މާލޭ އިސްކަންދަރު މަގާއި ކޯރުކެނޑި މަގު ގުޅޭ ކަންމަތީގައި ހުރި ގަރާޖެއްގައި ރޯވެ ހިނގި އަލިފާނުގެ ހާދިސާއެއްގައި ގިނަ ބަޔަކު މަރުވެއްޖެ އެވެ.
އެމްއެންޑީއެފްގެ މީޑިއާ އޮފިޝަލް ވިދާޅުވީ، އަލިފާން ރޯވި ގޭގައި ދިރިއުޅުނު މީހުންގެ ފަރާތުން އެނގިފައިވާ ގޮތުގައި 9 މީހަކު މަދުވެފައިވާކަމަށާއި، މިހާތަނަށް 9 މީހުން ފެނުނު އިރު 8 މީހަކު މަރުވެފައިވާ ކަމަށެވެ.
އެކަކަށް އައިޖީއެމްއެޗް ހޮސްޕިޓަލުގައި ފަރުވާ ދެމުން އަންނަކަމަށް އެމްއެންޑީއެފްގެ މީޑިއާ އޮފިޝަލް ވިދާޅުވި އެވެ.
އެމްއެންޑީއެފް އިން ބުނީ އަލިފާނުގެ ހާދިސާގެ މައުލޫމާތު ރޭ ދަންވަރު 12:30 ހާއިރު ލިބުމާ ގުޅިގެން ފަޔަ އެންޑް ރެސްކިއުން އެ ސަރަހައްދުގައި ހަރަކާތްތެރިވަމުން އަންނަ ކަމަށެވެ. އަދި އަލިފާންގަނޑު ކޮންޓްރޯލް ކުރެވިފައި ވަނީ ފަތިހު 4:34 ހާއިރު ކަމަށް ސިފައިން ބުންޏެވެ.
އަލިފާން ރޯވީ އިސްކަންދަރު މަގާއި ކޯރުކެނޑި މަގާއި ގުޅޭ ކަންމަތީގައި ހުރި ގަރާޖެއްގައެވެ. އެއީ މ. މ. ސެންރޯސް ކިޔާ ގެއެއްގައި ހުންނަ ގަރާޖެކެވެ.
ފުލުހުންނާއި ސިފައިން އަންނަނީ އަދިވެސް އެސަރަހައްދުގައި ހަރަކާތްތެރިވަމުންނެވެ.
