މާލޭގައި މިނީ ބަހުގެ ޚިދުމަތް ފަށަން ކުރަމުން އަންނަ މަސައްކަތްތަކުގެ ދަށުން މަޖީދީ މަގުގައި ޕާކު ކުރުން މަނާކޮށްފިއެވެ.
މާލެ ސިޓީ ކައުންސިލުން ވަނީ މަޖީދީ މަގުގައި ޕާކު ކުރުން މަނާކަން އެންގުމަށް މަގުގެ ދެ ފަރާތުގައި ވެސް ރޮނގު ދަމާފައެވެ. ބައެއް ސަރަހައްދުތަކުގައި ޕާކު ނުކުރެވޭކަން އެންގުމަށް ކޯނުވެސް ވަނީ ޖަހައިފައެވެ.
މާލޭގައި މިނީ ބަހުގެ ޚިދުމަތް ފެށުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި ސިޓީ ކައުންސިލާއި ފުލުހުން ގުޅިގެން އަންނަނީ ޓްރެފިކަށް ގެންނަން ޖެހޭ ބަދަލުތަކާއި ޕާކިންއަށް ގެންނަން ޖެހޭ ބަދަލުތަކާއި ބަސް ސްޓޮޕްތައް ބެހެއްޓުމުގެ މަސައްކަތް ކުރަމުންނެވެ.
މިނީ ބަހުގެ ދަތުރުތައް މާލޭގައި ފެށުމަށް މަގުތަކުގެ ޕާކިން ޒޯންތައް ނަގައި އެ ތަންތަނުގެ ބަދަލުގައި މިހާރު ހަތަރު ސަރަހައްދަކުން ބިން ވެސް ވަނީ ހަމަޖައްސައިދީފައެވެ. އެއީ ހ. ސަމޯސާވިލާ ގޭގެ ބިމުން ބަޔަކާއި އެކުވެނި ޓްރެކް ކައިރިން ދެ ތަނަކާއި ދަރުބާރު ގޭގެ ކައިރި އާއި ރަސްފަންނު ކައިރި ކޮރަލް ބުލިވަރޑް ކައިރި އޮންނަ ސަރަހައްދެވެ.