ނިޝާން ޢިއްޒުއްދީން ޢިއްޒަތުގެ ވެރިޔާ ޢުމަރު ޒާހިރު ފަސްދާނުލައްވައިފިއެވެ. ފަސްދާނުލެއްވީ ގަލޮޅު ސަހަރާގައެވެ. މޫނު ދެއްކުން ކުރިއަށްގެންގޮސްފައިވަނީ ހުޅުމާލޭ ސަހަރާގައެވެ.
އުމަރު ޒާހިރުގެ ކަށުނަމާދު ކުރުން އޮތީ ޢިޝާ ނަމާދަށްފަހު އިސްލާމީ މަރުކަޒުގައެވެ. ކަށު ނަމާދާއި ފަސްދާނުލެއްވުމުގެ ކަންކަމުގައި ރަޢީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙްއާއި ނައިބު ރައީސް ފައިޞަލް ނަސީމް އާއި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ބައިވެރިވެވަޑައިގެންނެވިއެވެ. މީގެއިތުރުންވެސް ގިނަ ބަޔަކު މިކަށުނަމާދުގައި ބައިވެރިވިއެވެ.
ނޢޢވ ޢުމަރު ޒާހިރު އަވަހާރަވީ ކޯވިޑްގެ އާލާސްކަންފުޅަށް ފަރުވާ ހޯއްދަވަމުން ގެންދަވަނިކޮށް މިއަދު މެންދުރުގެ ވަގުތެއްގައެވެ. އަވަހާރަވީއިރު އުމުރުފުޅަކީ 85އަހަރެވެ.
އެމަނިކުފާނު ވަނީ ދިވެހި ދަޢުލަތަށް 50 އަހަށްވުރެ ގިނަ އަހަރު ޚިދުމަތް ކުރައްވާފައެވެ. އެގޮތުން 1953 އިން ފެށިގެން 2008ވަނަ އަހަރާހަމައަށް ސަރުކާރުގެ އެކި ފަންތީގެ 26 މަޤާމެއް ފުރުއްވާފައިވެއެވެ. ޢުމަރު ޒާހިރަށް، ނިޝާން ޢިއްޒުއްދީންގެ ޢިއްޒަތުގެ ވެރިޔާގެ ލަޤަބު ލިބިވަޑައިގެންނެވީ 2008ވަނަ އަހަރުގެ ނޮވެމްބަރުމަހުގެ 10ވަނަ ދުވަހުއެވެ.
އުމަރު ޒާހިރުވަނީ އެކި ދާއިރާތަކުން ދިވެހި ޤައުމަށް ޚިދުމަތްކުރައްވާފައެވެ. އޭގެ ތެރޭގައި އުމްރާނީ ތަރައްޤީއާ ތަޢުލީމާ ކުޅިވަރުގެ ދާއިރާފަދަ ދާއިރާތައް ހިމެނެއެވެ.
