ފާއިތުވި ފަސް އަހަރަށް ބަލާއިރު ހަނިމާދޫ ސްކޫލްގެ އޯ ލެވެލްގެ ނަތީޖާ މިއަހަރު ރަނގަޅެވެ. މިހެން ބުނުމުން ބައެއް ކިޔުންތެރިން ހިތުގައި އުފެދޭނެ އެއްސުވާލަކީ މި ދައްކަނީ ކޮން ނަތިޖާއެއް ރަނގަޅުވި ވާހަކައެއް ހެއްޔެވެ؟؟ ގައިމު ގަދަ 10 އެއްގައި އެއްވެސް ކުއްޖެއް ނުހިމެނޭ ނޫން ހެއްޔެވެ؟
އާއެކެވެ. ގަދަ 10 ގައި މި ފަހަރު އެއްވެސް ކުއްޖަކު އަދި ހިމެނިފައި ނެތެވެ. އެއީ މިފަހަރު މުޅިން އަލަށް އެ ސްކޫލުގައި އިމްތިހާނު ހެދި އެއް މާއްދާ ކަމުގައިވާ އާރޓް އެންޑް ޑިޒައިން އިން އެއްވެސް ކުއްޖަކު އަދި ފާސްވެފައި ނުވާތީ ކަމަށް ނަތީޖާ ތަކުން ދައްކައެވެ. އެކަން އިތުރަށް ބަލަމުންދާތީ އެވާހަކަ މިވަގުތު އިހަށް ބާއްވާލާނަމެވެ.
ފަށަމުން ބުނި ނަތިޖާ ރަނގަޅުވި ވާހަކަ އެއީ ހަމަ ރަނގަޅަށް ބުނިއެއްޗެކެވެ. ބުނެވުނު އެއްޗެއް ނޫނެވެ. އެއީ އޮޅުމެއްވެސް ނޫނެވެ. މިފަހަރު ފަސް މާއްދާއިން ފާސްވި ނިސްބަތަށް ބަލާއިރު ނަތީޖާ ހުރީ %55 ގައެވެ. މިއަށްވުރެ މަތިން ފާއިތުވި ފަސް އަހަރުތެރޭ ނަތީޖާއެއް ލިބިފައި އޮތީ 2017 ވަނަ އަހަރުއެވެ. އެއީ 55.78% އެވެ. އެއީ %0.78 ގެ ކުރިއެރުމެކެވެ. ކަން މިހެން އޮތުމާއެކު އަދި ބުނެވޭނީ މިއަހަރުގެ ނަތީޖާ ފާއިތުވި ފަސް އަހަރަށް ބަލާއިރު ރަނގަޅު ކަމަށެވެ. ކުރިއަށް ހިންގަވާށެވެ.
ތިރީގައި މިވަނީ ފާއިތުވެދިޔަ 5 އަހަރު ފަސްމާއްދާއިން ފާސްވި އިންސައްތައެވެ.
- 2015 ފަސް މާއްދާއިން ފާސްވެފައި ވަނީ %27.78 ދަރިވަރުންނެވެ.
- 2016 ފަސް މާއްދާއިން ފާސްވެފައި ވަނީ %16.36 ދަރިވަރުންނެވެ.
- 2017 ފަސް މާއްދާއިން ފާސްވެފައި ވަނީ %55.78 ދަރިވަރުންނެވެ.
- 2018 ފަސް މާއްދާއިން ފާސްވެފައި ވަނީ %25.00 ދަރިވަރުންނެވެ.
- 2019 ފަސް މާއްދާއިން ފާސްވެފައި ވަނީ %50.00 ދަރިވަރުންނެވެ.
ނަތީޖާ ރަނގަޅު ކަމަށް އަޅުގަނޑު ދަންނަވަމުން މިދަނީ ނަތީޖާ މި ފަހަރު ހަމަ ރަނގަޅު ވީމައެވެ. އެކަން ހާމަ ކުރުމަށް ހެއްކެއްގެ ގޮތުން ފާއިތުވި ފަސްއަހަރު ތެރޭގައި ނަތިޖާ އެންމެ ރަނގަޅު އަހަރު އޭ ޕުލަސް، އޭ، ބީ، ސީ، ގުރޭޑް ލިބިފައި ހުރި ގޮތްތަކަށް ބަލައިލަމާ ހިނގާށެވެ.
އެގޮތުން ނަތިޖާ ރަނގަޅު ކަމަށް ފެންނަ 2017 ވަނައަހަރު 45 ދަރިވަރުން އިމްތިޙާން ހަދާފައި ވެއެވެ. އެފަހަރު 7 “އޭ ޕުލަސް” ލިބިފައި ވެއެވެ. ލިބިފައި ވަނީ 10″ އޭ ” އެވެ. 41 ” ބީ ” ލިބިފައި ވާއިރު، “ސީ ” 61 ލިބިފައި ވެއެވެ. މިއީ 45 ދަރިވަރުންގެ މަސައްކަތުން ހޯދާފައިވާ ނަތީޖާއެކެވެ.
މި ފާއިތުވި އަހަރު އޯލެވެލް ހަދާފައި ވަނީ 20 ދަރިވަރުންނެވެ. 2017 ގައި އިމްތިޙާން ހަދާފައިވާ ދަރިވަރުންގެ ޢަދަދަށް ބަލާއިރު އޭގެ ދެގުނައަށްވުރެ 5 ކުދިން ދަށް ޢަދަދެކެވެ. ނަމަވެސް މި އަހަރުވެސް 7 “އޭ ޕުލަސް” ހޯދާފައި ވެއެވެ. މިފަހަރު 17 “އޭ” ހޯދާފައި ވުމުން މިއީ 7 “އޭ” ފާހުގެ ކުރިއެރުމެކެވެ. ނަމަވެސް މިފަހަރު ލިބިފައިވަނީ 26 “ބީ” އެވެ. ދަރިވަރުންގެ ޢަދަދާ އަޅާ ބަލާއިރު މިއީވެސް ކުރިއަށް ޖެހިލާފައިވާ ޢަދަދެއްކަމަށް ދަންނަވަން ޖެހެއެވެ. ހަމައެއާއެކު 20 ކުދިން މިވަނީ 32 ” ސީ” ފާސްވެސް ހޯދާފައެވެ. މިއީވެސް ދަރިވަރުންގެ ނިޞްބަތުން ކުރި އެރުމެއްކަމަށް ދެންނެވިދާނެއެވެ.
މަތީގައި ބަޔާން ކުރެވުނު ނަތިޖާ ތަކަށް ބަލާއިރު މިއަހަރު ނަތިޖާ ރަނގަޅުކަން ހާމަވޭ ނޫންތޯއެވެ. އެއާއެކު ފާހަގަ ކޮށްލާނަމެވެ. ނަތީޖާއަށް އަސަރު ފޯރާނެ ވަރަށް ގިނަ ކަންތައް ހުންނަކަމަށް މިކަމާގުޅޭ މާހިރުން ވިދާޅުވެއެވެ. ދަރިވަރުން ދިރިއުޅޭ މާޙައުލާއި މާޙައުލަށް އަންނަ ތަފާތު ބަދަލުތަކެވެ. ތަޢުލީމު ދިނުމަށް ދިމާވާ ގޮންޖެހުންތަކާއި ދަރިވަރުން ތަޢުލީމަށް ކުރާ މަސައްކަތެވެ. އެކަމަށް ހޭދަކުރަންލިބޭ ވަގުތާއި ކަމާގުޅުންހުރި އެކިފަރާތްތަކަށް މިކަމަށްކުރެވޭ މަސައްކަތެވެ. މިހެންގޮސް މިފަދަ އެތައް ކަމެކެވެ.
އަޅުގަނޑުމެން “ގޮއްކޮޅު” ގެ ފަރާތުން އެދެނީ ހަނިމާދޫ ސްކޫލަށް އަދަށްވުރެ އަދި މާފަގަތި މާދަމާއެކެވެ. ތަފާތު ގޮންޖެހުންތަކާއެކު ސްކޫލު ޙިއްސާވާ ހުރިހާ ފަރާތްތަކުން ކުރައްވަމުން ގެންދަވާ ބުރަ މަސައްކަތް ކާމިޔާބުވެ، ހަނިމާދޫ ސްކޫލުން އިތުރު ހަރުފަތްތައް ގިރާކުރާ މަންޒަރު ފެނުމެވެ. ކެޑޭޓާއި ސްކައުޓް އަދި ކަބްސްކައުޓް އުފައްދައި ކުރިއަށް ގެންދަވާ ފަދައިން އޭ ލެވެލް އުފައްދައި މަތީސާނަވީއަށްވެސް ރަށުގައި ތިބެގެން ކިޔެވޭނެ ގޮތް މަގުފަހިވެގެންދާ އުފާވެރި މަންޒަރު ފެނުމެވެ.
ނޯޓް: މަތީގައިވާ ޗާޓުގައި 0 ޖަހާފައިއެވަނީ އެމާއްދާ އެ އަހަރު ނުކިޔަވާތީއެވެ.
