މިނެސޯޓާގައި ހިނގަމުންދާ ހަމަޖެހުންތަކުގެ ސަބަބުން، ވެރިކަންކުރާ ރިޕަބްލިކަން ޕާޓީއަށް އެކަމުގެ ބޮޑު އަގެއް ދައްކަންޖެހޭތަން އަންނާނެ ކަމަށް، ރިޕަބްލިކަން ޕާޓީއަށް ނިސްބަތްވާ އެ އޮހައިޔޯގެ ކުރީގެ ގަވަރްނަރ އަދި ކުރީގެ ރިޔާސީ ކެންޑިޑޭޓް ޖޯން ކަސިޗް ބުނެފިއެވެ.
މީޑިއާއަށް ދިން އިންޓަރވިއުއެއްގައި އޭނާ ބުނީ، މިނެސޯޓާގައި ހިނގަމުންދާ ކަންތައްތަކުގެ ސަބަބުން މުޅި ގައުމު ހޭލައްވަމުން ގެންދާ ކަމަށާއި، އަދުލުވެރިކަމެއް ހަމަހަމަކަމެއް ފެންނަމުން ނުދާ ކަމަށެވެ.
އެމެރިކާ ވީދި ކުދިކުދިވަމުންދާ ކަމަށްވެސް ޖޯން ކަސިޗް ބުނެފައި ވެއެވެ.
އެމެރިކާގެ ރައީސް ޑޮނަލްޑް ޓްރަމްޕް މިނެސޯޓާއަށް ފޮނުވައިގެން އުޅޭ އައިސް އޭޖެންޓުން މީގެކުރިންވެސް މިނެސޯޓާގެ މިނިއާޕޮލިސް ސިޓީގައި އާންމު އަންހެނެއްގެ ގަޔަށް ބަޑިޖަހައި މަރާލި މައްސަލަ ވަރަށް ހޫނުވެފައި ވަނިކޮށް، އަނެއްކާވެސް އާންމު މީހެއްގެ ގަޔަށް ބަޑިޖަހައި މިވަނީ މަރާލާފައެވެ.
އުމުރުން 37 އަހަރުގެ އެލެކްސް ޖެފްރީ ނަމަކަށްކިޔާ އެމެރިކާގެ ރައްޔިތެއްގެ ގަޔަށް ބަޑިޖަހައި މަރާލާފައިވަނީ، އައިސް އޭޖެންޓުން ޖެހި ޕެޕަރސުޕްރޭގެ ޝިކާރައަކަށްވި އަންހެނެއްގެ ވީޑިއޯ ފޯނުން ކުރަން ހުއްޓައި ކޮއްޕައި ވައްޓާލުމަށް ފަހުގައެވެ.
އެލެކްސްގެ ގަޔަށް ބަޑިޖެހީ އޭނާގެ އަތުގައި އޮތް ފިސްތޯލައިން އޭޖެންޓުންނަށް ހަމަލާ ދޭން އުޅުމުން ކަމަށް އެމެރިކާގެ ރައީސް ޓްރަމްޕާއި، އެމެރިކާގެ އެޓަނީ ޖެނެރަލްއާއި، ބޯޑަރު ކޮމާންޑަރު ބުނި ނަމަވެސް، އެއީ ކަނޑައެޅިގެން ދޮގުކަން ހާމަވާ މިންވަރަށް ވީޑިއޯ ފުޓޭޖްތައް ހާމަވެފައި ވެއެވެ.
މިމައްސަލާގައި ރުޅިއައިސްގެން މިނެސޯޓާގެ ގަވަރްނަރ ޓިމް ވާލްޒްއާއި، މިނިއާޕޮލިސްގެ މޭޔަރ ޖެކޮބް ފްރޭވަނީ، ސްޓޭޓާއި ސިޓީންވެސް އައިސްގެ އޭޖެންޓުން ބޭރުކޮށް ވަގުތުން ގެންދިއުމަށް ރައީސް ޓްރަމްޕަށް ގޮވާލާފައެވެ.
ހަމަ އެއާއެކު، ގަވަރްނަރ ޓިމް ވާލްޒްގެ އަމުރަށް ސްޓޭޓްގެ ނޭޝަނަލް ގާރޑް މިހާރު ވަނީ އެކްޓިވޭޓް ކޮށްފައެވެ. މާނައަކީ ގާނޫނާ ޚިލާފް އަމަލުތައް ހިންގާ އައިސް އޭޖެންޓުން ހައްޔަރު ކުރުމުގެ ފުރުސަތު ގާރޑުންނަށް ލިބިގެން ދިއުމެވެ.
މެނެސޯޓާ ސްޓޭޓް ސަރުކާރާއި، ފެޑެރަލް ސަރުކާރާ ދެމެދު ބޮޑެތި އަރާރުންތައް ހިނގަމުންދާތާ ދުވަސްތަކެއް ވެއްޖެއެވެ. ޓްރަމްޕް ގެންދަނީ، ކޮރަޕްޝަނާ ގުޅުވައި ގަވަރްނަރާއި، މޭޔަރުންނާއި، އަދި ކޮންގްރެސްއަށް ނިސްބަތްވާ މެމްބަރުންނަށްވެސް ބަހުގެ ހަމަލާތައްދީ ފިޔަވަޅުތައް އަޅަމުންނެވެ.
މިނިއާޕޮލިސް ސިޓީގެ ޑިރެކްޓަރ އޮފް އިމަޖެންސީ މެނޭޖްމަންޓް ރޭޝަލް ސޭރީ، ނޫސް ކޮންފަރެންސްގައި ބުނީ، ހަމަނުޖެހުންތައް ހިނގާ ޔަމަން، ހެއިޓީ، ސޫރިޔާ، އިރާގު އަދި ޔޫކްރެއިނެކޭ މިނިއާޕޮލިސްއެކޭ މިހާރު އެއްވެސް ތަފާތެއް ހުރި ކަމަށް އޭނާއަށް ނުފެންނަ ކަމަށެވެ.
އޭނާ ބުނީ، ރައްޔިތަކަށް ހަމަޖެހިލައިގެން އެންމެ ދުވަހަކުވެސް އުޅެވެން މިހާރު ނެތް ކަމަށެވެ.
ރިޕޯޓްތައް ބުނާގޮތުގައި، މިނިއާޕޮލިސްގައި ދެވަނަ މީހަކު މަރާލުމާ ގުޅިގެން އެތައްހާސް ބަޔަކު މަގުތަކަށް ނުކުމެ މުޒާހަރާތައް ފަށާފައި ވާއިރު، އެމެރިކާގެ އެތައް ސްޓޭޓަކާއި ސިޓީތަކެއްގެ މަގުތަކަށްވެސް އާންމުން ނުކުމެ، އައިސް އޭޖެންޓުންނާ ދެކޮޅަށް މުޒާރާތައް ކުރަން ފަށާފައި ވެއެވެ.
