ޓެކްސީ ދަތުރުތައް ކޮށްދޭ އަގުތައް ބޮޑުކޮށްދޭން ސަރުކާރުން އެއްބަސްނުވުމުން، ޓެކްސީ ހޯދަން ހަދާފައިވާ މޮބައިލް އެޕްލިކޭޝަންތައް ޑައުންކޮށް، ޓެކްސީ ސެންޓަރުތައް ވެސް މިއަދު ބަންދުކޮށްފި އެވެ.
ތެލުގެ އަގު މިދުވަސްކޮޅު އުފެލުމުންދާތީ، މިއަދުން ފެށިގެން ޓެކްސީ ދަތުރުތައް ކޮށްދޭ އަގުބޮޑުކުރަން ސެންޓަރުތަކުން ނިންމައި، މިދިޔަ އާދީއްތަ ދުވަހު އެކަން ޓްރާންސްޕޯޓް މިނިސްޓްރީ އަށް އެންގި އެވެ. ނަަމަވެސް ޓްރާންސްޕޯޓް މިނިސްޓްރީން އެކަމަށް އިޖާބައެއް ނުދިނެވެ.
ޓެކްސީ ސެންޓަރުތަކުން ދިން މުހުލަތު މިއަދު މެންދުރު 2:00 ގައި ހަމަވިއިރު ވެސް ސަރުކާރުން އެއްވެސް އިޖާބައެއް ނުދިނުމުން އެންމެ ފަހުން މާލެ އާއި ހުޅުމާލޭގައި ދުއްވާ ޓެކްސީ ސެންޓަރުތަކުން ވަނީ ދަތުރުތައް ހުއްޓާލައި އިހުތިތާޖު ކުރަން ފަށައިފަ އެވެ.
ޓެކްސީ ޑްރައިވަރުން އިހުތިޖާޖުކުރަމުން ގެންދަނީ ހުޅުމާލޭގެ ރުއްގަނޑު ސަރަހައްދުގަ އެވެ.
ޓެކްސީތައް ދަތުރުކުރުން ހުއްޓާލައި، ޓެކްސީ އެޕްލިކޭޝަންތައް ބޭނުން ނުކުރެވޭ ގޮތް ހެދުމުން ގިނަ ބަޔަކު ދަނީ ހިތްހަމަނުޖެހުން ފާޅުކުރަމުންނެވެ.