީހުނަން ވާތީކަމަވެސް ޒުމްރަތު ވިދާޅުވިއެވެ.
ށ. ފުނަދޫ ކޯވިޑް ފެސިލިޓީއަކީ ޒޯން 1ގެ ރަށްތަކަށް ޚާއްސަކޮށްފައިވާ ކޯވިޑް ފެސިލިޓީއެވެ. މި ފެސިލިޓީގައި އައިސީޔޫ 20 އެނދާއި އައިސޮލޭޝަން 37 އެނދު ހުރެއެވެ. މިހާތަނަށް މިފެސިލިޓީގައި 10 މީހަކަށް ވަނީ ފަރުވާދީފައެވެ.
