އެސްޓީއޯއިން ހުޅުމާލެ ހޮސްޕިޓަލުގެ އައިސީޔޫ އަކާއި އެންއައިސީޔޫއެއް ތަރައްގީ ކުރަން ނިންމައި، އެކަމުގެ އެއްބަސްވުމުގައި އެ ހޮސްޕިޓަލާއެކު ސޮއިކޮށްފި އެވެ.
މިއަދު އެސްޓީއޯ ހެޑް އޮފީހުގައި ބޭއްވި ރަސްމިއްޔާތެއްގައި އެސްޓީއޯގެ ފަރާތުން އެ އެއްބަސްވުމުގައި ސޮއިކުރެއްވީ އެސްޓީއޯގެ ސީއީއޯ އަދި މެނޭޖިން ޑިރެކްޓަރު އަބްދުﷲ ސައީދެވެ. ހުޅުމާލެ ހޮސްޕިޓަލްގެ ފަރާތުން ސޮއިކުރެއްވީ އެ ހޮސްޕިޓަލްގެ ސީއީއޯ މާރިޔާ ސައީދެވެ.
ހުޅުމާލޭގެ ދެ ވަނަ ފިޔަވަހީގައި މީހުން އާބާދުވުމުން ހުޅުމާލެ ހޮސްޕިޓަލުން ހިދުމަތް ހޯދާ މީހުންގެ އަދަދު އިތުރުވެފައިވީ ނަމަވެސް ހުޅުމާލޭގައި މި ވަގުތު ހުރީ ޖުމުލަ 17 އައިސީޔޫ އެނދެވެ.
އެސްޓީއޯއިން ބުނީ އެ ކުންފުނިން ކުރިއަށް ގެންދާ މަޝްރޫއުގެ ދަށުން ހުޅުމާލެ ހޮސްޕިޓަލުގައި އިތުރު 24 އައިސީޔޫ އެނދު ހުންނާނެ ކަމަށެވެ. އަދި މަޝްރޫއު ނިމޭއިރު، ހުޅުމާލެ ހޮސްޕިޓަލުގެ އައިސީޔޫ އަދި އެންއައިސީޔޫއަކީ އެންމެ ޒަމާނީ މެޑިކަލް ވަސީލަތްތަކާއި ސިއްހީ އާލާތްތަކާއެކު އިންޓެގްރޭޓް ވެފައިވާ، ކަސްޓަމައިޒްޑް ތަނަކަށްވާނެ ކަމަށް ބުންޏެވެ.
އެސްޓީއޯ އިން ހުޅުމާލެ ހޮސްޕިޓަލުގައި އައިސީޔޫއާއި އެންއައިސީޔޫ ތަރައްގީ ކުރަން ހަވާލުވި އިރު، އައިޖީއެމްއެޗުގައި މިހާރު ގާއިމުކޮށްފައިވާ ސެންޓްރަލް ސްޓެރެލައިޒޭޝަން ޑިޕާޓްމަންޓަކީވެސް އެސްޓީއޯއިން ކުރިއަށްގެންދިޔަ މަޝްރޫއެކެވެ.
