ޖަޕާން އިންޓަނޭޝަނަލް ކޯޕޮރޭޝަން އޭޖެންސީ (ޖޭ.އައި.ސީ.އޭ) އާއި އެލުމްނީ ސޮސައިޓީ އޮފް މޯލްޑިވްސް (ޖޭ- އޭ.އެސް.އެމް)، އަދި މިނިސްޓްރީ އޮފް އެޑިއުކޭޝަން ގުޅިގެން މިދިޔަ ފެބުރުވަރީ މަހު ބޭއްވި ކުރެހުމުގެ މުބާރާތުން ބ.އަތޮޅު މަދަރުސާގެ ދެ ދަރިވަރުން ވަނަތައް ޙާޞިލްކޮށްފިއެވެ.
ކޯވިޑް-19 ގެ ދަނޑިވަޅުގައި ކުދިން ހިތްހަމަ ޖައްސާލުމަށް ޖޭ.އައި.ސީ.އޭ އާއި މިނިސްޓްރީ އޮފް އެޑިއުކޭޝަން ގުޅިގެން ބޭއްވުނު މި މުބާރާތަކީ މުޅި ރާއްޖޭގެ މަދަރުސާތަކަށް ހުޅުވާލައިގެން ކުރިއަށް ގެންދެވުނު މުބާރާތެކެވެ.
ބ. އަތޮޅު މަދަރުސާއިން މަޢުލޫމާތު ދިން ގޮތުގައި، މި މުބާރާތުގައި ބައިވެރިވުމަށް ހުރިހާ ދަރިވަރުންނަށް ފުރުޞަތު ހުޅުވާލެވުނެވެ. އަދި ޝަޢުގުވެރިކަން ފާޅުކޮށް، ކުރެހުން ހުށަހެޅި ހުރިހާ ދަރިވަރުންގެ ކުރެހުން މި މުބާރާތުގައި ބައިވެރި ކޮށްފައިވެއެވެ.
އެގޮތުން، ކީ ސްޓޭޖް 2 ގެ ބައިން އެއްވަނަ ހޯދާފައިވަނީ ބ.އަތޮޅު މަދަރުސާގެ ގްރޭޑް 5 ގެ ދަރިވަރު، ފާޠިމަތު ސާޔާ ޙަސަން ސިމްރާހުއެވެ. އަދި ކީ ސްޓޭޖް 3 ގެ ބައިން ދެވަނަ ހޯދާފައިވަނީ ބ.އަތޮޅު މަދަރުސާގެ ގްރޭޑް 8 ގެ ދަރިވަރު، ލަޙްފާ ޢަބްދުލް ޙަލީމްއެވެ. މި ދެ ދަރިވަރުން ވަނަތައް ޙާޞިލްކޮށްފައި ވަނީ މުޅި ރާއްޖެއިން ޖުމުލަ 427 ކުރެހުމާއި ވާދަކޮށްގެންނެވެ.
ގޮށްކޮޅުގެ ފަރާތުން ބ.އަތޮޅު މަދަރުސާއިން ހޯދި ކާމިޔާބީ ފާހަގަކޮށް، ދެ ދަރިވަރުންނަށްވެސް މަރުޙަބާ ކިޔަމެވެ.
