ތަފާތު އެކި ޚިޔާލުތަކާއި ވަސްވާސްތައް ކުރިމަތި ކުރުވައިގެން ޝައިޠާނާ، އެސޮރުގެ މަޅިތަކުގައި ޖައްސުވައި އަދި އިންސާނާ މާޔޫސްކުރުވައި، އުންމީދުތަކުގެ ހުޅުކޮޅު ނިއްވާލައެވެ. ﴿إِنَّ الشَّيْطَانَ لِلْإِنْسَانِ عَدُوٌّ مُبِينٌ﴾ މާނައީ: “ހަމަކަށަވަރުން ޝައިޠާނާއަކީ އިންސާނާއަށް ހުރި ފާޅުވެގެންވާ ޢަދާވާތްތެރިއެކެވެ.” (يوسف:5)
ވިސްނަންވީ ކަމަކީ އަހަރެމެން ޚަލްޤުކުރެއްވީ ﷲ ކަމެވެ. އަދި އެކަލާނގެ އަހަރެމެންނަށް ހެޔޮ މަގު ބަޔާންކޮށްދެއްވާފައި ވާއިރު ނިކަމެތިވެގެންވާ ޝައިޠާނާ ކުރިމަތިކުރުވާ މަޅިތަކުގައި އަހަރެމެން ޖެހެންވީ ކީއްވެ ހެއްޔެވެ؟ ﷲ ގެ ރަޙުމަތުން އުންމީދު ކަނޑާނުލާށެވެ. އެކަލާނގެ ރަޙުމަތުން އުންމީދު ކަނޑާލާނީ އަބާއްޖަވެރިންނެވެ. ޝައިޠާނާ އަކީ އަބަދުވެސް މެދުކެނޑުމެއްނެތި މަސައްކަތްކުރާ ފަރާތެއް ކަމުގައި ތިބާ ދަންނާށެވެ. އެސޮރުގެ ފިޔަވަޅުތަކަށް ތަބަޢަ ވެގެން ޙާޞިލްވާނޭ އެއްވެސް ފައިދާއެއް ނޯންނާނެއެވެ.
ހިތްވަރު ކޮށް ޝައިޠާނާއާ ހަނގުރާމަކުރާށެވެ. ތައުބާވެ ކުރިއަށްދާށެވެ. ތައުބާވެފައި ހުއްޓާ އަނެއްކާވެސް ފާފައެއް ކުރެވިއްޖެނަމަ ތައުބާ ވާށެވެ. ރަސޫލު ﷲ ޞައްލަ ﷲ ޢަލައިހި ވަސައްލަމަ ޙަދީޘްކުރެއްވި ބަސްފުޅެއްގެ މާނައިގައި ވެއެވެ. “އޭ މީސްތަކުންނޭވެ! ތިޔަބައިމީހުން ﷲ ގެ ޙަޟްރަތަށް ތައުބާ ވާށެވެ. ފަހެ ހަމަކަށަވަރުން ތިމަންކަލޭގެފާނު ދުވާލަކު ސަތޭކަފަހަރު އެކަލާނގެ ޙަޟްރަތަށް ތައުބާވެވަޑައިގަންނަވަމެވެ.” (މުސްލިމް)
ފާފަތަކަށް ދާންހުރި ދޮރުތައް ހިތްވަރުކޮށްފައި ބަންދުކުރާށެވެ. ގިނަގިނައިން استغفر الله މިކަލިމަ ކިޔާށެވެ. ތިބާއަށް ކުރިން ކުރެވިފައިވާ ފާފަތައް ހަނދާން ނެތްކަމުގައި ވަނީނަމަ ހަނދާންވާ ބޮޑެތި ފާފަތަކުން ތައުބާ ވާށެވެ. ދެން ހެޔޮކަންކަން އިތުރު ކުރުމުން ކުދި ފާފަތައް إن شاء الله ފުހޮވިގެންދާނެއެވެ. استغفر الله އަކީ މާތް ކަލިމައެކެވެ. އޭގެ މާނައަކީ: “މިއަޅާ ﷲ ގެ ޙަޟްރަތުން ފާފަ ފުއްސެވުމަށް އެދި ދަންނަވަމެވެ.”
﴿فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا﴾ (سورة نوح ١٠) މާނައީ: “ފަހެ ތިމަންކަލޭގެފާނު ވިދާޅުވީމެވެ. ތިޔަބައިމީހުންގެ ރައްބުގެ ޙަޟްރަތުގައި ފާފަފުއްސެވުމަށް އެދި، ތިޔަބައިމީހުން ދަންނަވާށެވެ! ހަމަކަށަވަރުން، އެކަލާނގެއީ ގިނަގިނައިން ފާފަފުއްސަވާ އިލާހެވެ.”
ފާފަކުރުން ހުއްޓާލާށެވެ. އެކަމަށް ދެރަވެ ހިތާމަކުރަށެވެ. އެފާފައަށް އެނބުރި ރުޖޫޢަނުވުމަށް ޢަޒުމު ކަނޑައަޅާށެވެ. އަދި ފާފަ ފުސެއްވުންއެދި ރައްބުގެ ޙަޟްރަތުގައި ދަންނަވާށެވެ. ގިނަގިނައިން ތައުބާވާ މީހުންދެކެ ﷲ ތަޢާލާ ލޯބިވެވޮޑިގެންވެއެވެ.
