މިހާރުގެ ސަރުކާރުން ވެރިކަމާ ހަވާލުވި އިރު 39 ބިލިއަން ރުފިޔާގެ މަޝްރޫތައް ނުނިމި އޮތް ކަމަށާއި ނަމަވެސް ނިމިދިޔަ 19 ވަނަ މަޖިލީހުން ފާސް ކުރި ބަޖެޓުގައި މި މަޝްރޫތައް ކުރިއަށް ގެންދިއުމަށް ހިމަނާފައިވަނީ އެންމެ 3.6 ބިލިއަން ރުފިޔާކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ.
މިނިސްޓަރު މުއްތަލިބް މިހެން ވިދާޅުވީ ރައީސް އޮފީހުގައި މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ.
މިނިސްޓަރު ވިދާޅުވީ މި ސަރުކާރުން ވެރިކަމާ ހަވާޅުވި އިރު ސޮއިކޮށްފައިވާ މި 39 ބިލިއަން ރުފިޔާގެ މަޝްރޫތަކުގެ ތެރޭގައި ހިމެނެނީ 322 މަޝްރޫއެއް ކަމަށެވެ.
މި މަޝްރޫތަކުގެ ތެރެއިން 190 މަޝްރޫއަކީ އެމްޓީސީސީ އާއި އާރްޑިސީއާ ހަވާލުކޮށްފައިވާ މަޝްރޫތަކެކެވެ. މީގެ ތެރެއިން 63 މަޝްރޫއެއްގެ މަސައްކަތް ފަށާފައިވެސް ނުވާ އިރު މަސައްކަތް ފެށިފައިވާ 127 މަޝްރޫތަކުގެ ތެރެއިން 68 މަޝްރޫއެއްގެ މަސައްކަތް އޮތީ ހުއްޓިފަ އެވެ.
“މި ދެންނެވި 39 ބިލިއަން ރުފިޔާގެ މަޝްރޫ ހިންގުމަށްޓަކައި ބަޖެޓުގަ ކުރިއަށް ދާ މަޝްރޫތަކަށް ހިމަނާފައި އޮތީ 3.6 ބިލިއަން ރުފިޔާ. މިއީ 2024 އަހަރުގެ ޕްރޮޖެޓްތައް ހިންގުމަށް ބޭނުންވާ އަދަދުގެ ބައި ކުޅަ ބައި” މުއްތަލިބް
ޕްރޮޖެކްޓްތައް ކުރިއަށް ނުދަނީ ކީއްވެގެންތޯ ވަރަށް ގިނައިން ސުވާލު ކުރާކަމަށް މިނިސްޓަރު ވިދާޅުވި އެވެ. މިނިސްޓަރު ވިދާޅުވީ ވަރަށް ގިނަ މަޝްރޫތައް ކުރިއަށް އެބަދާ ކަމަށާއި ވަރަށް ބައިވަރު މަޝްރޫތައް ކުރިއަށް ނުދާތަންވެސް ފެންނާނެ ކަމަށެވެ.
އޭގެ ސާފު ޖަވާބަކީ ސޮއިކޮށްފައި ހުރި މަޝްރޫތައް ކުރިއަށް ގެންދިއުމަށް ބޭނުންވާ ފައިސާ މިދެންނެވި ގޮތަށް ބައި ކުޅަ ބަޔަށް ބަޖެޓުގައި ހިމެނިފައި އޮތުންމުން ކަމަވެސް މުއްތަލިބް ވިދާޅުވިއެވެ.
ސަރުކާރުން މަޝްރޫތަކަށް ހަރަދު ކުރެވޭނީ ބަޖެޓުގައި އޮންނަ މިންވަރަށްކަމަށް މިނިސްޓަރު ވިދާޅުވި އެވެ. ނަމަވެސް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދުގެ ދަށުން ސަރުކާރުން މަސައްކަތްކޮށްފައިވަނީ ވީހާވެސް ގިނަ މަޝްރޫއެއްގެ މަސައްކަތް ކުރިއަށް ގެންދިއުމަށްކަމަށް މުއްތަލިބް ވިދާޅުވި އެވެ.
