ހަނިމާދޫ ކައުންސިލުން އެރަށުގެ ދަނޑުވެރިން މަގުމަތި ކޮށްލިތާ އަހަރެއްވީއެވެ.
2021 ވަނަ އަހަރު މެއި މަހު ވުޖޫދުވި ހަނިމާދޫ 4 ވަނަ ކައުންސިލުން ދަނޑުވެރިން މަގުމަތި ކޮށްލީ 2021 އޮކްޓޫބަރ 21 ވަނަ ދުވަހުއެވެ. އެއާއެކު ދަނޑުވެރިން ދަނޑުވެރިކަން ކުރާނެ ބިމެއް ނެތި އެމަސައްކަތް ހުއްޓުމަކަށް އައެވެ. ބައެއް ދަނޑުވެރިން މީހުން ދިރިއުޅުމަށް ދޫކޮށްފައިވާ ގެތަކުގައި ކުއްޔަށް ދަނޑުވެރިކަން ކުރަންފެށިއެވެ.
ހަނިމާދޫ ކައުންސިލަށް ބިމެއް ލިބޭނީ ކިހިނެއްތޯ ސުވާލު ކޮށްލުމުން، “ލޭންޑް ޔޫސް ޕުލޭން ފާސްވުމުން ބިންލިބޭނެކަމަށް” ގެންދިޔައީ ބުނަމުންނެވެ.
ނަމަވެސް އެދުވަސްތަކުގައިވެސް ނުސީދާކޮށް ދަނޑުވެރިނަށް މަލާމަތް ކުރާ ބީދައިން ބިމެއް ނެތި ދަނޑުވެރިކަން ކުރާ ފަރާތްތަކަށް ކޯހެއް ހިންގަން އިއުލާން ކުރިއެވެ. އަދި ދާދިފަހުން ދަނޑުވެރިން ހައްދާ އެއްޗެހި ދައްކާލުމަށް މައުރަޒެއް ބޭއްވިއެވެ. އެތަނަކުން ދަނޑުވެރިއެއް ނުފެނުނެވެ. ވާނީވެސް އެހެން ނޫންހެއްޔެވެ. އެވެރިން ތިބީ މަގުމަތި ކޮށްފައެވެ. ފަހަރުގައި އެއީ މިސަރުކާރުން ބުނާ ހައްގުވާ މިންވަރަށް ވެދާނެއެވެ. ޖަޒީރާ ދިރިއުުޅުމުގެ ބޯޑު އަޅުވައިގެން އައިސް ޖަޒީރާ ވަންތަކަމެއް ކޮބައިހެއްޔެވެ.
ސަރުކާރުން ލޭންޑު ޔޫސް ޕުލޭން ފާސްކޮދިނުމުން ރައްޔިތުންވެސް ވަނީ އެ އޮތްގޮތަށް މިމަހުގެ 2 ވަނަ ދުވަހު ފާސްކޮށްފައެވެ. އެއާއެކު އެއަށް އަމަލުކުރުމަށް ފެށެއެވެ. އެރޭ ރައްޔިތުން ދަނޑުބިމާ ބެހޭ ގޮތުން ސުވާލު ކުރުމުން 1 ހަފުތާ ނުވަތަ 2 ހަފުތާތެރޭ އިއުލާން ކުރެވިގެން ދާނެކަމަށް ބުންޏެވެ. ނަމަވެސް 3 ވަނަ ރަސްމީ ހަފުތާ ނިމުނުއިރުވެސް ކައުންސިލުގެ ބަހެއްނެތެވެ.
ދަނޑުވެރިނަން ބިން ދޫކުރުން މިހާރު ގޮސްފައިވާ ގޮތެއް އޮޅުންފިލުވާލުމުން، ދަނޑުވެރިކަމާގުޅޭ ކަންކަމަށް ހަނިމާދޫ ކަައުންސިލުން ކަނޑައަޅާފައިވާ ކައުންސިލަރު ޙަރިޡާ މުހައްމަދު ވިދާޅުވީ އަންނަ އާދިއްތަ ދުވަހުގެ ޖަލުސާގައި އުސޫލު ފާސްކޮށް ބިންދޫކުރަން އިއުލާން ކުރަން ތައްޔާރުވަމުން ދާކަމަށެވެ.
އަނެއްކާވެސް މިއޮތީ ތާރީހެއް ދީފައެވެ. މިފަހަރު ވާނީ ކިހިނެއްބާއެވެ. ތާރީހަކަށްފަހު ތާރީހެއްދީ ރައްޔިތުން ގުނބޯ ހެއްދުމަކީ މި ސަރުކާރުން މާކުރާހިތްވާކަމަކީ ތޯއެވެ.
