ހ.ވެލްގްރޯ ޝަހީދު އަލްމަރްހޫމް އަހުމަދު ރަޝީދަކީ ޓެކްސީ ޑްރައިވަރެކެވެ.
1988 ނޮވެމްބަރު 3 ވަނަ ދުވަހުގެ ފަތިހު 4:30 ހާއިރު ބަޑީގެ އަޑު އިވެމުންދާތީ ވެގެން އުޅޭ ގޮތެއް ބަލަން ހ.ރޫމޭނިޔާ އަހުމަދު ސަލީމް އާއި ދެމީހުން ސައިކަލެއްގައި މެރިންޑްރައިވަރުން އިރުން ހުޅަނގަށް ދުއްވާފައިދިޔަ އެވެ.
ސައިކަލް ދުއްވަން އިނީ އަހުމަދު ސަލީމް އެވެ. އަހުމަދު ރަޝީދު އިނީ ސައިކަލް ފަހަތުގައި އެވެ. މިދެމީހުން ދުއްވާފައި ގޮސް ފާށަނާ ބިލްޑިންގ ގެ މެދަކާއި ހަމައަށް ދިޔަތަނާ ކަނީރު ހިނގުމުން ދުޝްމިނުން ބަޑި ތަޅައިގަތް އަޑު އިވުނެވެ.
އޭރު ސިފައިންގެ ކުރިމަތީގައި އޮންނަ ކާނޭށިއޮން ހިނގުމުގެ އުތުރުކޮޅުގައި ދުޝްމިނުން ހަރަކާތްތެރިވާތަން ފެނުނެވެ. އެވަގުތު އަހުމަދު ރަޝީދު، އަހުމަދު ސަލީމްގެ ގާތުގައި ތިޔަކޮޅަށް ދިޔުން ރަނގަޅެއް ނޫނޭ ބުނުމުން، އަހުމަދު ސަލީމް ސައިކަލް އަނބުރާލި އެވެ.
ކާނޭށިއޮން ހިނގުމުގައި ތިބި ދުޝްމިނުން އަހުމަދު ސަލީމް އާއި އަހުމަދު ރަޝީދާއި ދެމީހުން ދުއްވަމުންދިޔަ ސައިކަލާއި ދިމާލަށް ބަޑިޖެހުމާއި އެކު ސައިކަލުގެ ފަހަތުގައި އިން ޝަހީދު އަހުމަދު ރަޝީދުގެ ގަޔަށް ވަޒަން އަރައި ސައިކަލުން އޭނާ ވެއްޓުނެވެ.
ދުޝްމިނުން ބަޑިޖަހަމުން ދަނިކޮށް ސައިކަލުގައި އަހުމަދު ސަލީމް މެރިންޑްރައިވަރުން ހުޅަނގުން އިރަށް ބާރު ސްޕީޑްގައި ދުއްވާފައި ދަނިކޮށް އޭނާގެ ވާތު ފަޔަށް ވަޒަން އެރި އެވެ. އެވަގުތު މެރިންޑްރައިވަރުގައި ހުންނަ ބީޗްކެފޭ ކުރިމައްޗަށް ސައިކަލާއެކު އޭނާ ވެއްޓުނެވެ.
ޝަހީދު އަލްމަރްހޫމް އަހުމަދު ރަޝީދު ޝަހީދުވެގެން ވެއްޓިފައި އޮތީ ފާށަނާ ބިލްޑިންގ ގައި ހުންނަ އެއާ މޯލްޑިވްސް ކުރިމަތީގައި އެވެ. ޝަހީދުވިއިރު އުމުރަކީ 24 އަހަރެވެ. ޝަހީދުވިއިރު 3 މަހުގެ ތުއްތު ދަރިޔަކާއި އަންބަކު އިންނެވި އެވެ.
