ހއ. އަތޮޅުގެ ހުޅަނގު ބިތުގައި ހިމެނޭ ރަށްތަކުގެ ތެރެއިން ހއ. ތަކަންދޫއަކީ މުއްސަނދި ތާރީޚެއް އެކުލެވިގެންވާ ސާފު ރީތި ރަށެކެވެ. ޤުދުރަތީ ހިތްގައިމުކަމާއި ރީތިކަން އެކުލެވޭ މިރަށުގެ ރައްޔިތުންނަކީ ސާފުތާހިރުކަމަށް ލޯބިކުރާ ނަމޫނާ ބައެކެވެ. ހިތްތިރިކަމާ މެހެމާންދާރީ އަދާކުރުމުގައި ފާހަގަކޮށްލެވޭ ހިތްހެޔޮ ރައްޔިތުންތަކެއް ދިރިއުޅޭ ރަށެކެވެ.
ދިވެހިރާއްޖޭގެ އެހެނިހެން ރަށްތަކެކޭ އެއްފަދައިން، އެކި ސަބަބުތަކާއި ހުރެ ރަށުގެ ގިނަ ބަޔަކު ދިރިއުޅުން ވަނީ މާލެ ސަރަޙައްދަށް ބަދަލުކުރަން މަޖުބޫރުވެފައެވެ. 900 އެއްހާ މީހުން މި ރަށުގެ އާބާދީގައި ހިމެނޭއިރު، މިހާރު ރަށުގައި ދިރިއުޅެމުން ދަނީ 200 އެއްހާ ރައްޔިތުންން ކަމުގައި މަޢުލުމާތު ލިބިއެވެ.
ތަކަންދޫގައި ދިރި އުޅޭ މީހުން މަދުކަމުގައި ވީނަމަވެސް ރަށުގައި އުމްރާނީ ގިނަ މަސައްކަތްތަކެއް ކޮށްފައިވާކަން ފާހަގަކޮށްލަން ޖެހެއެވެ. ޚާއްސަކޮށް އާންމު ފަރުދުންގެ ގެދޮރު ޒަމާނީ ފެންވަރަށް ބިނާކުރުމުގެ މަސައްކަތް ބާރު ސްޕީޑުގައި ކުރަމުންދާތަން ފެންނާން އެބަހުއްޓެވެ. އެއާއިއެކު ނިންމާފައިވާ ޒަމާނީ ފަރުމާތަކަށް ނިންމާފައިވާ ބިނާތައްވެސް މަދުނޫންކަން ފާހަގަކޮށްލަންޖެހެއެވެ. އުމްރާނީ ތަރައްޤީއަށް އިތުރަށް ނަޒަރު ހިންގާލާއިރު ރަނގަޅު ފެންވަރެއްގައި ހަދާފައި ވާ ސްކޫލަކާއި، ސިއްޚީމަރުކަޒެއް އެބަހުއްޓެވެ.
ދިވެހިރާއްޖޭގެ ތާރީޚް ދިރާސާކުރާ ބޭފުޅުންގެ މަޢުލޫމާތަށް ބުރަވެ ބުނެވޭގޮތުގައި ހއ. ތަކަންދޫއަކީ 300 އަހަރަށް ވުރެ ދިގު ތާރީޚެއް އޮތް ރަށެކެވެ. މިކަމަށް ބާރުލިބޭ އެންމެ ބޮޑު އެއް ހެއްކަކީ މި ރަށުގެ ޤަބުރުސްތާނެވެ. ހިރިގަލުގެ މި ޤަބުރުސްތާނަކީ ރާއްޖޭގައި ވާ ހިރިގަލުގެ އެންމެ ބޮޑު ގަބުރުސްތާނު ކަމުގައި ބުނެވެއެވެ. ތާރީޚުގެ ފަތްފުތްތަކާއި މި ރަށުގެ ރައްޔިތުންގެ ދީފައިވާ މަޢުލޫމާތަށް ބަލާއިރު ހިރިގަލުގެ 3000 ވުރެ ގިނަ ގާ އެގަބުރުސްތާނުގައިވެއެވެ. މި ޤަބުރުސްތާނަށް ބަލާލުމުން ފާހަގަވާ އެންމެ މުހިންމުކަމަކީ އޭރުވެސް ދިވެހިންގެ މަސައްކަތްތެރިކަން ކުރިއަރާފައިވާ މިންވަރެވެ. މަހާނަ ގައު ތަކުގައި އަޅާފައިވާ ކުރެހުންތަކާއި ލިޔެފައިވާ ލިޔުން ތަކުގެ އިތުރުން ގައުތައް ކޮށައިމަށައި ފަރުމާކޮށްފައިވާ ބައްޓަމާއި، ލައްވާފައިވާ ބަނޑި ތަކުން ދިވެހީންނަކީ އެޒަމާނުގައިވެސް އުފެއްދުންތެރި ފަންނުވެރި ބައެއްކަން ދައްކުވައިދެއެވެ.
ތަކަންދޫގެ ޤަބުރުސްތާނު ކައިރީގައި 10 ފޫޓު 10 ފޫޓުގެ ވެވެއް ފެނިފައިވެއެވެ. މިއީ ކުރީޒަމާނުގައި ފެންވެރުމަށް ބޭނުންކޮށްފައިވާ ވެވެއްކަމަށް ލަފާކުރެވެއެވެ. މި ވެވު ހަދާފައިވަނީ ހަތަރެސްކަން ބައްޓަމަށެވެ.
ޕޯޗުގީޒުންނާއި ހަނގުރާމައަށް ނުކުމެވަޑައިގެން ހަނގުރާމައިގައި އުޅުއްވަނިކޮށް ޝަހީދުވެ ވަޑައިގެންނެވި އަލިތަކުރުފާނުގެ ޒިޔާރަތަކީ ތަކަންދޫގެ ތާރީޚަށް އިތުރު ފުރިހަމަ ކަމެއް ގެނެސްދޭ އެއް ބިނާއެވެ. އަލިތަކުރުފާނަކީ ގައުމީ ދުވަސް އެބޭފުޅަކަށް ނިސްބަތްވެ ވަޑައިގަންނަވާ އުތީމު މުޙައްމަދު ތަކުރުފާނުގެ ބޭބޭފުޅެވެ. ކުރިން ބުނެވުނު ފަދައިން އަލިތަކުރުފާނުގެ ޒިޔާރަތައް ބަލާލުމުން ވެސް ދިވެހިންގެ މަސައްކަތްތެރިކަމާއި ފަންނުވެރިކަން ވަރަށް ފުރިހަމައަށް ފެނިގެންދެއެވެ.
ގުދުރަތީ ގޮތުން އުފެދިފައިވާ ދެ ކުޅިއަކީ ތަކަންދޫގެ ރަމްޒެވެ. ތަކަންދޫގެ އެންމެހައި ރައްޔިތުންނާއި ކައިރި ރަށްތަކުންނާއި އަދި ދުރު ހިސާބުތަކުގެ މީހުންވެސް އެތަނުގައިވާ ޤުދުރަތީ ރީތިކަން ދެކެލައި ހިތްހަމަ ޖައްސައިލުމަށްޓަކައި ޒިޔާރަތް ކުރާ މަންޒިލެކެވެ. ކުޅީގެ ވަށައިގެންވާ އެކި ވައްތަރުގެ ގަސް ތަކާއި ކުޅީގައި ދިރި އުޅޭ ތަފާތު ދިރުން ތަކުން އެ ތަނަށް އިތުރު ފުރިހަމަ ކަމެއް ގެނެސްދެއެވެ.
އާންމުގޮތެއްގައި ކުދި ރަށްތަކުން ލިބެން ހުންނަ އަސާސީ ޚިދުމަތްތައް މިރަށުންވެސް ލިބެން އެބަހުއްޓެވެ. އެގޮތުން ރަށުގައި 24 ގަޑިއިރު ކަރަންޓުގެ ޚިދުމަތާއި ސާފު ބޯފެން ލިބޭނެ އިންތިޒާމު ސަރުކާރުން ހަމަޖައްސަވާފައިވެއެވެ. އަދި ޒަމާނީ ސްކޫލަކާއި ޞިއްޙީ މަރުކަޒެއްގެ ޚިދުމަތްވެސް ތަކަންދޫގައި ރައްޔިތުންނަށް ދަނީ ލިބެމުންނެވެ.
މި ހުރިހާ ކަމެއް ހުރިނަމަވެސް، ތަކަންދޫ ރައްޔިތުންގެ އެންމެ ބޮޑު ކަންބޮޑުވުމަކީ ތަކަންދޫގައި ދިރިއުޅޭ އާބާދީ ދުވަހެއް ދުވަހަކަށް މަދުވަމުން ދިއުމެވެ. މީގެ ސަބަބުން ޚިދުމަތް ލިބުމުގައި ގިނަގުނަ ދަތިތަކާއި ކުރިމަތިވަމުންދާކަން ފާހަގަކުރެވެއެވެ.
ތަކަންދޫގެ ގިނަ ރައްޔިތުންގެ އުންމީދަކީ ފަތުރުވެރިކަން ކުރިއަރައި ދިއުމެވެ. ހދ ހަނިމާދޫ ބައިނަލް އަޤުވާމީ ވައިގެ ބަނދަރު ރަސްމީކޮށް ހުޅުވި ގިނަ މަންޒިލް ތަކަކަށް ދަތުރު ކުރެވި ފަސޭހަ ކަމާއި އެކު ފަތުރުވެރިން ގެނެވޭނެ ގޮތްވުމެވެ. ރަށުގައި ހުރި ދިވެހިތާރީޚާއި ސަގާފަތް ރަމްޒުކޮށްދޭ ތަންތަން ޕްރޮމޯޓްކޮށް، ކާމިޔާބު ފަތުރުވެރި މަންޒިލަކަށް ބަދަލުކޮށް ގުދުރަތީ ރީތިކަމާއި ރަށުގައި ފެންނާން ހުރި އާސާރީ ތަންތަން ދެމެހެއްޓެނިވި ނަފާ ލިބޭ ތަންތަނަށް ބަދަލުވެގެން ދިއުމެވެ.
ފޮޓޯ :ޒުވާން މަސްވެރިޔާ
