ބަހްރައިންގެ ރަސްގެފާނު ޙަމަދު ބިން އީސާ އަލް ޚަލީފާގެ ދައުވަތަކަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެ ގައުމަށް ކުރައްވާ ދަތުރުފުޅުގައި ރާއްޖެއާއި ބަހްރައިނާ ދެމެދު އޮންނަ ގުޅުން ބަދަހިކުރުމުގެގޮތުން ހަތަރު އެއްބަސްވުމެއްގައި ސޮއިކޮށްފިއެވެ.
އެއްބަސްވުންތަކުގައި ސޮއިކުރުމުގެ ރަސްމިއްޔާތު ބޭއްވީ ބަހްރައިންގެ އަލް ޤުޟައިބިއްޔާ ޕެލަސްގައެވެ. އެ ރަސްމިއްޔާތުގައި ރައީސް އިބްރާހީމް މުހައްމަދު ޞާލިހާއި، ބަހްރައިންގެ ރަސްގެފާނު، ޙަމަދު ބިން ޢީސާ އަލް ޚަލީފާ ބައިވެރިވެވަޑައިގެންނެވިއެވެ.
މި އެއްބަސްވުންތަކުގެ ތެރޭގައި ހިމެނޭ “މެމޮރަންޑަމް އޮފް އަންޑަސްޓެންޑިން އޮން ޕޮލިޓިކަލް ކޮންސަލްޓޭޝަންސް” އަކީ، ބައިނަލްއަޤުވާމީ ގުޅުންތަކާ ގުޅޭ ގޮތުން ދެ ގައުމުގެ މެދުގައި ޚިޔާލާއި މަޝްވަރާ ބަދަލު ކުރުމާ ގުޅޭ އެއްބަސްވުމެކެވެ.
މީގެ އިތުރުން ބަދަލު ކުރެވުނު އަނެއް އެއްބަސްވުމަކީ، “މެމޮރަންޑަމް އޮފް އަންޑަސްޓެންޑިން ފޯ ކޯޕަރޭޝަން އޮން ޑިޕްލޮމެޓިކް ޓްރެއިނިން އެންޑް އެކްސްޗޭންޖް އޮފް އިންފޮމޭޝަން އެންޑް ޑޮކިއުމެންޓޭޝަން” އެވެ. މިއީ ބަޙްރައިންގެ މުޙައްމަދު ބިން މުބާރަކް އަލް ޚަލީފާ އެކެޑަމީ ފޯ ޑިޕްލޮމެޓިކްސް ސްޓަޑީޒް އާއި ރާއްޖޭގެ ފޮރިން ސާވިސް އިންސްޓިޓިއުޓާ ދެމެދު ވެނުނު އެއްބަސްވުމެކެވެ.
މިއަދު ބަދަލު ކުރެވުނު ތިންވަނަ އެއްބަސްވުމަކީ، “މެމޮރަންޑަމް އޮފް އަންޑަސްޓެންޑިން އޮން ކޯޕަރޭޝަން އިން ދި އޭރިއާ އޮފް ޔޫތް އެންޑް ސްޕޯޓްސް ޑިވެލޮޕްމެންޓް” އެވެ. މިއީ ޒުވާނުންނާއި ކުޅިވަރު ކުރިއެރުވުމުގެ ދާއިރާއިން ދެޤައުމުގެ މެދުގައި ގުޅުން ބަދަހިކުރުމުގެ އެއްބަސްވުމެކެވެ.
މީގެ އިތުރުން މިއަދު ވަނީ، “މެމޮރަންޑަމް އޮފް އަންޑަސްޓެންޑިން އޮން ކްލައިމެޓް ޗޭންޖް”، މޫސުމީ ބަދަލުތަކާ ގުޅޭ ގޮތުން ދެ ގައުމުން ގުޅިގެން މަސައްކަތް ކުރުމުގެ އެއްބަސްވުމެއްވެސް ބަދަލުކޮށްފައެވެ.
މިއަދު ބަދަލު ކުރެވުނު އެއްބަސްވުންތަކުގެ ތެރެއިން، “މެމޮރަންޑަމް އޮފް އަންޑަސްޓެންޑިން އޮން ކޯޕަރޭޝަން އިން ދަ އޭރިއާ އޮފް ޔޫތް އެންޑް ސްޕޯޓްސް ޑިވެލޮޕްމެންޓް” ގައި ރާއްޖޭގެ ފަރާތުން ސޮއިކުރެއްވީ، ޔޫތު މިނިސްޓަރު އަޙްމަދު މަހުލޫފެވެ. ބާކީ ހުރި އެއްބަސްވުންތަކުގައި ރާއްޖޭގެ ފަރާތުން ސޮއިކުރެއްވީ، ފޮރިން މިނިސްޓަރު ޢަބްދުﷲ ޝާހިދެވެ.
މި ރަސްމިއްޔާތުގައި ވަނީ އިތުރު ދެ އެއްބަސްވުމެއް ވެސް އިއުލާނުކޮށްފައެވެ. ފުރަތަމަ އެއްބަސްވުމަކީ، ބަހްރެއިންގެ ގްލޯބަލް ސީޓުއެއާ ލޮޖިސްޓިކްސް ހަބުގައި ސީޓުއެއާ ބައިވެރިއެއްގެ ގޮތުގައި ރާއްޖެ ހިމެނުމާ ގުޅޭ އެއްބަސްވުމެކެވެ.
ދެވަނަ އެއްބަސްވުމަކީ ބަޙްރައިންގައި ހުންނަ ޑޭޓާ ސެންޓަރުތަކުގައި، ދިވެހިސަރުކާރުގެ މައުލޫމާތު ރައްކާކޮށް، އަމިއްލައަށް ބެލެހެއްޓުމަށް ބަހުރައިނުން ފުރުސަތުދިނުމުގެ އެއްބަސްވުމެކެވެ.