އަލުން އަނބުރާ މެންޗެސްޓާ ޔުނައިޓެޑަށް ބަދަލުވެ ކުޅުނު ފުރަތަމަ މެޗުގައި ޕޯޗުގަލުގެ ތަރި ކްރިސްޓިއާނޯ ދެ ލަނޑު ޖަހައި، ނިއުކާސަލް ޔުނައިޓެޑް އަތުން އެ ޓީމު މޮޅުކޮށްދީފިއެވެ.
އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުން ޔުނައިޓެޑް މޮޅުވީ ނިއުކާސަލް އަތުން 4-1 ގެ ނަތީޖާއަކުންނެވެ.
ޔުވެންޓަސް ދޫކޮށް މި ސީޒަނުގައި ރޮނާލްޑޯ އަލުން ޔުނައިޓެޑަށް ބަދަލުވިއިރު، ޕޯޗުގަލުގެ ސްޕޯޓިން ލިޒްބަން ދޫކޮށް އޭނާ އެންމެ ފުރަތަމަ ޔުނައިޓެޑާ ގުޅުނީ 2003 ވަނަ އަހަރެވެ. އެކަމަކު 2008 ވަނަ އަހަރު ރޮނާލްޑޯ ވަނީ ޔުނައިޓެޑް ދޫކޮށް ރެއާލް މެޑްރިޑަށް ބަދަލުވެފައެވެ. އެހެންކަމުން ރޮނާލްޑޯ އަލުން ޔުނައިޓެޑުގެ ޖާޒީގައި ފެނިގެންމިދިޔައީ 12 އަހަރުގެ މެދުކެނޑުމަކަށްފަހުއެވެ.
ޔުނައިޓެޑަށް އަލުން ބަދަލުވެ ކުޅެދިން ފުރަތަމަ މެޗުގައި ރޮނާލްޑޯ ދެ ލަނޑު ޖެހިއިރު، މި މެޗުގެ ފުރަތަމަ އެގާރައިގައި ހިމެނިގެން އޭނާ ވަނީ ކުޅެފައެވެ. ޔުނައިޓެޑުގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މި ހާފުގެ އިތުރު ވަގުތުގައި ރޮނާލްޑޯ ވަނީ ޔުނައިޓެޑަށް ލީޑު ނަގައިދީފައެވެ.
އެކަމަކު ދެވަނަ ހާފު ފަށައިގެން 11 ވަނަ މިނެޓުގައި ހަވިއޭ މަންކީލޯ ވަނީ ނިއުކާސަލަށް ނަތީޖާ އެއްވަރުކޮށްދީފައެވެ. ނަމަވެސް އޭގެ ހަ މިނެޓު ފަހުން ލޫކް ޝޯ ދިން ޕާހަކުން ރޮނާލްޑޯ ވަނީ ލަނޑެއް ޖަހައި، ޔުނައިޓެޑަށް އަލުން ލީޑު ނަގައިދީފައެވެ. ދެން މި މެޗުގައި ޔުނައިޓެޑުން ކާމިޔާބުކުރި އަނެއް ދެ ލަނޑު މެޗުގެ ފަހުކޮޅު ކާމިޔާބުކޮށްދިނީ ބްރޫނޯ ފެނާންޑޭސް އާއި ބަދަލު ކުޅުންތެރިއެއްގެ ގޮތުގައި ކުޅެން އެރި ޖެސޭ ލިންގާޑެވެ.
![](https://gohkolhu.com/wp-content/uploads/2021/09/1_6-1024x538.jpg)
މި މެޗުން ޔުނައިޓެޑް މޮޅުވިއިރު، ލީގުގައި ހޮނިހިރު ދުވަހުގެރޭ ކުޅުނު މެޗުން އެންމެ ފަހުގެ ޗެމްޕިއަން މެންޗެސްޓާ ސިޓީވެސް ވަނީ މޮޅުވެފައެވެ. ރަށުން ބޭރުގައި ކުޅުނު މެޗުން ސިޓީ މޮޅުވީ ލެސްޓާ ސިޓީ އަތުން 1-0 ގެ ނަތީޖާއަކުންނެވެ.
ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ލަނޑެއް ފެނިފައެއް ނުވެއެވެ. މި މެޗުގައި ފެނިގެންދިޔަ ހަމައެކަނި ލަނޑު ސިޓީން ކާމިޔާބުކޮށްފައިވަނީ މެޗުގެ 62 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ބާނާޑޯ ސިލްވާއެވެ.
މި ނަތީޖާތަކާއެކު ޔުނައިޓެޑް އޮތީ ތާވަލުގެ އެއްވަނައިގައި ކުޅުނު ހަތަރު މެޗުން 10 ޕޮއިންޓާއެކުއެވެ. އަދި ތިންވަނައިގައި އޮތް ސިޓީއަށް ހަތަރު މެޗުން ލިބިފައިވަނީ ނުވަ ޕޮއިންޓެވެ.