އެމެރިކާއިން އީރާނަށް އަސްކަރީ ހަމަލާ ދޭނޭ ކަމަށް ވަރަށް ބޮޑަށް ބެލެވެމުން ދާއިރު، އީރާނަށް ހަމަލާތައް ދޭން ފަށާނީ އުރުދުން އިންނެވެ.
އެމެރިކާގެ އަސްކަރިއްޔާގެ ސެންޓްރަލް ކޮމާންޑްގެ އޮޕަރޭޝަންސް މައި ސެންޓަރަކީ އުރުދުންގައި ގާއިމްކޮށްފައިވާ އެމެރިކާގެ އަސްކަރީ ބޭހެވެ.
އެމެރިކާގެ ސެންޓްރަލް ކޮމާންޑްގެ ކޮމާންޑަރު މިހާރުވަނީ އައްމާނަށް ގޮހެވެ.
އެމެރިކާގެ އަސްކަރިއްޔާއިން މިހާރަށްވެސް ވަނީ، ހަނގުރާމަމަތީ ބޮންއަޅާ އެތައް ބޯޓެއް އުރުދުންއަށް ފޮނުވާފައެވެ. އަދިވެސް ގެންދަނީ ފޮނުވަމުންނެވެ. އޭގެ ތެރޭގައި ޔޫއެސްއެއެފް ސީ-17 އަސްކަރީ މަތިންދާ ބޯޓުތައްވެސް ހިމެނެއެވެ.
އަސްކަރީ މަތިންދާ ބޯޓުތަކުގެ އިތުރުން، އިތުރު ހަތިޔާރާއި ސިފައިންވެސް އުރުދުންއަށް ޖަމާކުރަމުން އެބަ ގެންދެއެވެ.
އުރުދުންގެ އިތުރުން، ގަތަރާއި ޔޫއޭއީގައި ގާއިމްކޮށްފައިވާ އެމެރިކާގެ އަސްކަރީ ބޭސްތަކަށްވެސް ހަނގުރާމައިގެ ހަތިޔާރާއި، ސިފައިން ޖަމާކުރަމުން އެބަ ގެންދެއެވެ.
މި ގައުމުތަކުގެ އިތުރުން، އީރާނާ ގާތަށް ކަނޑުގެ ސަރަހައްދަށްވެސް ހަނގުރާމައިގެ މަނަވަރުތަކާއި، ސަބްމެރިންތަކާއި ސިފައިން ޖަމާކުރަމުން އެބަ ގެންދެއެވެ.
ރިޕޯޓްތައް ބުނާގޮތުގައި، އެމެރިކާއިން މި ޖެނުއަރީ މަހުގެ 31 ގެ ކުރިން އީރާނަށް ހަމަލާދޭން ފަށާނެއެވެ.
އެމެރިކާގެ މިފަހަރުގެ އަމާޒަކީ އީރާނުގެ ވެރިކަން ބަދަލުކޮށްލުމެވެ. މިފަހަރު އީރާނާ ދެކޮޅަށް ފަށަނީ ދިގުލައިގެންދާ ހަމަލާތަކެއް ކަމަށާއި، ވެރިކަން ބަދަލު ކުރެވެންދެން ހަމަލާތައް ދަމަހައްޓާނެ ކަމަށް ވެއެވެ.
އެމެރިކާއިން މިދާކަށްދުވަހު އީރާނަށް ހަމަލާ ދީފާނެހެން ހީވިނަމަވެސް، ހަމަލާ ނުދީ މަޑުޖައްސާލީ އީރާނުގެ ރައްދު ހަމަލާތަކުން ރައްކާތެރިވާން ތައްޔާރު ނުވެވޭތީ މުޖުރިމު ނަތަންޔާހޫ އެދިގެންކަން ފަހުން ވަނީ ހާމަވެފައެވެ.
އީރާނަށް ހަމަލާ ދިނުމުގައި އިސްރާއީލުވެސް ބައިވެރިވާނެއެވެ.
އީރާނުން ތަކުރާރުކޮށް އިންޒާރު ދެމުން ގެންގޮސްފައިވަނީ، މިދިޔަ އަހަރުގެ ޖޫންމަހު ދިން ރައްދު ހަމަލާތަކުގައި އިސްރާއީލަށް ބޮޑެތި ގެއްލުންތައް ދެވުނު ނަމަވެސް، އީރާނުން ދެން ރައްދު ހަމަލާތައް ދޭނީ އިސްރާއީލުގެ ވަސްވެސް ވުޖޫދުން ފޮހެލަން ކަމަށެވެ.
އީރާނުންވަނީ ސަރަހައްދުގައި ހުރި އެމެރިކާގެ އެއްވެސް އަސްކަރީ ބޭހެއް ސަލާމަތް ނުވާނޭ ކަމަށެވެ. މާނައަކީ، އުރުދުން މަގުން އީރާނަށް ހަމަލާތައް ދޭން ފަށާނަމަ އީރާނުން ރައްދު ދޭނޭ ފުރަތަމަ ގައުމަކަށް އުރުދުން ވާނެކަމެވެ.
އީރާނުގެ ބާރުގަދަ އަސްކަރިއްޔާއިން ބުނެފައިވަނީ، އީރާނުގެ ސަލާމަތީ ބާރުތަކުން ހަމަލާތައް ދޭނޭ ތަންތަން ކަނޑައެޅި، މިސައިލްތައް އެ ދިމަދިމާއަށް މިހާރު އަމާޒުކުރެވިފައިވާ ކަމަށެވެ. ސިފައިން ތިބީ ފުރިހަމަ ތައްޔާރީގައި ކަމަށެވެ.
