ކަމަނާއެވެ! ކަމަނާ ތިހުރީ ރައްޔިތުގެ ހާދިމާއަކަށެވެ. ރައްޔިތުން އޭތިމީތި ކިޔާނެއެވެ! އެކިމީހުން ކިޔާނީ އެކިއެކި އެއްޗިއްސެވެ. ރައްޔިތުންގެ އަޑު ކަނޑުވަން ބިރު ނުދައްކާށެވެ. ރައްޔިތުން އެއްޗެއް ބުނާއިރަށް އަޑުގެ ނެތްތަނަށް އެމިހަކާ ދިމާލަށް މޮޔައެއްހެން ހަޅޭނުލަވާށެވެ.
ކަމަނާއެވެ! ދިވެހި ރާއްޖޭގެ ކޮންމެ ރައްޔިތަކަށް އެމީހަކު ބޭނުން ހިޔާލަކާއި ވާހަކައެއް ދެއްކުމުގެ މިނިވަންކަން ވަރަށް ފުރިހަމައަށް އެބައޮތެވެ. އެއީ ހަބަރެއް، ނުވަތަ މަޒުމޫނެއް، ނުވަތަ ޅެމެއް، ފަރިއްސެއް، ރައިވަރެގެ ސިފައިގައި ނަމަވެސްއެވެ.
ކަމަނާއަށް ފަހަރުގައި އެކަން ނޭނގި އޮވެދާނެކަމަށް އިސްވެދިޔަ ބާރު ރައްޔިތުންނަށް ލިބިދޭ ގާނޫނު އަސާސީގެ ދެ މާއްދާ މިތަނުގައި ލިޔެލާނަމަވެ.
ދިވެހިރާއްޖޭގެ ޤާނޫނު އަސާސީގެ 27 ވަނަ މާއްދާ ( ހިޔާލު ފާޅުކުރުމުގެ މިނިވަންކަން ) ގައި ވަނީ ” މިނިވަންކަމާއެކު ފިކުރުކުރުމާއި، އިސްލާމްދީނުގެ އަޞްލަކާ ޚިލާފުނުވާ ގޮތުގެމަތިން އެމީހެއްގެ ބުއްދިއަށް ފެންނަ ގޮތްތަކާއި، ޚިޔާލުތައް ދުލާއި ޤަލަމުން އަދި މިނޫންވެސް ގޮތްގޮތަށް ފާޅުކުރުމުގެ މިނިވަންކަން ކޮންމެ މީހަކަށްމެ ލިބިގެންވެއެވެ.” މިފަދައިނެވެ.
އަދި ދިވެހިރާއްޖޭގެ ޤާނޫނު އަސާސީގެ 28 ވަނަ މާއްދާ (ނޫސްވެރިކަމުގެ މިނިވަންކަން ) ގައި ވަނީ ” ނޫސްވެރިކަން ކުރުމާއި، މުޢާޞަލާތީ ވަޞީލަތްތައް ބޭނުންކުރުމުގެ މިނިވަންކަން ކޮންމެ މީހަކަށްމެ ލިބިގެންވެއެވެ. މީގެ ތެރޭގައި ޚަބަރާއި، މަޢުލޫމާތުއު، ފެންނަ ގޮތްތަކާއި، ޚިޔާލުތައް ފާޅުކުރުމާއި، ޝާޢިކުރުމާއި، ފެތުރުމުގެ މިނިވަންކަން ހިމެނެއެވެ. މިގޮތުން ޝާއިޢުކުރާ ނުވަތަ ފަތުރާ ނުވަތަ ފާޅުކުރާ މަޢުލޫމާތެއްގެ މަޞްދަރު ހާމަކުރުމަށް އެއްވެސް މީހަކަށް މަޖުބޫރުކޮށްގެން ނުވާނެއެވެ. ” މިފަދައިނެވެ.
އަދިވެސް ބުނަމެވެ. ރައްޔިތުންގެ ހިދުމަތަށް ނުކުތުމުން ރައްޔިތުން ވަރަށް އެއްޗެހި ކިޔާނެއެވެ. ތިބާ ހިތްހަމަ ނުޖެހޭ އެތަކެއް އެއްޗެހިވެސް އަޑުއިވޭނެއެވެ. ތިމާ ހިތްހަމަ ނުޖެހޭ އެއްޗެއް އިވޭއިރަށް އެމީހަކު ފެންނަ ތަނަކުން ދިމާކޮށް ފާޑުފާޑު އެއްޗެހި ކިޔާ ނަހަދާށެވެ. ތިބާ ތި މަގާމަށް ނައިނަމަ ރައްޔިތުން ތިބާއަށް ފާޑު ފާޑުގެ އެއްޗެހި ނުކީހެވެ.
ކަމަނާއެވެ! އަޑަށް ބާރުލާ އަބަދު ރައްޔިތުންނާ ދިމާއަށް ރަޖިސްޓްރީ ނޫހަކުން ނޫނީ ބަސް ނުބުނެވޭނެކަމަށް ތިގޮވަނީ ކީއްވެހެއްޔެވެ. ކަމަނާއެވެ! ރައްޔިތުން ބުނަން ބޭނުންވާ އެތި ބުނަން ގާނުނު އަސާސީގެ ދެ މާއްދާ އަކުން ފުރުސަތު ހުޅުވިފައިވެއެވެ. ދެން އޮތީ ލިޔާ އެއްޗެހީގެ މަސްދަރު ހޯދަން ކަމަނާ ކުރާ މަސައްކަތެވެ. އެކަން ކަމަނާއަށް ކީއްކުރަން، އެހެން ފަރާތަކަށްވެސް ނުކުރެވޭނެކަން އެއޮތީ 28 ވަނަ މާއްދާގައި ބުނެދީފައި ނޫންހެއްޔެވެ. ހަނދާން އާކޮށްލަން ލިޔެލާނަމެވެ.
ނޫސްވެރިކަން ކުރުމާއި، މުޢާޞަލާތީ ވަޞީލަތްތައް ބޭނުންކުރުމުގެ މިނިވަންކަން ކޮންމެ މީހަކަށްމެ ލިބިގެންވެއެވެ. މީގެ ތެރޭގައި ޚަބަރާއި، މަޢުލޫމާތުއު، ފެންނަ ގޮތްތަކާއި، ޚިޔާލުތައް ފާޅުކުރުމާއި، ޝާޢިކުރުމާއި، ފެތުރުމުގެ މިނިވަންކަން ހިމެނެއެވެ. މިގޮތުން ޝާއިޢުކުރާ ނުވަތަ ފަތުރާ ނުވަތަ ފާޅުކުރާ މަޢުލޫމާތެއްގެ މަޞްދަރު ހާމަކުރުމަށް އެއްވެސް މީހަކަށް މަޖުބޫރުކޮށްގެން ނުވާނެއެވެ.
މިވަރުން ސާފުވެެއްޖެ ކަމަށް ހީކުރަމެވެ. ކަމަނާގެ ވިސްނުމުގައި ތިހުނަނީ ހިޔާލު ފާޅުކުރުމަށް ހަމައެކަނި އޮތީ ފޭސްބުކާ ޓުއިޓާކަމަށެވެ. ކަމަނާއެވެ. ތީ މިޒަމާނުގައި އެގޮތަށް ބޭނުން ކުރާ އެންމެ ދެ ވަސީލަތެވެ. އެގޮތަށް ތަފާތު އެތަށް ވަސީލަތެެއް އެބަހުއްޓެވެ. ތިބާ ބޭނުން ގޮތަކަށް ޑިޒައިން ކުރެވޭ ޕުލެއްޓްފޯމުތައް ވެސް މަދެއްނޫނެވެ.
އަހަރެމެންގެ ތެރޭގައި އާއްމުވެފައި މިވަނީ މިފަދަ މަދު ވަސީލަތެކެވެ. އަދި އަބަދުވެސް އާ ވަސީލަތްތައް ވުޖޫދުވަމުން ދެެއެވެ. މިސާލަކަށް ބުނާނަމަ މިހާރު އެންމެ މަސްހޫރީ ކުލަބު ހައުސް ނޫންތޯއެވެ. އެއްކަލަ ފޭސްބުކާއި ޓްވިޓަރގެ ބޮޅަށް ހިޔާލު ފާޅުކުރާނެ އާ ބޮޅެއްް އިތުރުވީނޫންތޯއެވެ. އެތަނުގައި ހިޔާލު ފާޅުކޮށްގެން އެވާހަކައެއް ނުދައްކަމު ނޫން ތޯއެވެ. ވީމާ ތީ ޒާތީވުން ތޯއެވެ. މީހަކު ބޭނުންކުރާ ވަސީލަތެއްގެ ސަބަބުން ރުޅި އަންނަނަމަ އެކަން އެންމެ ވައްތަރީ ޒާތީވުމާ ނޫންތޯއެވެ. ތަފާތުކުރުން ގެންގުޅުމަކީވެސް ގާނޫނީ ކުށެކެވެ. މިފަދަ ކަންކަމަށް ޒިންމާދާރު މަގާމުތަކުގައި ތިބޭ މީހުން ހާއްސަ ސަމާލުކަމެއް ދޭންވާނެ ނޫންތޯއެވެ.
ކަމަނާއެވެ! ރައްޔިތުން ފަހާ ދުވަން ނޫޅެށެވެ. ރައްޔިތުންގެ މިނިވަންކަން ހަނިކުރަން ނޫޅުއްވާށެވެ. ރައްޔިތުންގެ ހާދިމާއަކަށް އުޅޭނަމަ ރައްޔިތުންގެ ތަފާތު ގޮވެލީގެ އަޑު އިވޭނެއެވެ. ބައެއްފަހަރު ސަނާއެވެ. އަނެއްބައިފަހަރު ފާޑެވެ. ހަޖަމް ކުރަން ދަސްކުރާށެވެ. ރައްޔިތުން ކަރަށް ފައިން އަރާ އޮބަން ނުޅޭށެވެ. ކަމަނާއަށް ތި މަގާމު ދިނީވެސް ރައްޔިތުނެވެ.
