ކޮވިޑް-19ގެ އަލާމާތް ހުރެގެން ބައްޔަށް ޓެސްޓު ކުރި ބަޔަކު ޕޮޒިޓިވް ވެ، އއ. ރަސްދޫއަށް އަރައި ފޭބުން މަނާކޮށްފިއެވެ.
ރަސްދޫ ކައުންސިލުން ބުނީ، އެރަށު އެއް ގެއަކަށް ނިސްބަތްވާ ފަސް މީހެއްގެ ފަރާތުން ކޮވިޑް-19ގެ އަލާމާތްތަކެއް ފެނިގެން މިދިޔަ ބުދަ ދުވަހު ނެގި ސާމްޕަލްތައް ޕޮޒިޓިވްވެފައިވާ ކަމަށެވެ.
އެމީހުންނަކީ ކަރަންޓީނުގައި ތިބި ބަޔަކަށް ނުވާތީ، އެ ކޭސްތަކާ ގުޅިގެން ކޮންޓެކްޓް ޓްރޭސިންގެ މަސައްކަތް ކުރިއަށް ގެންދިއުމަށް އެރަށް މޮނީޓަރިންގެ ހާލަތަށް ގެނައީ މިއަދުއެވެ. އަދި އެމީހުންނާ ކޮންޓެކްޓު ވެފައިވާ މީހުން އެކަން އެންގުމަށް ކައުންސިލުން އެދެއެވެ.
ކައުންސިލުން ބުނީ، އެރަށުން ޕޮޒިޓިވްވި ފަސް މީހުންނަށް ބަލި ޖެހެން މެދުވެރިވި ސަބަބު އަދި ސާފު ނުވާ ކަމަށާއި ނަމަވެސް އެކަން ދެނެގަތުމުގެ މަސައްކަތް ކުރަމުން އަންނަ ކަމަށެވެ.
އާބާދީގައި 1200 އެއްހާ މީހުން ދިރިއުޅޭ އަދި ލޯކަލް ޓޫރިޒަމަށް މަޝްހޫރު ރަސްދޫ އަކީ އއ. އަތޮޅުގެ ވެރިކަން ކުރާ ރަށެވެ. އަދި އެރަށަކީ އެ އަތޮޅުން މޮނީޓަރިންގެ ހާލަތަށް ގެނައި ހަތަރު ވަނަ ރަށެވެ.
އއ. އަތޮޅުން މިވަގުތު މަތިވެރި އާއި ބޮޑުފޮޅުދޫ އަދި އުކުޅަސް އޮތީ މޮނީޓަރިންގެ ހާލަތަށް ގެނެސްފައެވެ.
