2021 ވަނަ އަހަރުގެ ބަޖެޓުގައި ހަނިމާދޫއަށް ހިމެނި އެއްވެސް ކަމެއް ހާސިލުވެއްޖެ؟ އާދެ ހަތަރަކުން ސުމެކެވެ. ހަމަ ސުމެކެވެ. ސަރުކާރުން އެދުނުހައި މަގާމެއް އެދުނު ގޮތަކަށް ހަނިމާދޫ ރައްޔިތުން ދިނުމުންވެސް ރައްޔިތުންނަށް ދިނީ ހަމަ ސުމެކެވެ.
މާލެއިން އުތުރުގައި އެއްރަށެއްގައި އެންމެ ގިނަ ޕްރޮޖެކްޓް ހިނގާ ރަށަކީ ހަނިމާދޫއޭ ބުނެ ދާއިރާގެ މެންބަރު ހަމަޖައްސާލަނީއެވެ. މީގެ އެތަށް އަހަރެއްކުރިން ޕްރޮޖެކްޓްތައް ހިނގިކަން ރައްޔިތުންނަށް އެނގެއެވެ. ނުވާކަމަކީ އެ ޕްރޮޖެކްޓްތައް ކޮންޕުލީޓްވުމެވެ. އެހެންކަމުން އެއްރާގެއް އަޑުއަހާކަށް ރައްޔިތުމީހާ ބޭނުންނުވާނެއެވެ.
2021 ވަނަ އަހަރުގެ ބަޖެޓުގައި ބޮޑެތި އަދަދަތުތައް ޖަހާ ހަނިމާދޫއަށް 4 ޕްރޮޖެކްޓެއް އެ ބަޖެޓުގައި ކަނޑައަޅާފައިއޮތެވެ. އެއިން ހަމަ އެއްވެސް ކަމެއް ހާސިލުނުވެއެވެ. ދައްކަނީ ބަހާނާއޭ! ދެނީ ތާރިހަކަށްފަހު ތާރިހެކެވެ. ވެރިކަމުން ފެށިގެން މަޖިލީހާއި ހަނިމާދޫ ކައުންސިލުގެ ގޮނޑިތައްވެސް ރައްޔިތުން ބޮޑުތަނުން ދިނީ ވެރިކަންކުރާ ޕާޓީއަށެވެ. ފެންނަން އޮތް ހަގީގަތަކީ ކޮވިޑަށްފަހުވެސް ރަށްރަށުގެ ޕްރޮޖެޓްތައް ނިމި ހުޅުވަމުންދާތަނެވެ. ފަހެ ދައްކާނެ ބަހަނާއެެއް އެބައޮތް ހެއްޔެވެ؟
ހަނދާން އައުކޮށްލަން 2021 ވަނަ އަހަރު ބަޖެއްޓުގައި ހަނިމާދޫއަށް ކަނޑައަޅާފައިވާ ކަންތައް މިތަނުގައި ލިޔާނަމެވެ. ހަނިމާދޫގަައި ފަތާ ސަރަހައްދު ހެދުމާއި، އެއަރޕޯޓް އަޕްގްރޭޑްކުރުމާއި، ޒޯނު 1 ގެ ރީޖަނަލް ވޭސްޓް މެނޭޖުމަންޓް ޕްރޮޖެކްޓް އަދި ވިޔަފާރި ބަނދަރުތަކުގައި ގަސްގަހާގެއްސާއި ޖަނަވާރު ކަރަންޓީންކުރުމުގެ ޚިދުމަތް ގާއިމުކުރުމެވެ. މިތަނުން ފުރަތަމަ ބަލައިލާނީ ފަތާ ސަރަހައްދުގެ ޕްރޮޖެކްޓަށެވެ.
ހަނިމާދޫ ގައި ފަތާ ސަރަހަދެއް ގާއިމުކުރުމަށް ބަޖެޓްކުރެވުނެވެ. އެއީ 712،500 ރުފިޔާގެ ޕްރޮޖެކްޓެކެވެ. މިޔާއެކު ރައްޔިތުން ތިބީ މި ފަތާ ސަރަހަދެއްގެ އިންތިޒާރުގައެވެ.
ފަތާ ސަރަހައްދުގެ އަޑެއް ބަޑެއް ނީވި، އޮއްވާ ކައުންސިލް އިންތިހާބު ބޯމަތިވިއެވެ. އެޔާއެކު ފަތާ ސަރަހައްދު ތަރައްޤީކުރުން އޮތްކަމާ ދާދި އަވަހަށް ފެށޭނެކަމަށް އިއުލާންކުރެވިގެންދިޔައެވެ. އެޔާއެކު ސަރުކާރުން އެދުނު ގޮތަށް ޕްރޮޖެކްޓެއް މެކުހައް ޖެހުމަށް ސަރުކާރަށް ކައުންސިލް ހިބައިން ރައްޔިތުންދިނެވެ. އެޔާއެކު ފަތާ ޓުރެކްގެ އަޑުގަދަވެ އެ ސަރަހައްދު މިއަހަރު އެޅޭނެކަމަށް އެތައް މަހައްލެއްގައި އެމްޑީޕީ ކައުންސިލަރުން ދެއްކިއެވެ. ހުސް ހޮޅި ވާހަކައެވެ. މި ބޭފުޅުންނާއި ސަރުކާރުގެ ހަނދާނަތުގައި ނެތީ ކަންނޭނގެއެވެ. އައު ކައުންސިލުގެ ކުރިންވެސް އޮތީ އެމްޑީޕީ މެޖޯރިޓީ ކައުންސިލެއްކަމެވެ.
އާއެކެވެ. ހޮޅި ވާހަކައެވެ. މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގެ ދަށުން ހަރަދު ކުރަން އޮތް މި ޕްރޮޖެކްޓް މިއަހަރު ނުވާނެކަން މިހާރުވަނީ ހަނިމާދޫ ކައުންސިލަށް އަންގާފައެވެ.
” އަޅުގަނޑު އެ ކޮޅަށް ގުޅައިލީމަ ބުނީ މިއަހަރު ތި މަސްރޫއަށް ހަރަދު ނުކުރެވޭނެ ކަމަށް ފިނޭންސުން ވިދާޅުވިއޭ” ކައުންސިލް މެންބަރ ނާޒިޔާ ވިދާޅުވިއެވެ.
މީގެން އަޅުގަނޑަށް ދޭހަވީ، ކައުންސިލު އިންތިހާބުގައި އަޑަށް ބާރުލާ މިދެއްކީ އުއްމީދެއްނެތް ހިޔާލީ ވާހަކަތަކެއްކަމެވެ. އެކަން ވާނެކަމުގެ ކަށަވަރުކަން ހޯދާފައިނެތް އަމިއްލައަށް ފެނުނު ވާހަކަތަކެއްކަމެވެ. އެހެންނޫންނަމަ، މިއަހަރު މި ޕްްރޮޖެކްޓް ފެށޭނޭ ބުނަންވީ ކީއްވެ ހެއްޔެވެ؟ ނޫނީ ނުފެށޭނެކަން އެނގިހުރެ އޮޅުވާލީ ހެއްޔެވެ.
ދެވަނަ ކަމެއްގެ ގޮތުގައި ފާހަގަކޮށްލާނީި ހަނިމާދޫ އިންޓަރނޭޝަނަލް އެއަރޕޯޓް އަޕްގްރޭޑްކުރުމުގެ ވާހަކައެވެ. މިއީ ހަމަ އިބިލީހުގެ ކައިވެނި ކުރުންކަހަލަ ކަމަކަށް މިވަނީވެފައެވެ. އަދުނޫން މާދަމައަށްވެފައެވެ. ރައްޔިތުންނަށް ޝޮކެއް ލިބެންވީ ކީއްވެ ތޯއެވެ. އެތައްކަމަކަށް ގެންގުޅެނީ މި ފިލޯސަފީކަން ނޭނގެނީ ތޯއެވެ. މިސާލަކަށް އިންޓަރނެޓާއި މިނިމަމްވޭޖެވެ.
އިބްރާހީމް މުހައްމަދު ސޯލިހު ވެރިކަމާ ހަވާލުވީ މުޅި އުތުރަށާއި ހަނިމާދޫ ރައްޔިތުންނަށް ހަނިމާދޫ އެއަރޕޯޓްގެ ބިޔަބޮޑު މަސްރޫޢު ދައްކަމުންނެވެ. ޔަގީނުންވެސް އެމްޑީޕީއަށް އާއެކޭ ބުނުމުގައި މި މަޝްރޫއުގެ އުއްމީދު އޮންނާނެއެވެ. އެއީ މިއީ އެއްވެސް ސަރުކާރަކުން އަޅައިނުލާ ހުވަފެންދެއްކި ކަމަކަށްވެފައި އޮތަތީއެވެ. މި މިމަޝްރޫއުގެ އަޑު ދޭތެރެޔަކުން އިވި އަޑު ކެނޑި ދެއެވެ. މިތިބީ ބަލާށެވެ. މި މަހުގެ 29 ވަނަދުވަހު އެއްބަސްވުމުގައި ސޮއި ކުރުމަށްވަނީ ހަމަޖައްސާފައިކަމަށް ސަރުކާރުން ބުނާތީއެވެ. އަންނަ މަސް، އަންނަ ހަފްތާގެ ފިލޯސަފީ މިކަމަށް އެޕްލައިނުވެއްެޖެނަމަ ކިތަންމެހާވެސް އުފާވެރިއެވެ.
ތިންވަނަ އަދި ހަތަރު ވަނަ ކަމެއްގެ ގޮތުން އޮތީ ޒޯނު 1 ގެ ރީޖަނަލް ވޭސްޓް މެނޭޖުމަންޓް ޕްރޮޖެކްޓް އަދި ވިޔަފާރި ބަނދަރުތަކުގައި ގަސްގަހާގެއްސާއި ޖަނަވާރު ކަރަންޓީންކުރުމުގެ ޚިދުމަތް ގާއިމުކުރުމެވެ. މި ދެ ކަންތަކުގެ ހަބަރު މިވީހައިތަނަން ނެތެވެ. ފަހަރުގައި މިއީ ނަމެއްގައި ޖަހާލާފައި އޮތް ދެ ޕްރޮޖެކްޓަށް ވެދާނެއެވެ. ހައްގު މިންވަރާއި އޮޅުވާނުލުމާއި ދެފުއްފެނުމާއި އިޚްލާސްތެރިކަމުގެ ރަންވަނައިގައި ވެރިކަންކުރާނެކަމަށް ބުނި ސަރުކާރެވެ. މަޖިލީހެވެ. ކައުންސިލެވެ.
ނިންމާލުމުގެ ކުރިން އަދި އެއް ވާހަކަ ލިޔެލާނަމެވެ. އެއީ ގައުމުގެ އެންމެ އިސްވެރިޔާ ކަމެއްކުރަން ނިންމެވުމުންވެސް މިނިސްޓިރީއަކުން އެކަމަށް ހުރަހަކަށްވާ ވާހަކައެވެ. މިއީވެސް ހަނިމާދޫއަށް އޮތް ކަމަކީ ކަންނޭނގެވެ. ފޫގަޅާފައި މިނިސްޓަރުންނާއި އޮފިސަރުން ޖަވާބުދާރީ ކުރުވާ މަޖިލިސް މެންބަރުން މިކަމުގައި ކޮބައި ހެއްޔެވެ؟
ހަނިމާދޫ ބަނދަރަށް ގެންނަން ޖެހޭ ބަދަލުތައް ގެނައުމަށް ރައީސް ނިންމަވައި ކުރެހުން ފޮނުވުމުން އެގޮތަށް އެކަން ނުކުރެވޭނެކަމަށް މިނިސްޓްރީއަކުން ބުނާކަމަށް ހަނިމާދޫ ކައުސިލުގެ މެންބަރުންތަކެއް ބުނަމުންދާތާ ދުވަސްކޮޅެއް ފާއިތުވެއްޖެއެވެ. ޔަގީންވާކަމަކީ ޕްލޭނިން މިނިސްޓަރާއި ފިނޭންސް މިނިސްޓަރަށްވެސް ހުރީ އެމްޑީޕީގެ ދެ ބޭފުޅުންކަމެވެ.
